Roma 2 - Núúboòd Gú'dúgke Puu Sambə́ Nwɔŋú bìá

Vɛnɛ́b dá nɛ́b bəd kíìn fágǹ kóólé

¹ Éì, nɛ́ŋə̀ aa ń tə́ nɛ́b kambəd fágǹ yóo, kóó ǹ kùm nɛ́ɛ̀réè, ń súú rú wərə̀ sé. Kàandə, màìgə́ ń tə́ nɛ́b kambəd fágàá, bít ń tə́ in luùm aarə ní ma'ǹ kə̀ boò kíin gə́, fág ń kò' yíl ń tə́ kə̀ yíl ámbə̀ ní.

² Bə́n gabm̀ yàá, Vɛnɛ́b gə́, fág nɛ́ŋə̀ì gə́, fágə́n oò tə́ wɔ̀ɔ̀làá, nɛ́b aa tə́ in luùm bəraa ma'ǹ də yílú.

³ Ń sèl lə, ḿ bàà bəǹ dákíìn báàn nuùn súùnmbə̀ Vɛnɛ́b fágə́núì, nɛ́ŋə̀ aa ń tə́ nɛ́b aa bə̀ tə́ in luùm bəraa ma'ǹ də fágàá, bít ám kɔ̀ ń tə́ ma'ǹ kìínmbə̀ boò kíin yéroó?

⁴ Sínkɔ̀, ń ná' Vɛnɛ́b insɔ̀ɔ̀nkè gbà'á tə́ kíìn, kə̀ insidké gbà'á oò tə́ì? Vɛnɛ́b mà' n sɔ̀ɔ̀nkè, bɔ̀b ǹ sɔ̀g kíìn də, ń gàb sínì?

⁵ Zá tɛ́m ḿ kpɛŋ̀ yàá, ḿ məəì sɔ̀gǹmbìá. Kə̀ taàbìá, kùd ń zíg fágə́n gbà'á tə́ ám yílú, nyàm aa Vɛnɛ́b dáà nɔ̀m oò sí'ǹnà nɛ́b bəd yílú, bít dá fágə́n wɔ̀ɔ̀lə̀ oò i'ǹ də ba.

⁶ Bít nyàm aarə, kóó nɛ́ɛ̀réè, dáù tùsaa mà' rə, dùm oò káánàá.

⁷ Nɛ́b aa ìì tə́ nɔŋ̀ insɔ̀ɔ̀nkè gə́ kóólé ma'ǹmbə̀ rə, Vɛnɛ́b dá bə̀ gɔ̀ŋsə́ aa bɛ́d bə gá rə piinàá. Nɛ́b bəraa rə, bə̀ tə́ kaŋsɛ́l saanàá, kə̀ gɔ̀ŋsə́ aa bɛ́d bə gá roó.

⁸ Zá dá nɔ̀m ma'ǹ, bít dá tɛ́m nwuukè oò sí'ǹ nɛ́b aa bə̀ tə́ gbəŋ̀ kə̀ oòrə yílú. Bə̀ ləə vɛ́nà sé, bít lɛ́' bə̀ dàà yíl boò, in aa wɔ̀ɔ̀lə̀ síndə tə́ bə̀ sə̀n gubàá.

⁹ Vɛnɛ́b dáà búúd sí'ǹnà kə̀ tɛ́m nyágə́lke tá, nɛ́b aa tə́ invaksə́ ma'ǹ də yílú. Éèn sɔ̀d dáà sí'ǹnà Yahudu bəd yílú. Zá bíd yaà dá taà sí'ǹ nɛ́b aa bə̀ bàgə̀ síndə yílə́ kɔ̀.

¹⁰ Nɛ́b bəraa bə̀ tə́ insɔ̀ɔ̀nkè ma'ǹ də gə́ kóólé, Vɛnɛ́b dá bə̀ káŋke piìn kə̀ tɛbə̀ tá. Éèn sɔ̀d dá Yahudu bəd piinàá, bít bòórú gə́, dá taà nɛ́b kun bəraa bə̀ bàgə̀ síndə piìn kɔ̀.

¹¹ Kàandə, Vɛnɛ́b gə́, pɛ̀d nɛ́ŋə̀ bə sé. Oò gə́, də́' nɛ́b bəd kóólé tə́ nə́ŋ̀ní.

¹² Nɛ́b aa ìì mà' invaksə́ yàá, bə̀ gàb Musa indaŋ̀mbə̀ síndə, val kò' bə̀ kə̀ Musa indaŋ̀mbə̀ aarə gá. Zá nɛ́b aa bə̀ gàb indaŋ̀mbə̀ nwɔŋ yàá, bít bə̀ mà' invaksə́ rə gə́ kóólé, bə̀ dá bə̀ fágǹ kə̀ indaŋ̀mbə̀ aa roó.

¹³ Kàandə, nɛ́b aa bə̀ kùm wɔ̀ɔ̀lə̀ Vɛnɛ́b númú rə, bə̀ kùmsə̀n nɛ́b aa bə̀ zɛ̀ŋ indaŋ̀mbə̀ nwɔŋ kə̀ túŋ ní rə gá, zá nɛ́b aa bə̀ tə́ nwɔŋ aa indaŋ̀mbə̀ bàà rə ma'ǹ kə̀ tù' roó.

¹⁴ Màìgə́ nɛ́b kun bəraa bə̀ bàg Vɛnɛ́b sé, bə̀ gàb Yahudu bəd indaŋ̀mbə̀ síndə, bə̀ ləə nwɔŋ aa indaŋ̀mbə̀ bàà rəì kə̀ yíl boò gə́, kóó dáà bə̀ kə̀ Musa indaŋ̀mbə̀ naà síndə máá, bə̀ kùmsə̀n indaŋ̀mbə̀ kə̀ yíl boò ra.

¹⁵ Bə̀ ì' gə́, tùsaa indaŋ̀mbə̀ í' rə, bádmíìn tə́ obənə́ tɛ́mú. Inselké boò tɛ́mú bə̀ kɔ̀, ì' tə́ kə̀ aarə kíin. Sɛŋ kam gə́, inselké boò tɛ́mú bə̀ ál bə̀ kúnú, bít sɛŋ kam kɔ̀, tág bə̀ kúnú.

¹⁶ Aa yée in aa dá vúgǹ, nyàm aa Vɛnɛ́b dá in aa mə́' nɛ́b bəd tɛ́mú rə gə́ kóólé, fágǹ bə kə̀ Yéésù Krístù ra, kìínmbə̀ Nwɔŋ Puu Sɔ̀ɔ̀nkè aa mə́ tə́ udǹ də bàà rə kíin doó.

Yahudu bəd kə̀ Musa indaŋ̀mbìá

¹⁷ Kə̀ aakíin də, dáà ń bàà yàá kə̀ yíl ám bìá bəǹ Yahudu, bít ń zíg tɛ́mì indaŋ̀mbə̀ ba, ḿ mà' kùlə́ yàá, ḿ bààì bəǹ Vɛnɛ́b nɛ́ŋàá,

¹⁸ ń kùmì kìínmbə̀ Yahudu bəd kíin gə́, ń gàb in aa Vɛnɛ́b í' rə yàá. Bít indaŋ̀mbə̀ kɔ̀ sán n nɛɛ̀n aa ń dá in aa tə́ sɔ̀ɔ̀ní rə saàn pa'ǹ dú rə yàá.

¹⁹ Ń sèl ḿ bàà, bəǹ kùmsə̀n yibə̀ nyəd bəd bə̀ gubm̀má, bít laa nyɛdkè nɛ́b bəd bə̀ nyɛ́'ǹ tígə́lú.

²⁰ Aíra íí kùmsə̀n nɛ́b aa ùd bə̀ sáá nɛ́b aa bə̀ kə̀ kpɛŋsɛ́l naà, Vɛnɛ́b nwɔŋ bə̀ ko'ǹ síndə nwɔŋá. Íí kùmsə̀n yɛb bɛ̀ŋ́sə̀ bəd nɛ̀n vɛ́nà. Kàandə, ń tə́ kə̀ yílə in bə̀ gabm̀ naú, kə̀ vɛ́nà tá, indaŋ̀mbə̀ rú.

²¹ Bít bə́ŋyée, ámda ń sán sə̀n nɛ́b kambəd nwɔŋá. Kə̀ níìbə̀ ń sán taà yíl ámbə̀ kɔ̀ gá gú? Ámda ń bàà sə̀n boò pà' lííro sí. Kə̀ níìbə̀ ń tə́ taà lííro pa'ǹ gú?

²² Ámda ń bàà sə̀n boò mà' labsə̀ sí. Kə̀ níìbə̀ ḿ mà' taà labsə̀ gú? Ámda zèè ń sáá sə̀n vɔɔmá. Kə̀ níìbə̀ ḿ pìì taà vɔɔm wúuú, bɔ̀n ń pú' taà vɔɔm in bəd gú?

²³ Ḿ mà' kùlə́, ḿ bàà Vɛnɛ́b pii bəǹ indaŋ̀mbə̀ yàá. Zá ń ləə Vɛnɛ́b sé, kə̀ kɛdǹmbə̀ in aa indaŋ̀mbə̀ oò bàà roó!

²⁴ Kə̀ aakíin də, Núúboòd Gìdń bəd bàà: «Aí bòórú, íí Yahudu bərá, nɛ́b kun kam bəraa bə̀ bàg Vɛnɛ́b síndə, bə̀ gám taà nwɔŋ vaksə́ bəd Vɛnɛ́b yílú.»

²⁵ Dáà ń ləə indaŋ̀mbə̀ nwɔŋì gə́, gàb naànmbə̀ dá n kíìn gbá'ǹ númú. Zá ń ləə indaŋ̀mbə̀ nwɔŋ síngə́, ń kùm tə́ kìínmbə̀ ń nàà gàb sín kíin.

²⁶ Nɛ́ŋə̀ aa nàà gàb síndə, ləə indaŋ̀mbə̀ nwɔŋì gə́, Vɛnɛ́b gárə̀ kìínmbə̀ nɛ́ŋə̀ aa nàà gàb də kíin géè?

²⁷ Ámda, nɛ́ŋə̀ aa ń kɛ̀d indaŋ̀mbə̀ nwɔŋ aa bádmíìn doó, kóó dáà ń tə́ kə̀ indaŋ̀mbə̀ naú, bít ń nàà gàbì máá, nɛ́ŋə̀ aa nàà gàb sé, zá ləə indaŋ̀mbə̀ nwɔŋì rə, dá n sə̀n fágàá.

²⁸ Kə̀ aakíin də, nɛ́ŋə̀ aa tə́ Yahudu vɛ́nà rə, bə̀ dáù gabm̀ kə̀ si' gbaarú bə̀ ní gá, sínkɔ̀ kə̀ gàb naànmbə̀ aa nɛ́ŋə̀ bé' núùrú, si' kúl bərə ní gá.

²⁹ Kə̀ sɔɔ̀n kíin gə́, Yahudu vɛ́nà gə́, tə́ tɛ́mú, nɛ́ŋə̀ aa nàà gàb tɛ́mú roó. Gàb naànmbə̀ luùm aarə kɔ̀, Vɛnɛ́b Nwul mà' sùnú; indaŋ̀mbə̀ aa ìì bád də, mà' sə̀n gá. Yahudu vɛ́nà aarə, nɛ́b bəd dáù sə̀n káŋ̀ gá, zá Vɛnɛ́b dáù sə̀n káŋàá.