Galatiya 3 - Núúboòd Gú'dúgke Puu Sambə́ Nwɔŋú bìá

Indaŋ̀mbìá, sínkɔ̀ tɛ́mbagkéá

¹ Íí nɛ́b Galatiya yɛ́b bə bə̀ bəraa íí kə̀ yílə naà sín yóo! Nɛ́ŋə̀ déè zóóiyà sə̀n gú? Bàà mə́ ì' iiyà yàá nyɛdkè dág, nɛɛ̀n aa bə̀ bágà Krístù rú, téélɛŋké bəroó.

² Mə́ í' kè' ìì í' nwɔŋ aa máá ii dɛdǹ nə́ŋ̀ní tə́ŋtə́ŋ yóo' Íí bɔ̀bà Nwul Gìdń Vɛnɛ́b bə̀ rə, kə̀ ma'ǹ bɛ́'ǹmbə̀ nwɔŋ aa indaŋ̀mbə̀ bàà reè, sínkɔ̀ kə̀ Nwɔŋ Puu Sɔ̀ɔ̀nkè aa íí kìì, bít íí bàg deè?

³ Ééleè íí dá taà báàn kuùmbə̀, kìínmbə̀ nɛ́b aa kə̀ yílə naà síndə kíin gú? Íí sɔ̀rà kə̀ Nwul Gìdń Vɛnɛ́b bìá, bə́ŋyée gə́, íí í' yaàn bɛ́'ǹmbə̀ kə̀ kpɛŋsɛ́l aí bèì?

⁴ In zùúm bəraa íí mà' nyà'aa yérə, in tɛdńnì? Vɛ́nà, in bəraa íí mà' yérə, in tɛdń gá.

⁵ Sɛŋ aa Vɛnɛ́b piiiyà Nwul Gìdń oòra, bít mà' inwulubə̀ bəd aí tə́ŋə́ rə, kə̀ ma'ǹ bɛ́'ǹmbə̀ nwɔŋ aa indaŋ̀mbə̀ bàà reè, sínkɔ̀ kə̀ Nwɔŋ Puu Sɔ̀ɔ̀nkè aa íí kìì, bít íí bàg deè?

⁶ Kə̀ aakíin, Núúboòd Gìdń bàà taà Abraham yílú: «Abraham bàg Vɛnɛ́bá, Vɛnɛ́b gárə̀ taà kìínmbə̀ nɛ́ŋə̀ wɔ̀ɔ̀lə̀ kíin oò númú, kə̀ tɛ́mbagké oòra.»

⁷ Ogə́ ìì gàb kúnú, nɛ́b aa bə̀ kə̀ tɛ́mbagké naà rə, boò ra ìì kùmsə̀n Abraham yɛb vɛ́nà.

⁸ Kə̀ aakíin də, Núúboòd Gìdń gbád bàà nyàamdoorú gə́, Vɛnɛ́b dá nɛ́b aa bə̀ bàgə̀ síndə bí'ǹ nɛ́b wɔ̀ɔ̀lə̀ bəd oò númú, tɛ́mbagké boò boò rú. Kə̀ taàbìá, gbád bàà taà Abraham Nwɔŋ Puu Sɔ̀ɔ̀nkè aa yóo: «Ám bòórú, Vɛnɛ́b dá taà nɛ́b kun bəraa zɔ̀ŋə yɛ́b bərə kóólé, nɛɛ̀n zígǹ yílú.»

⁹ Abraham bàg Vɛnɛ́b yàá, bít oò kɔ̀ zígə̀ nɛɛ̀n yílú. Kə̀ aakíin də, nɛ́b aa bə̀ bàg Vɛnɛ́b də gə́ kóólé, dá bə̀ nɛɛ̀n zígǹ yílú, kìínmbə̀ zíg Abraham nɛɛ̀n yílə́ rə kíni.

¹⁰ Zá nɛ́b aa bə̀ zíg tɛ́m indaŋ̀mbə̀ ləə̀nmbə̀ nwɔŋ bərə gə́ kóólé, Vɛnɛ́b nwɔŋyɛɛ̀l tə́ boò yílú. Vɛ́nà, Núúboòd Gìdń bàà: «Nwɔŋ yɛɛ̀l tə́ màn aa dìì nwɔŋ aa bə̀ bád indaŋ̀mbə̀ núúboòrú rə, ma'ǹ zə́'ǹmbə̀ síndə yílú.»

¹¹ Vɛ́nà gə́, tə́ nyɛdkèá, nɛ́ŋə̀ nə́ŋ̀má bán kuùmbə̀ wɔ̀ɔ̀lə̀ Vɛnɛ́b númú kə̀ indaŋ̀mbə̀ gá. Kàandə, Núúboòd Gìdń bàà: «Màn aa Vɛnɛ́b bàà yàá oò tə́ wɔ̀ɔ̀lə̀ kə̀ tɛ́mbagké rə, dá kùm kə̀ gɔ̀ŋsá.»

¹² In nə́ŋ̀má wál indaŋ̀mbə̀ kə̀ tɛ́mbagké sé. Zá kìínmbə̀ núúboòd bàà rə kíin: «Màn aa mà' indaŋ̀mbə̀ bəd kə̀ tù' rə, dá gɔ̀ŋsə́ bɔbm̀ kə̀ boò ra.»

¹³ Nɛɛ̀n aa Krístù bíl in nwɔŋyɛɛ̀l bə̀ obə́n zɔ̀ŋ bə yée bòórú, káákè' bə́n taà indaŋ̀mbə̀ nwɔŋyɛɛ̀lú. Kàandə, Núúboòd Gìdń bàà: «Nɛ́ŋə̀ aa zìb lò' bə̀ tabə̀ téé bərə, nwɔŋyɛɛ̀l tə́ oò yílú.»

¹⁴ Kə̀ aarə kíin, Krístù káákè' bə́n də, bɔ̀b insɔ̀ɔ̀nkè bəraa Vɛnɛ́b bàà dàà bəǹ dá Abraham piìn də, oò pii nɛ́b aa bə̀ bàgə̀ síndə kɔ̀, kə̀ wálke boò kə̀ Yéésù Krístù ra, bɔ̀b bə́ nɛ́b bagké bəd kɔ̀, tɛ́mbagké boò rú, báà bɔ̀b Nwul Gìdń aa Vɛnɛ́b bàà dàà rə kɔ̀.

Indaŋ̀mbìá, kə̀ nwɔŋ baàn daànmbìá

¹⁵ Ɔ̀dkudvɛɛ̀l í'sɛ̀lbə̀ bərá, nwɔŋ aa mə́ í' ii baànmbə̀ rə, də́' máá ii i'ǹ kə̀ nɛɛ̀n aa bə́n tə́ən kuùm dú bə́ŋyée roó' Dáà nɛ́ŋə̀ nə́ŋ̀ bàà dàà nwɔŋì, Sedako bəd númú sɔ̀ɔ̀nkè gə́, nɛ́ŋə̀ nə́ŋ̀má bán nwɔŋ aarə biìnmbə̀ gá, sínkɔ̀ in nə́ŋ̀ ɔ̀d zəgǹmbə̀ bə gá.

¹⁶ Zá kìì ìì kùd nwɔŋ aa yée kíìn sɔ̀ɔ̀nkè, Vɛnɛ́b bàà dàà nwɔŋ oò bəd Abraham da, bít wàà kàá oòra. Vɛnɛ́b gə́, baànmbə̀: «Bít kə̀ yɛb kàá oò bəraa», oò núúboòd gìdńnú, kìínmbə̀ bàà tə́ kə̀ nɛ́b zùúm kíin də, bàà sé. Zá núúboòd gìdń bàà: «Ń kə̀ wàà kàá ń da.» Aarə gám nwɔŋ aarə kə̀ nɛ́ŋə̀ nə́ŋ̀ní tə́ŋtə́ŋ, Krístù ra.

¹⁷ Aa yée nwɔŋ aa mə́ í' ii baànmbə̀ roó' Vɛnɛ́b bàà dàà nwɔŋá, bít bàà bəǹ dá nwɔŋ aarə kíìn ko'ǹ kuràá. Indaŋ̀mbə̀ aa yaà vúg, zèd laa núnà zɔ̀ŋ naara kə̀ zèd laa nə́ŋ̀ zè kób taà sína yérə, bán gú'saa Vɛnɛ́b dúg də biìnmbə̀, bít lo'ǹmbə̀ nwɔŋ aa Vɛnɛ́b bàà dàà rə gá.

¹⁸ Kàandə, dáà kə̀ indaŋ̀mbìá, bə́n bɔbm̀ tə́ taà Vɛnɛ́b pə̀dkè aa kìínmbə̀ valligə̀ kíin də gə́, ogə́ bə́n bɔbm̀ pə̀dkè aarə nwɔŋ aa Vɛnɛ́b bàà dàà rə bòórú gá. Zá kə̀ nwɔŋ aa Vɛnɛ́b bàà dàà roó, piià taà Abraham pə̀dkè aarə tɛdńní.

¹⁹ Tə́ kàangə́, kə̀ níìbə̀ Vɛnɛ́b piià taà indaŋ̀mbə̀ gú? Vɛnɛ́b yaà zəg indaŋ̀mbə̀, bɔ̀b oò ì' tù' vaksə́ bəraa pɛd kə̀ in aa í' roó. Báà bagǹ Abraham wàà kàá aa Vɛnɛ́b bàà dàà nwɔŋ oò yílə́ roó, yaà oò wə́ə́ zé. Indaŋ̀mbə̀ aarə, Vɛnɛ́b pii kə̀ malaika bərá. Bít nɛ́ŋə̀ nə́ŋ̀ dìì sə̀n boò tə́ŋtəŋú, kè' àà sùnú.

²⁰ Nɛ́b bəd pɛrì iirə gə́, bə̀ sàà nɛ́ŋə̀ aa dá bə̀ nwɔŋ baàn bí'ǹ doó. Zá Vɛnɛ́b gə́, sɛŋ aa tə́ bə́nnà nwɔŋ baàn daànmbə̀ piìn də, mà' tù' kə̀ yíl oò ní, sàà nɛ́ŋə̀ nwɔŋ bə̀ baàn bí'ǹ sé.

In aa Vɛnɛ́b í' indaŋ̀mbə̀ oò mà' roó

²¹ Aarə í' tə́ baànmbə̀ indaŋ̀mbə̀ nə́' nə́gə̀d tə́ kə̀ nwɔŋ bəraa Vɛnɛ́b bàà dàà reè? Vɛ́nà, kàan gá! Dáà Vɛnɛ́b pii nɛ́b bəd indaŋ̀mbə̀ bɔ̀b oò pii nɛ́b bəd gɔ̀ŋsə́ gə́, tə́ kàangə́, nɛ́ŋə̀ dáàn báàn wɔ̀ɔ̀lə̀ bɔbm̀bə̀ Vɛnɛ́b númú, kə̀ indaŋ̀mbìá.

²² Zá Núúboòd Gìdń bàà gə́, invaksə́ ləə gààd tə́ nɛ́b aa zɔ̀ŋə yɛ́b bərə kóólé yílú; bɔ̀b in aa Vɛnɛ́b bàà dàà bəǹ dá nɛ́b bəd piìn tɛdńní rə, nɛ́ŋə̀ aa bàgə̀ rə, oò bɔ̀b kúnú, kə̀ tɛ́mbagké oò aa zíg Yéésù Krístù bəroó.

²³ Sɛŋ aa bə́ŋ̀ tɛ́mbagké sɛŋ yaà wə́ə́ sə́n də, indaŋ̀mbə̀ nwán bə́n kìínmbə̀ bə́n nɛ́b wúltígə́l bə̀ rú bə̀ kíin, yaà wə́ə́ sɛŋ aa Vɛnɛ́b yaà vúŋ tɛ́mbagké rə zé.

²⁴ Kə̀ aakíin də, indaŋ̀mbə̀ nwán bə́n sùnú, Krístù yaà wə́ə́ zé, bɔ̀b báà kuùm wɔ̀ɔ̀lə̀ Vɛnɛ́b númú, kə̀ tɛ́mbagkéá.

²⁵ Zá bə́ŋyée tɛ́mbagké sɛŋ yaà wə́ə́ yée gə́, bə́ kùm nɛ̀n aa tə́ bə́ nwáàn yérə dùù sɔ̀ŋ sé.

²⁶ Kàandə, íí nɛ́b aa íí bàg Yéésù rə gə́ kóólé, íí Vɛnɛ́b yɛbá, kə̀ wálke aí bə̀ kə̀ oòra.

²⁷ Íí kóólé, nɛ́b aa bə̀ pii ii baptisma Krístù nə́gə́lə́ rə, íí wálì kə̀ oòra, bít íí kùmì kə̀ oò kíin.

²⁸ Bə́ŋyée gə́, Vɛnɛ́b pɛ̀d Yahudu bəd kə̀ Grɛg bəd sé. Pɛ̀d kɔ̀' kə̀ nɛ́ŋə̀ aa kɔ̀' síndə sé. Pɛ̀d nɛ́ŋ váàndo kə̀ nɛ́ŋ kéèndo sé; kə̀ aakíin də, íí kóólé íí tə́ nə́ŋ̀ní, wálke íí kə̀ Yéésù Krístù ra.

²⁹ Bít íí kùm Krístù nɛ́b bəd yérə, íí kùm taà Abraham yɛb kàá kɔ̀. Bít íí dá taà in aa Vɛnɛ́b bàà dàà rə bɔbm̀ vɛ́nà, kìínmbə̀ valligə̀ kíin.