Markus 1 - Núúboòd Gú'dúgke Puu Sambə́ Nwɔŋú bìá

Yohana nɛ́d baptisma bə̀ piìn ùd nɛ́b bəd Vɛnɛ́b nwɔŋá

¹ Aa yée sɔ̀dke Nwɔŋ Puu Sɔ̀ɔ̀nkè bə̀ aa bə̀ bàà Vɛnɛ́b Wàà Yéésù Krístù yílú roó.

² Nwɔŋ aa yée sɔ̀d kə̀ nɛɛ̀n aa Vɛnɛ́b gbantumsə̀ Esaya bád oò núúboòrú rə kíin: «Máára mə́ Vɛnɛ́b da, ‹mə́ tùm gbantumsə̀ mə́ tə́ ám númú, dá n kpaŋ̀ kuràá.›

³ Nɛ́ŋə̀ nə́ŋ̀ páá kpə̀ə́ǹ tə́ fɔ̀gú, bàà tə́: ‹Làm ìì kùd Báátììkpɛ̀ŋ kpaŋ̀á. Ìì mà'ù kpaŋ̀ bəd kíìn wɔ̀ɔ̀lə̀ sɔ̀ɔ̀nkè!› »

⁴ Kə̀ aakíin, Yohana yaà ì' yíl oò fɔ̀gú, pii nɛ́b bəd baptisma, bít dɛ̀d nɛ́b bəd nwɔŋá, bàà: «Ìì pɛ́n tɛ́má, ìì sɔ̀g kúnú, ìì kè' boò pii ii baptisma sɔ̀gke bìá. Bít kə̀ aakíin də, Vɛnɛ́b dá ii invaksə́ íí bəd kíìn lo'ǹ daanàá.»

⁵ Nɛ́b zùúm bəraa bə̀ vúgə́là Yahudiya yɛ́b ba kə̀ Urusalima bìlú rə gə́ kóólé, bə̀ yaà Yohana sunú. Bàà bə̀ vúŋ invaksə́ boò bəd nɛ́b bəd númú. Yohana pii bə̀ baptisma sɔ̀gke bə̀ Urdun nwuurú.

⁶ Yohana páá sáá gɔ̀' aa bə̀ kùd kə̀ gɛloba gí' roó, bít tab və̀d si' kə̀ gɔ̀g kúlá. Líí sáá sii bərá, bít kə̀ núúd fɔ̀gú bìá.

⁷ Bàà nɛ́b zùúm bəraa bə̀ yaà oò səǹ də: «Nɛ́ŋə̀ nə́ŋ̀ dáà yaànà máá bòórú, oòra kàn mə́ sə̀n kə̀ gbà'á. Mə́ də́ŋ əbm̀bə̀, bít oò bə̀ tábə́ kaasə́ biìnmbə̀ dunú sé.

⁸ Máá gə́, mə́ pii ii baptisma kə̀ wəl dìíŋ̀á, zá oò gə́, dá ii baptisma piìn kə̀ Nwul Gìdńná.»

Nɛɛ̀n aa Yohana pii nɛ́b bəd baptisma rú roó, bít zááke Yéésù bìá

⁹ Sɛŋ aarə ba, Yéésù zá'à Nazaratu bìlú, Galili yɛ́b ba, yaà Yohana sunú, bít Yohana piiù baptisma sɔ̀gke bə̀ Urdun nwuurú.

¹⁰ Sɛŋ aa Yéésù tə́ vúgǹ wəlú rə, bé' lɛg ked yàá, bít Nwul Gìdń símà oò yílú, kìínmbə̀ mìrə̀ gə́blə̀ kíni.

¹¹ Bít kìì pə̀gə̀lib nə́ŋ̀ vúgà lɛgə́ poú, bàà: «Ámda ń kùmsə̀n Wàà mə́ra, mə́ í' n tə́ gbàákù, mə́ zíg tɛ́m làmkè mə́ kóólé tə́ ám ba.»

¹² Záàn zɔ̀gɔ̀ gə́, Nwul Gìdń pà' àà Yéésù fɔ̀gú.

¹³ Yéésù kùm fɔ̀gú sɛŋ laa iira, kə̀ gɔ̀g fɔ̀gúbə̀ bəd tá. Sɛŋ aa tə́ fɔ̀gú rə, Satan də́' ɛ̀gə̀ kúnú. Bòórú gə́, malaika yaà oò sunú, bít yaà mà'ù tùsá.

Yéésù dɛ̀d nɛ́b díb bə̀ kodǹ bəd naara

¹⁴ Bòórú kò' ìì páá Yohana wúltígə́l bə̀ rú yée gə́, Yéésù ɛ̀m yaà Galili yɛ́b ba, bàà bə̀ Nwɔŋ Puu Sɔ̀ɔ̀nkè aa vúgà Vɛnɛ́b naà roó.

¹⁵ Bàà: «Sɛŋ wə́ə́ yàá, Vɛnɛ́b Gààd gbaràì aí sunú. Ìì sɔ̀g kúnú, bít ìì kè' Nwɔŋ Puu Sɔ̀ɔ̀nkèá!»

¹⁶ Zɔ̀ŋ aa Yéésù bàg kpaŋ̀ Galili wəl nyìgə̀l kàd bə gə́, bé' nɛ́b díb bə̀ kodǹ bəd iira. Simon kə̀ kudvɛɛ̀l oò Andre tá, bə̀ tə́ lìbə̀ gúdǹ wəl nyìgə̀lú. Kàandə, bə̀ nɛ́b díb bə̀ kodǹ bərá.

¹⁷ Yéésù bàà bə̀: «Ìì bàg máára, má ii ma'ǹ íí dá kuùm nɛ́b nɛ́b bəd bə̀ dɛdǹ wáàlǹná.»

¹⁸ Kə̀ nwɔŋ aa nuù yée kíinní, zá' bə̀ dàà lìbə̀ boò bərá, bít bə̀ bàgə̀ kúnú.

¹⁹ Ɛ̀m dáá númú zɔ̀gɔ̀ gə́, bé' Zebede yɛb bərá. Yakuba kə̀ kudvɛɛ̀l oò Yohana tá, bə̀ kùm boò kə̀ə̀rú, bə̀ tə́ lìbə̀ boò bəd dúgúlàá.

²⁰ Kə̀ nwɔŋ aa nuù yée kíinní, Yéésù dɛ̀d bà kúnú. Zá' bə̀ dàà báá boò Zebede kə̀ nɛ́b tù' bə̀ ma'ǹ oò bəd tá, bít bə̀ bàg Yéésù ra.

Nɛ́ŋ váàndo aa nwul vaksə́ nə́ŋ̀ kò'ù roó

²¹ Yéésù kə̀ nɛ́b sáànmbə̀ oò bəd tá, bə̀ ɛ̀m Kapɛrnaum bìlú. Yéésù pìì Yahudu bəd wúlwáàlbə̀ rú, nyàm nyi'ǹmbə̀ ba, bít sán nɛ́b bəd iná.

²² Nɛ́b bəd kóólé, in aa Yéésù sán bə̀ rə, kò' bə̀ yíl yàá. Kàandə, sán bə̀ in kìínmbə̀ nɛ̀n indaŋ̀mbə̀ boò bəd də kíin sé. Zá gám ì' bə̀ nwɔŋ kə̀ kpɛŋsɛ́lá.

²³ Sɛŋ aarə bə ní, nɛ́ŋ váàndo nə́ŋ̀ kə̀ nwul vaksə́ naú, kùm Yahudu bəd wúlwáàlbə̀ rú wərə̀ kɔ̀. Páá kpə̀ə́ǹá, bàà:

²⁴ «Ùwí, Yéésù Nazaratu bìlú bìá, ń í' bə́ níì ma'ǹmbə̀ gú? Ń yaà báà bɔ̀'ǹmbèì? Mə́ gàb m yàá' Ń kùmsə̀n Nɛ́ŋə̀ Gìdń aa Vɛnɛ́b tùmà roó!»

²⁵ Yéésù pél nwul vaksə́ rə nwɔŋá, bít bààù: «Ǹ tɛb tɛ́ba, bít ǹ vúg kíìn nɛ́ŋ váàndo aa sisú!»

²⁶ Nwul vaksə́ zìgə̀d nɛ́ŋ váàndo aarə kə̀ kpɛŋsɛ́lá, bít tə́ vúgǹ gə́, páá kpə̀ə́ǹ gbàákù.

²⁷ Boò kóólé, də́dǹ mà' bə̀ì gbàákù. Bít bə̀ dɛ̀d ɔ̀dnə́ŋ̀ bəd boò bòdba: «Aarə níì gú? Kpɛŋsɛ́l aarə bɔ̀bà bá, sán taà kə̀ nɛ́b bəd in kàan gú? Nwul vaksə́ bəd máá, gám bə̀ nwɔŋ kə̀ kpɛŋsɛ́lá, bít bə̀ ləəù yàá.»

²⁸ Yéésù nwɔŋ sa' kə̀ báŋ báŋ, Galili yɛ́b bə kóólé.

Yéésù gáŋ nɛ́b mad bə̀ bəd zùúm sisá

²⁹ Yéésù vúg Yahudu bəd wúlwáàlbə̀ rú gə́, zá' ɛ̀m bəní ligə̀ aa Simon kə̀ Andre tá bə̀ ləə rú rə rú. Yakuba kə̀ Yohana tá, láŋ bə̀ ààù ba.

³⁰ Simon gúùn kéèn ləə yɛ́b ba, kàdǹ mà'ù kúnú. Zɔ̀ŋ aa Yéésù yaà wə́ə́ gə́, bə̀ bààù mad oòrə nwɔŋá.

³¹ Yéésù gbarà oò sunú, kò'ù nɛɛ̀n ba, pà' zá'ù lɛgú. Sɛŋ də bə ní, kàdǹ dààù yàá, bít zá' mà' bə̀ inlíìnmbìá.

³² Zɔ̀ŋ aa nyàmbídń, nyàm yaà pìì yée gə́, nɛ́b bəd pú' bə̀ àà nɛ́b mad bə̀ bəd kóólé Yéésù sunú, kə̀ nɛ́b aa bə̀ kə̀ nwul vaksə́ bəd naà rə tá.

³³ Nɛ́b bìlú bə̀ bəd kóólé, yaà bə̀ wál ligə̀ aa Yéésù sím dú rə walú.

³⁴ Yéésù gáŋ nɛ́b mad bə̀ zùúm bəraa bə̀ kə̀ mad luùm gɔ̀ŋ gɔ̀ŋ bəd naà roó. Bít nìŋ vúŋ nwul vaksə́ bəd zùúm nɛ́b bəd sisú. Dàŋ nwul vaksə́ bəd nwɔŋ kíìn gáàmbìá. Kàandə, nwul vaksə́ bəd bə̀ gàbə̀wà yàá.

Yéésù ɛ̀m Vɛnɛ́b nwɔŋ baànmbə̀ Galili yɛ́b ba

³⁵ Nwúun ba, sɛŋ aa bə́ŋ̀ tə́ tígə́l ní rə, Yéésù lɛ́m ləəmú gə́, zá' lɛgú, bít vúg ɛ̀m fɔ̀gú, zɔ̀ŋ mɛdkè rú, dá nyɛ̀m Vɛnɛ́bá.

³⁶ Simon kə̀ nɛ́b bəraa bə̀ ɛ̀mà kə̀ oò tə́ rə tá, bə̀ pìì Yéésù saànmbìá.

³⁷ Bít zɔ̀ŋ aa ìì bɔ̀bə̀ gə́, ìì bààù: «Nɛ́b bəd kóólé, bə̀ tə́ ám saanàá.»

³⁸ Kè' í' bə̀, bàà: «Báà ɛɛ̀m bìl kam bərú, bɔ̀b dá máà bàà nɛ́b bəd Vɛnɛ́b nwɔŋ wərə̀ kɔ̀. Kə̀ taàbìá, mə́ yaà taà zɔ̀ŋə yɛ́b ba.»

³⁹ Bít zá' ɛ̀m dá gəə̀l Galili yɛ́b bə kóólé, bàà Vɛnɛ́b nwɔŋ Yahudu bəd wúlwáàlbə̀ rú, bít nìŋ vúŋ nwul vaksə́ bəd nɛ́b bəd sisú.

Yéésù gáŋ gərə́ váàn sisá

⁴⁰ Nyàm nə́ŋ̀ kàani, nɛ́ŋə̀ nə́ŋ̀ gərə́ kò'ù kúnú, yaà oò sunú, bít pí' kə̀ dunlígə̀d oò númú, nyɛ̀mə̀ kə̀ pə̀gə̀lib ɔ̀gkeá, bààù: «Dáà ń í'ì gə́, ń dá mə́ kíìn báàn si' nyɛ́'ǹmbìá.»

⁴¹ Yéésù búúd mà'ù gə́, nàb nɛɛ̀n pigə̀ kúnú, bít bàà: «Mə́ í' yàá, si' ń oò nyɛd kúnú!»

⁴² Bít kə̀ nwɔŋ aa nuù yée kíinní, gərə́ oò yɛd yàá.

^43-44 Yéésù tɔ̀gə̀ sɔ̀ɔ̀nkè, bààù: «In aa taà yérə, m̀ bàà nɛ́ŋə̀ nə́ŋ̀má sí. Zá dá ǹ ì' si' ń nɛ́d láŋsə́ bə̀ ma'ǹ númú, nɛɛ̀n aa ń kùm dú roó, bít m̀ pii in tɛdńní bə̀ si' bə̀ nyɛ́'ǹ aa Musa bàà dàà boò pii roó. Aarə bɔbm̀ sedako ma'ǹmbə̀ nɛ́b bəd kóólé númú. Yéésù bàà nɛ́ŋ váàndo rə oò ɛ̀m kúnú.»

⁴⁵ Zá nɛ́ŋ váàndo aarə zá' ɛ̀m gə́, dá dìì nɛ́b bəd nwɔŋ puu aarə udǹmbìá. Kə̀ taàbìá, Yéésù bɔ̀b taà piìnmbə̀ bìlə́ sé. Dìì bìl bòórú, fɔ̀gú, zɔ̀ŋ mɛdkè rú. Nɛ́b bəd gùm bə̀ vúgə́là kàd gə́ kóólé, bə̀ yaà oò sunú.