Kolosia 4 - Núúboòd Gú'dúgke Puu Sambə́ Nwɔŋú bìá

¹ Nɛ̀n bərá, ìì kò' kɔ̀' íí bəd kə̀ tɛ́m sɔ̀ɔ̀ná, bít kə̀ wɔ̀ɔ̀làá. Sèl ìì gàb kúnú, aí kɔ̀ íí tə́ kə̀ nɛ̀n gbà'á naà lɛgə́ poú.

Nwɔŋ tumkéá

² Ìì dìì Vɛnɛ́b nyɛɛ̀mbə̀ kə̀ tɛ́m vɛ́nà bìá. Kùm ìì nwán kə̀ Vɛnɛ́b mɔ̀'ǹmbìá. Ìì ləə ləəm sí.

³ Bít ìì nyɛ̀m Vɛnɛ́b obə́ yílə́ kɔ̀, bɔ̀b Vɛnɛ́b oò pii bə́ kpaŋ̀ sɔ̀ɔ̀n, bɔbm̀ baànmbə̀ nwɔŋ oò bìá, baànmbə̀ inmə́'ke Krístù bìá. Kə̀ aakíin də, inmə́'ke bəraa rə bòórú, bə́ŋyée mə́ tə́ taà wúltígə́l bə̀ rú.

⁴ Ìì nyɛ̀m Vɛnɛ́b, bɔ̀b bàà máà nyɛ́' inmə́'ke aa roó, kìínmbə̀ nɛɛ̀n aa máá ma'ǹ dú rə kíin.

⁵ Ìì kùm kə̀ ingabké kə̀ nɛ́b aa bə̀ bàg Vɛnɛ́b síndoó, kə̀ ma'ǹmbə̀ insɔ̀ɔ̀nkèá, kóó sɛŋ déè, sɛŋ aa ń sáŋì kə̀ nɛ́b aa bə̀ bàg Vɛnɛ́b síndoó.

⁶ Nwɔŋ íí oò kùm sɛŋ gə́ kóólé sɔ̀ɔ̀nkèá, bít oò sɔ̀ɔ̀n nɛ́b bəd kíìn kiìnmbìá. Ìì gàb nɛɛ̀n aa kè' íí dá kóó nɛ́ɛ̀réè nwɔŋ í'ǹ dú kə̀ sɔ̀ɔ̀nkè rə kúnú.

Dɔ̀msɛ̀l aa dùg kə̀ bòd doó

⁷ Ɔ̀dkudvɛɛ̀l bə́n í'sɛ̀lbə̀ Tikikus, nɛ́ŋə̀ aa tə́ mə́ láŋ̀ bə kə̀ tù' sɔ̀ɔ̀nkè ma'ǹmbə̀ Báátììkpɛ̀ŋ tùsú rə, dá ii nwɔŋ bəraa máá yílə́ rə gə́ kóólé kíìn baanàá, bɔ̀b ìì gàb nɛɛ̀n aa mə́ kùm dú roó.

⁸ Mə́ tə́ù tuùm aí sunú, bɔ̀b dáá oò bàà ii nɛɛ̀n aa bá ii váàndo bídǹ piìn dú íí tɛ́mú roó.

⁹ Onezimus láŋ ààùwà sùnú, ɔ̀dkudvɛɛ̀l bə́n í'sɛ̀l bìá, bít nɛ́d tù' bə̀ ma'ǹ sɔ̀ɔ̀ná, vúgà aí tə́ŋú. Oòra dá ii sə̀n in bəraa tə́ taàn zɔ̀ŋə də kóólé baanàá.

¹⁰ Aristarkus aa wúltígə́l bə̀ rú kə̀ máá tə́ rə, tùm piiiyà dɔ̀msɛ̀l oò bə̀ yàá. Markus kɔ̀ tùm piiiyà dɔ̀msɛ̀l oò bə̀ yàá. Markus də, Barnabas wàà lɛbm̀má. (Íí bɔ̀b insánke aa Markus yílə́ rə yàá. Yaaì aí səǹ gə́, ìì kè'ù kə̀ tɛ́m làmkèá.)

¹¹ Yéésù aa bə̀ dɛ̀rə̀ Yustus də, dɔ̀mi yàì kɔ̀. Nɛ́b aa boò toorə yée, bə̀ kùmsə̀n Yahudu bərá. Bə̀ mà' tù' tə́ kə̀ máá tə́ Vɛnɛ́b gààrú. Boòra bə̀ tə́ mə́ sə̀n tɛ́m tɛ́'nàá.

¹² Epafras dɔ̀mi yàá. Oòrə, nɛ́ŋə̀ aí kàrə́ bìá. Yéésù Krístù nɛ́ŋə̀ tù' bə̀ ma'ǹ aarə, kpɛd Vɛnɛ́b nyɛɛ̀mbə̀ aí yílə́ sé, bɔ̀b ìì kùm və̀'kèá, ìì dòò nwulú, bít ìì kùm nyɛdkèá, nwáànmbə̀ in aa Vɛnɛ́b í' rə gə́ kóólé ma'ǹ bɛ́'ǹmbìá.

¹³ Máá ii kíìn báàn nwɔŋ oò yílə́ bə̀ baànmbìá. Pii kpɛŋsɛ́l oò tə́ gbàákù aí bòórú, nɛ́b aa ləə Laodikiya bìlə́ rə bòórú, bít nɛ́b aa Hirapolia bìlə́ rə bòórú.

¹⁴ Luka, ɔ̀dzéd bə́n aa dɔ̀gta rə, dɔ̀mi yàá. Demas kɔ̀ dɔ̀mi yàá.

¹⁵ Ìì dɔ̀m ɔ̀dkudvɛɛ̀l bə́n bəraa Laodikiya bìlə́ roó, aa bəraa Nimfa roó, bít kə̀ Eklisiya bəraa bə̀ tə́ wáàl oò yiìl loó.

¹⁶ Màìgə́, íí gád núúboòraa rəì gə́, ìì sàà kpaŋ̀, bɔ̀b dá boò gád Eklisiya bəraa Laodikiya bìlə́ rə tə́ŋə́ kɔ̀. Bít kə̀ yíl aí bìá, ìì gád núúboòraa tùm bə̀ dááiyà piìnnà Laodikiya bìlə́ rə kúnú.

¹⁷ Ìì bàà Arkipus: «Oò nɔ̀ŋ kíìn Báátììkpɛ̀ŋ tùsaa pii bə̀ dààù rə ma'ǹ bɛ́'ǹmbìá.»

¹⁸ Máára mə́ Pol la, bád mə́ tə́ ii sə̀n dɔ̀ɔ̀m kə̀ yíl mə́ra. Yid ìì bɔ̀m mə́ tə́ wúltígə́l bə̀ rú sí. Mə́ nyɛ̀m pə̀dkè Vɛnɛ́b bə̀ oò kùm kə̀ aí tá.