Markus 9 - Núúboòd Gú'dúgke Puu Sambə́ Nwɔŋú bìá1 Yéésù bàà bə̀ sɔ̀ŋ: «Mə́ tə́ ii kíìn baanàá, aarə nwɔŋ sɔ̀ɔ̀ná, nɛ́b kam nɛ́b aa zɔ̀ŋə yée tə́ŋú, val kòd bə̀ bə́ŋ̀ gá. Bə̀ dá Vɛnɛ́b gààd bé'ǹ tóò síìm yaàn kə̀ kpɛŋsɛ́lá.» Yéésù ì' kaŋsɛ́l oò nɛ́b sáànmbə̀ oò bəd núùrú ( Mata 17.1-13 ; Luka 9.28-36 ) 2 Sɛŋ nɔ̀ŋgɔ̀s yaà taà gə́, Yéésù pà' Piyɛr kɔ̀, Yakuba kɔ̀, kə̀ Yohana tá, àà bə̀ kɔ̀l bùúd yílú, boò ní. Vɛnɛ́b pɛ́n Yéésù si' boò núùrú ní. 3 Gɔ̀' oò bəd bììd sáá zé írə̀ íd! Kóó nɛ́ŋə̀ nə́ŋ̀má zɔ̀ŋə yɛ́b ba, gɔ̀' bán bidǹmbə̀ kə̀ aarə kíin gá. 4 Kàanyée gə́, nɛ́b sáànmbə̀ bəraa toorə yée, bə̀ bé' Eliya kə̀ Musa tá, dìì bə̀ tə́ nwɔŋ gáàm pɛ́ɛ̀n kə̀ Yéésù ra. 5 Piyɛr bàà Yéésù: «Nɛ̀n gbà'á, tə́ sɔ̀ɔ̀ní obə́n bə̀ kuùmbə̀ zɔ̀ŋə. Báà kudǹ dìí toora, nə́ŋ̀ ám bìá, nə́ŋ̀ Musa bìá, nə́ŋ̀ kɔ̀ Eliya bìá.» 6 Piyɛr bàà kə̀ aakíin də, kàandə, Piyɛr kə̀ nɛ́b sáànmbə̀ kam bəd tá, də́dǹ mà' bə̀ì gbàákù. Kə̀ taàbìá, gàb taà nwɔŋ aa dá gáàm də sé. 7 Záàn gə́, mɔb yaà kág bə̀ bée. Bə̀ kìì pə̀gə̀lib nwɔŋ mɔbú, pə̀gə̀lib nwɔŋ də bàà: «Màn aa yée kùmsə̀n Wàà mə́ra, mə́ í'ù tə́ gbàákù, ìì zɛ̀ŋ̀ nwɔŋ kúnú.» 8 Bít bòórú gə́, nɛ́b sáànmbə̀ bəd ɛ̀g núù boò kàrú gə́, ìì bé' nɛ́ŋə̀ nə́ŋ̀má sé, Yéésù dìì sə̀ní kə̀ boò tá. 9 Bə̀ tóò síìmmà kɔ̀l yílə́ yée gə́, Yéésù bàà bə̀ boò ùd in aa boò bé' yérə nɛ́b kambəd sí, nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə oò díím sína valú. 10 Kò' bə̀ kùd nwɔŋ aa yóo, bíd ìì dɛ̀d ɔ̀dnə́ŋ̀ boò bòdba: «Díímke valú gə́, níì gú?» 11 Bít bə̀ dɛ̀d taà Yéésù ra: «Kə̀ níìbə̀ nɛ̀n indaŋ̀mbə̀ bəd bə̀ bàà taà Eliya dáà sína yaàn gú?» 12 Yéésù kè' í' bə̀, bàà: «Èè vɛ́nà, Eliya dáà sína yaanàá, dá in bəd kudǹ kóólé. Zá kə̀ níìbə̀ Núúboòd Gìdń bàà taà nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə dá búúd zùúm bé'nàá, bít nɛ́b bəd kɔ̀ bə̀ dáù taà ɛgǹ kìínmbə̀ in tɛdń kíìn gú? 13 Máá mə́ tə́ ii kíìn baanàá' Eliya yaà yàá, nɛ́b bəd kɔ̀ bə̀ mà'ù in aa í' rə yàá, kìínmbə̀ núúboòd bàà dàà oò yílə́ rə kíni.» Yéésù gáŋ wàà nə́ŋ̀ kə̀ Nwul vaksə́ naà sisú ( Mata 17.14-21 ; Luka 9.37-43 a) 14 Zɔ̀ŋ aa dá bə̀ wə́ə́ nɛ́b sáànmbə̀ kam bəraa nyɛ́d də səǹ gə́, bə̀ bé' nɛ́b zùúm yaà páá bə̀ tə́ŋú. Nɛ̀n indaŋ̀mbə̀ kambəd bə̀ tə́ nwɔŋ nyá'ǹ kə̀ boò ra. 15 Zɔ̀ŋ aa nɛ́b zùúm bəd bé'à Yéésù gə́, tɛ́m làm bə̀ì gbàákù. Bə̀ ɛ̀mà kə̀ nɔgá, yaà bə̀ dɔ̀mə̀ kúnú. 16 Yéésù dɛ̀d nɛ́b sáànmbə̀ oò bəd: «Íí tə́ níì nwɔŋ nyá'ǹ kə̀ boò gú?» 17 Nɛ́ŋə̀ nə́ŋ̀ nɛ́b zùúm tə́ŋə́ wərà, kè' í'ù nwɔŋ, bàà: «Nɛ̀ná, mə́ aànnà wàà váàndo mə́ra, tə́ kə̀ nwul vaksə́ naú, gám bán nwɔŋ gá. 18 Zɔ̀ŋ aa nwul vaksə́ aarə kò'ù bərə gə́ kóólé, làà lɛ́'ù yɛ́b ba. Nɛ́ŋə̀ aarə gú' oò nyìì kə̀ fùgsɛ́lá, bít dìì nə́gə́l fu'ǹmbìá. Si' oò dákíìn waràá. Mə́ nyɛ̀m nɛ́b sáànmbə̀ ḿ bəd nìŋ boò vúŋ nwul vaksə́ aarə kúnú, zá ìì bán sé.» 19 Yéésù kè' í' bə̀: «Íí nɛ́b luùm bəraa íí bàg Vɛnɛ́b sín yóo! Sɛŋ leè má taà kuùm kə̀ aí tə́, íí dá mə́ taà bagǹ gú? Má ii sidǹ dá wə́ə̀n sɛŋ leè gú? Ìì àà máà wàà rə zɔ̀ŋə.» 20 Bə̀ àà wàà rə Yéésù sunú. Zɔ̀ŋ aa nwul vaksə́ bé' Yéésù kàangə́, wá' wàà rə kúnú, pà' lɛ́'ù yɛ́b ba. Bít wàà rə kiìl yɛ́b ba, gú' oò nyìì kə̀ fùgsɛ́lá. 21 Yéésù dɛ̀d wàà aarə báá oò: «Sɛŋ déè bə in aarə sɔ̀rə̀ taà ma'ǹmbə̀ gú?» Wàà bóò kè' í' bàà: «Sɔ̀rə̀ sɛŋ aa bɔ̀b bə́ŋə̀ tə́ bɛ̀ŋ́sə̀wà roó. 22 Bít sɛŋ gə́ kóólé, nwul vaksə́ aarə làà lɛ́'ù laarú, sínkɔ̀ wəlú, oò bə̀ bɔbm̀ lo'ǹmbìá. Zá ń dákíìn báàn in nə́ŋ̀ ma'ǹmbə̀ gə́, yaà ǹ láŋ bə́ ba, ɛ̀g ǹ bé' bə́ búúrá.» 23 Yéésù bààù: «Ń bàà mə́: ‹ń dákíìn báàn in nə́ŋ̀ ma'ǹmbə̀ gə́,› wa? Màn aa tə́ Vɛnɛ́b bagǹ də naà gə́, in nə́ŋ̀má gbò' sé.» 24 Záàn gə́, wàà rə báá oò páá kpə̀ə́ǹ, bàà: «Mə́ kè' yàá! Yaà ǹ láŋ mə́ ba, tɛ́mbagké mə́ oò ɛ̀m númú!» 25 Zɔ̀ŋ aa Yéésù bé' nɛ́b zùúm tóò yaànà gə́, pél nwul vaksə́ nwɔŋá. Bít bàà: «Nwul kèéd kpuŋə̀ aaú, mə́ tə́ən kíìn baanàá, ǹ vúg kíìn wàà aa sisú, bít ǹ bírà oò sisə́ sɔ̀ŋ sí!» 26 Bít vúg kə̀ kpə̀ə́ǹ bəd páàlǹmbìá, kə̀ nɔŋsɛ́l kpɛŋkéá. Wàà yaà bíl kìínmbə̀ val kíni. Bít nɛ́b bəd zùúm, bə̀ bàà: «Val kò'ù yàá!» 27 Kàanyée gə́, Yéésù kò'ù nɛɛ̀n ba, zááù lɛgú, bít wàà záá dìì lɛgú. 28 Zɔ̀ŋ aa Yéésù dá pìì wúu gə́, nɛ́b sáànmbə̀ oò bəd bɔ̀n bə̀ dɛ̀rə̀ boò ní: «Kə̀ níìbə̀ bə́ bánà taà nwul vaksə́ aa niŋ̀ vúŋ̀mbə̀ sín gú?» 29 Yéésù kè' í' bə̀: «Nwul vaksə́ luùm aarə dá vúgǹ gə́, sìná kə̀ Vɛnɛ́b nyɛɛ̀mbìá.» Nɛɛ̀n aa Yéésù bàà vúŋ val nwɔŋ oò rú, kə̀ díímke nwɔŋ oò rú, dun iirə roó ( Mata 17.22-23 ; Luka 9.43b-45) 30 Kàanyée gə́, bə̀ zá' wərə̀ gə́, taà bə̀ dàà Galili yɛ́bá, Yéésù í' nɛ́b bəd boò gàb sí. 31 Ùd nɛ́b sáànmbə̀ oò bəd nwɔŋ kə̀ aakíin, bít bàà bə̀: «Bə̀ dá nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə ko'ǹ piìn nɛ́b bəd naú. Bə̀ dáù kíìn lo'nàá, bít sɛŋ toorə bə gə́, dákíìn díìm valú.» 32 Zá nɛ́b sáànmbə̀ bəd kìì nwɔŋ aa bàà bə̀ rə sé, bít boò kɔ̀ bə̀ nùù kíìn oò bə̀ dɛdǹmbìá. Nɛ́ɛ̀réè kùmsə̀n nɛ́ŋ gbàáro gú? ( Mata 18.1-5 ; Luka 9.46-48 ) 33 Zɔ̀ŋ aa yaà bə̀ wə́ə́ Kapɛrnaum bìlú, bə̀ pìì wúu gə́, Yéésù dɛ̀d nɛ́b sáànmbə̀ oò bərá, bít bàà bə̀: «Íí nyá'à níì nwɔŋ kpaŋ̀ tɛ́mú gú?» 34 Zá bə̀ kùm bəd dìímsə̀ní; kàandə sɛŋ aa kpaŋ́ rə, bə̀ nyá'à nwɔŋá, bɔbm̀ gabm̀bə̀ nɛ́ɛ̀réè kùmsə̀n nɛ́ŋ gbàáro boò tə́ŋə́ gú. 35 Kàanyée gə́, Yéésù kùm yɛ́b ba, dɛ̀rà nɛ́b sáànmbə̀ oò bəd kób zè iira, bít bàà bə̀: «Dáà nɛ́ŋə̀ í'ì kuùmbə̀ nɛ́d yíl bə̀ gə́, oò bí' yíl oò dùú. Oò kùm nɛ́d tù' bə̀ ma'ǹ nɛ́b bəd kóólé bìá.» 36 Kàanyée gə́, Yéésù pà' wàà bɛ̀ŋ́sə̀ nə́ŋ̀á, díù boò tə́ŋú, bít pà'ù naà gə́, bàà nɛ́b sáànmbə̀ oò bəd kə̀ aakíin: 37 «Dáà nɛ́ŋə̀ nə́ŋ̀ kè' wàà bɛ̀ŋ́sə̀wà nə́ŋ̀ì oò yiìl kìínmbə̀ wàà aa yée kíin, máá nə́gə́lə́ gə́, kè' mə́ì kɔ̀. Bít nɛ́ŋə̀ aa kè' mə́ì rə, kè' máá ní gá, zá kè' nɛ́ŋə̀ aa tùm máà rəì kɔ̀.» Nɛ́ŋə̀ aa nə́' kə̀ obə́n síndə tə́ kə̀ obə́n tá ( Luka 9.49-50 ) 38 Kàanyée gə́, Yohana bàà Yéésù: «Nɛ̀n gbà'á, bə́ bé'à nɛ́ŋə̀ nə́ŋ̀ tóò nwul vaksə́ bəd niŋ̀ vú'ǹnà ám nə́gə́lú; bít wál kə̀ obə́n tə́ sín yée gə́, bə́ dàŋ̀wà yàá.» 39 Zá Yéésù kè' í' bə̀, bàà: «Ìì dàŋ̀ sí. Màn aa mà' inwulubə̀ máá nə́gə́lə́ rə gə́ kóólé, bòórú gə́, bán nwɔŋ vaksə́ gáàmbə̀ máá yílə́ gá. 40 Kóó màn déè, nə́' kə̀ obə́n síngə́, tə́ kə̀ obə́n tá. 41 Mə́ tə́ ii kíìn baanàá, aarə nwɔŋ sɔ̀ɔ̀ná, kóó nɛ́ɛ̀réè, pii ii wəl nyəə̀nmbə̀ì zɔ̀gɔ̀ máá nə́gə́lú, bààì íí Krístù nɛ́b bəd gə́, Vɛnɛ́b dáù mú'sɛ̀l dùm oò kíìn piinàá.» Yíl gú'ǹmbə̀ kə̀ nɛ́ŋə̀ záàn páànmbə̀ invaksə́ rú ( Mata 18.6-9 ; Luka 17.1-2 ) 42 «Màn aa mà' wàà bɛ̀ŋ́sə̀wà nə́ŋ̀ bɔ̀' tɛ́mbagké oòì, yɛb bɛ̀ŋ́sə̀ bəraa tə́ mə́ bagǹ də tə́ŋə́ rə gə́, aa dá sɔɔ̀n də gə́, boò tabə̀ nagə̀l bəŋ gàálú, bít pà' boò lɛ́'ù nwuu gbà'á rú. 43 Dáà nɛɛ̀n ámbə̀ páanì invaksə́ rú gə́, və̀d ǹ lɛ́'ù kúnú. Aa dá sɔɔ̀n də gə́, m̀ pìì gɔ̀ŋsə́ aa bɛ́d bə gá rə rú kə̀ nɛɛ̀n nə́ŋ̀ní, kə̀ piìnmbə̀ kə̀ nɛɛ̀n iira laa aa fə́' bə gá rə rú gə́ roó. [ 44 ‹Zɔ̀ŋ aa yɛbsə́ bəd tə́ bə̀ diìn líìnmbə̀ bə sɛŋ gə́ kóólé, bít laa kɔ̀ fə́' bə gá rə ba›] 45 Dáà dun ń páanì invaksə́ rú gə́, və̀d ǹ lɛ́'ù kúnú. Aa dá sɔɔ̀n də gə́, m̀ pìì Vɛnɛ́b gààrú kə̀ dun nə́ŋ̀ní, kə̀ piìnmbə̀ laa aa fə́' bə gá rə rú kə̀ dun iirə gə́ roó. [ 46 ‹Zɔ̀ŋ aa yɛbsə́ bəd tə́ bə̀ diìn líìnmbə̀ bə sɛŋ gə́ kóólé, bít laa aa fə́' bə̀ gá rə rú.›] 47 Dáà núùwà ń nə́ŋ̀ záá páanì invaksə́ rú gə́, sɔ̀d ǹ lɛ́'ù kúnú. Aa dá sɔɔ̀n də gə́, m̀ pìì Vɛnɛ́b gààrú kə̀ núù nə́ŋ̀ní, kə̀ piìnmbə̀ laa aa fə́' bə gá rə rú kə̀ núù iirə gə́ roó. 48 Zɔ̀ŋ aa Yɛbsə́ bəd tə́ bə̀ diìn líìnmbə̀ bə sɛŋ gə́ kóólé, bít laa fə́' bə gá rə ba. 49 Kóó màn déè, laa dáù láàm kìínmbə̀ nwuùm yɛ́b aa bə̀ páá nwɔgə̀ rú rə kíin. 50 «Nwuùm yɛ́b gə́, insɔ̀ɔ̀ná. Zá dáà nwuùm yɛ́b bɔ̀' bùmkè oòì gə́, ééleè íí dáù taà báàn bí'ǹmbə̀ bùmkè sɔ̀ŋ gú? Íí bán gá? Ìì kùm kə̀ nwuùm yɛ́b aí sisú, bít ìì kùm kə̀ tɛ́m tɛbə̀ aí tə́ŋú.» |
Nouveau Testament en Samba Leko © Alliance Biblique du Cameroun, 1998.
Bible Society of Cameroon