Galatiya 6 - Núúboòd Gú'dúgke Puu Sambə́ Nwɔŋú bìá

Láŋ ìì pà' ɔ̀dnə́ŋ̀ inpi'kè bəd íí bòdba

¹ Ɔ̀dkudvɛɛ̀l mə́ í'sɛ̀lbə̀ bərá, nìb íí bɔ̀b nɛ́ŋə̀ nə́ŋ̀ tə́ invaksə́ ma'ǹ gə́, nɛ́b aa íí kə̀ Vɛnɛ́b Nwul naà rə, pà' ìì bí'ùwà kpaŋ̀ wɔ̀ɔ̀lə̀ rú, ìì gámə̀ nwɔŋ kə̀ tɛ́m ɔ̀gkeá. Bít mə́ tə́ kóó nɛ́ɛ̀réè, aí tə́ŋú, nwɔŋ baàn zəgàá' ǹ nwán yíl ń da, bɔ̀b ám kɔ̀ ǹ dàà yíl ń nɛ́b bəd boò záá n sí.

² Láŋ ìì pà' ɔ̀dnə́ŋ̀ inpi'kè bəd íí bòdba. Kə̀ aakíin, íí dá taà Krístù indaŋ̀mbə̀ aa bàà rə ma'ǹ zə́'nàá.

³ Kàandə, dáà nɛ́ŋə̀ nə́ŋ̀ zíg yíl oòì bəǹ nɛ́ŋ gbàároá, bít tə́ nɛ́ŋə̀ tɛdń gə́, aarə zá' yíl oò tə́ kə̀ yíl oò bə̀ ní.

⁴ Zá kóó nɛ́ɛ̀réè, oò ɛ̀g tù' oòra. Tù' oòrə sɔ̀ɔ̀nì gə́, dá tɛ́m làmkè kiìn kə̀ yíl oò bə̀ ní, bít oò də́' tù' oòrə, kə̀ nɛ́ŋə̀ nə́ŋ̀ gɔ̀ŋ bə̀ sí.

⁵ Kàandə, kóó nɛ́ɛ̀réè, oò pà' inpi'kè oò kə̀ yíl oò bə̀ ní.

⁶ Màn aa bə̀ tə́ù Nwɔŋ Puu Sɔ̀ɔ̀nkè sáàn də, pɛ̀d oò gàb insɔ̀ɔ̀nkè bəraa kə̀ naà rə, kə̀ màn aa tə́ù in sáàn doó.

⁷ Ìì zá' yíl íí sí' Nɛ́ŋə̀ lòò bí' Vɛnɛ́b kèéd kɔ̀ gá. Kóó nɛ́ɛ̀réè, in aa wùù rə dá taà kɛràá.

⁸ Wùù tə́ in aa tɛ́m oò í' rə gə́, dá val bɔbàá; zá wùù tə́ in aa Nwul Gìdń í' rə gə́, Nwul Gìdń dáù ma'ǹ dá gɔ̀ŋsə́ aa bɛ́d bə gá rə bɔbàá.

⁹ Báà daàn sɔ̀ɔ̀nkè ma'ǹmbə̀ sí; kə̀ aakíin də, bə́n ma'ǹ murə̀ síngə́, báan insɔ̀ɔ̀n kɛràá, sɛŋ yaà wə́ə́ì gə́ roó.

¹⁰ Kə̀ aakíin də, bə́n bɔbm̀ kpaŋì gə́, báà ma'ǹ nɛ́b bəd kóólé sɔ̀ɔ̀nkèá, bít mà' báà pɛdǹ sɔ̀ɔ̀nkè rə Krístù nɛ́b bərá.

Tɔ̀gkeá kə̀ dɔ̀msɛ̀l bəraa dùg kə̀ bòd doó

¹¹ Ìì ɛ̀g nwɔŋ gbàád bəraa yóo' mə́ bári sə̀n kə̀ nɛɛ̀n tɛ́m máá bìá.

¹² Boò rə, bə̀ sàà sɔɔ̀nmbə̀ nɛ́b bəd núùrú; boò ra bə̀ tə́ ii sə̀n pe'ǹ kə̀ kpɛŋsɛ́lá, bɔ̀b ìì nàà gàbá. Zá bə̀ mà' kə̀ aakíin də, bɔ̀b boò í' bənə́ búúd Krístù téélɛŋké nwɔŋ bòórú sí.

¹³ Kàandə, nɛ́b aa bə̀ tə́ gàb naàn yérə máá, bə̀ kò' indaŋ̀mbə̀ sé. Bə̀ í' ìì nàà gàb də, bɔ̀b kùlə́ ma'ǹmbə̀ aí bòórú.

¹⁴ Zá máá gə́, máá kùlə́ ma'ǹ Báá bə́n Tììkpɛ̀ŋ Yéésù Krístù téélɛŋké bòórú. Kə̀ aakíin də, kə̀ Krístù téélɛŋkéá, invaksə́ bəraa zɔ̀ŋə yɛ́b bərə, bə̀ val máá bòórú, bít máá kɔ̀ val kò' mə́ invaksə́ bəraa zɔ̀ŋə yɛ́b bərə bòórú.

¹⁵ Kuùmbə̀ nɛ́ŋə̀ aa nàà gàb doó, sínkɔ̀ nɛ́ŋə̀ aa nàà gàb síndə gə́, kə̀ pɛ̀sə́ naà sé' in aa kə̀ pɛ̀sə́ naà rə, kuùmbə̀ nɛ́ŋə̀ aa bə̀ sééù puu roó.

¹⁶ Nɛ́b aa bə̀ tə́ insánke aa bagǹ boò gɔ̀ŋsə́ rú rə gə́ kóólé, mə́ nyɛ̀m Vɛnɛ́b oò pii bə̀ tɛbàá, bít oò mà' bə̀ pə̀dkèá. Boò ra bə̀ kùmsə̀n Vɛnɛ́b nɛ́b Israila bə̀ bərá.

¹⁷ Zɔ̀ŋə númú gə́, nɛ́ŋə̀ nə́ŋ̀má oò vɔ̀gə̀l mə́ sí. Kə̀ aakíin də, núgúl lèm bəraa mə́ pà' máá sisú yérə, ì' gə́, mə́ Yéésù Krístù kɔ̀'váàná.

¹⁸ Ɔ̀dkudvɛɛ̀l mə́ í'sɛ̀lbə̀ bərá, mə́ nyɛ̀m pə̀dkè Báá bə́n Tììkpɛ̀ŋ Yéésù Krístù bə̀ oò kùm kə̀ aí tá, íí kóólé. Oò kùm kàani.