Galatiya 2 - Núúboòd Gú'dúgke Puu Sambə́ Nwɔŋú bìá

Pol kə̀ Yéésù gbantumsə̀ kambəd tá

¹ Zèd kób zè naarə taà gə́, na' mə́ bírà kíìn Urusalima bìlú, kə̀ Barnabas tá, bít pà' mə́ ɛ̀m kə̀ Titus naà kɔ̀.

² Mə́ dáá Urusalima bìlə́ rə, Vɛnɛ́b kèd mə́ sə̀n núùá, bàà mə́ gə́, máà mà' kàani. Wálke nə́ŋ̀ aa mə́ mà' kə̀ nɛ́b gbàád Eklisiya bə̀ bəd tə́ rə, ùd mə́ ì' bə̀ nɛɛ̀n aa mə́ bàà nɛ́b aa bàg Vɛnɛ́b síndə Nwɔŋ Puu Sɔ̀ɔ̀nkè rú roó. Tùsaa mə́ mà' nyàam doó, sínkɔ̀ bə́ŋyée rə, oò taà tɛdńní sí.

³ Zá ɔ̀dmàŋká mə́ Titus aa bàg Vɛnɛ́b sé, bít nàà gàb síndə gə́, bə̀ pè'ù gàb naànmbə̀ sé.

⁴ Ɔ̀dkudvɛɛ̀l gúsuúm bə̀ bəraa mə́' yaà bə̀ wál kə̀ obə́n tə́ yérə, bə̀ í' Titus gàb ná'ǹmbìá. Nɛ́b aarə, yaà bə̀ pìì obə́n gə̀bú. Bə̀ pìì kìínmbə̀ nɛ́b aa bə̀ tə́ nɛ́b bəd nwáàn pú'ǹ, bɔbm̀ ɛgǹmbə̀ nɛɛ̀n aa bə́n kuùm dú roó, bɔ̀b obə́n bə̀ álǹmbìá. Kàandə, obə́n gə́, bə́n vúgǹnì Musa indaŋ̀mbə̀ nɛɛ̀n tɛ́mú, kə̀ wálke bə́n kə̀ Krístù ra. Zá bə̀ í' bə́n bí'ǹmbə̀ Yahudu bəd indaŋ̀mbə̀ kɔ̀sá.

⁵ Nɛ́b aarə gə́, bə́ ləə bə̀ sé, bə́ pii yíl bə́ sɛŋ wàà zɔ̀gɔ̀ boò naà sé. Bə́ í' rə gə́, Nwɔŋ Puu Sɔ̀ɔ̀nkè aarə, oò ɛ̀m númú aí tə́ŋú, oò pɛ́n bə sí.

⁶ Nɛ́b aa bə̀ tə́ bə̀ ɛgǹ kìínmbə̀ nɛ́b gbàád nɛ́b bagké Eklisiya rú bə̀ bəd kíin, Urusalima bìlə́ rə, bə̀ pɛ́n in puu nə́ŋ̀má insánke mə́ rú sé. Máá gə́, nɛɛ̀n aa nyàam bə̀ kùm dú rə, kóó bə̀ tə́ nɛ́b gbàád bərá, kóó bə̀ nɛ́b gbàád bəd sé, in nə́ŋ̀má wál mə́ sé. Kàandə, nɛ́b bəd kóólé, bə̀ tə́ nə́ŋ̀ní Vɛnɛ́b númú.

⁷ Zá bə̀ bé' gə́, Vɛnɛ́b pii dàà mə́ tù' Nwɔŋ Puu Sɔ̀ɔ̀nkè bə̀ baàn, nɛ́b aa bàgə̀ síndə tə́ŋú, kìínmbə̀ nɛɛ̀n aa pii Piyɛr tù', oò mà' Yahudu bəd tə́ŋə́ rə kíin.

⁸ Kə̀ aakíin də, Vɛnɛ́b zíg mə́, máà kùm Yéésù gbantumsə̀, nɛ́b aa bə̀ bàgə̀ síndə bìá, kìínmbə̀ zíg Piyɛr kɔ̀ oò kùm Yéésù gbantumsə̀ Yahudu bəd bə̀ rə kíni.

⁹ Yakuba ra, Piyɛr ra, kə̀ Yohana tá, nɛ́b aa bə̀ ɛ̀g bə̀ kìínmbə̀ Krístù nɛ́b bəd gààd bəd kíin də, ɛ̀g bə̀ gàb pə̀dkè aa Vɛnɛ́b mà' máà rə yàá. Bə̀ kò' bə́ nɛɛ̀n kə̀ Barnabas tá. Kə̀ aakíin, bə́ wál taà yíl ɔ̀dba, bɔ̀b báà ɛ̀m nɛ́b aa bàg Vɛnɛ́b síndə sunú, boò kɔ̀ boò ɛ̀m Yahudu bəd sunú.

¹⁰ Bə̀ bàà bə́ gə́, sèl báà zá' nɛ́b búúd bə̀ bəraa Eklisiya Urusalima bìlú bə̀ rú roó. Aarə, in aa mà' mə́ kùd sɔ̀ɔ̀nkè roó.

Nɛɛ̀n aa Pol ál Piyɛr rú, Antakiya bìlə́ roó

¹¹ Zá sɛŋ aa Piyɛr yaà wə́ə́ Antakiya bìlə́ rə, yɛ̀l in nə́ŋ̀á. Máá kɔ̀ yaà mə́ álə̀ nɛ́b zùúm tə́ŋú.

¹² Kə̀ aakíin də, bə́ŋ̀ nɛ́b aa Yakuba tùm də, bə̀ wə́ə́ sé, Piyɛr líí in kə̀ ɔ̀dkudvɛɛ̀l bəraa bə̀ bàg Vɛnɛ́b síndə tá. Zá zɔ̀ŋ aa nɛ́b aarə yaà ìì wə́ə́ gə́, vúŋ yíl oò bée, bít dàà kíìn in líìnmbə̀ kə̀ boò tá. Kàandə, də́dǹ mà'ù kə̀ nɛ́b aa nàà gàb doó.

¹³ Ɔ̀dkudvɛɛ̀l kam bəraa bə̀ Yahudu bəd də, boò kɔ̀ bə̀ pìì ma'ǹmbə̀ nɛɛ̀n aarə rú, kə̀ Piyɛr mà' rə kíin. Bít Barnabas kə̀ yíl oò bə̀ má, páá yíl oòì gú' bàrə̀b luùm aarə rú.

¹⁴ Zá zɔ̀ŋ aa mə́ bé' tɛ́m boò bàg kpaŋ̀ wɔ̀ɔ̀lə̀ Nwɔŋ Puu Sɔ̀ɔ̀nkè bə̀ sín yée gə́, mə́ bàà Kefas nɛ́b zùúm bəd númú: «Ám gə́, ń Yahudu, ń kùm zɔ̀ŋə kìínmbə̀ nɛ́b aa bə̀ bàg Vɛnɛ́b síndə kíin; ń kùm kìínmbə̀ Yahudu bəd kíin sé. Ééleè ń dá taà báàn nɛ́b aa bə̀ bàg Vɛnɛ́b síndə pe'ǹmbə̀ kə̀ kpɛŋsɛ́lá, boò kùm kìínmbə̀ Yahudu bəd kíin gú?»

Yahudu bəd kə̀ nɛ́b aa bə̀ bàg Vɛnɛ́b síndə tá, Vɛnɛ́b súú bə̀ kə̀ tɛ́mbagké boò ra

¹⁵ Obə́n gə́, bə̀ lɛ̀b bə́n Yahudu bərá, bə́n kìínmbə̀ nɛ́b aa bə̀ bàg Vɛnɛ́b síndə kíin sé; nɛ́b aa bə̀ ləə Musa indaŋ̀mbə̀ sé, bít bə́ tə́ bə̀ dɛdǹ «nɛ́b invaksə́ bə̀ ma'ǹ bəd» doó.

¹⁶ Zá bə́ Yahudu bəd gə́, bə́ gàb yàá, nɛ́ŋə̀ bán kuùmbə̀ nɛ́ŋə̀ wɔ̀ɔ̀lə̀ Vɛnɛ́b númú, kə̀ tùsaa indaŋ̀mbə̀ bàà rə gá, zá nɛ́ŋə̀ dá kuùm wɔ̀ɔ̀lə̀ Vɛnɛ́b númú, kə̀ tɛ́mbagké oò aa Yéésù Krístù bərə ní. Obə́n kɔ̀ bə́n bagǹ Yéésù Krístù, bɔ̀b Vɛnɛ́b oò ɛ̀g bə́n kə̀ nɛ́b wɔ̀ɔ̀lə̀ bəd kíin, tɛ́mbagké bə́n aa Krístù bərə bòórú, zá kə̀ tùsaa indaŋ̀mbə̀ bàà rə gá. Kàandə, Vɛnɛ́b ɛ̀g nɛ́ŋə̀ nə́ŋ̀má wɔ̀ɔ̀lə̀, kə̀ tùsaa indaŋ̀mbə̀ bàà rə gá.

¹⁷ Zá dáà bə́n saànnì kuùmbə̀ wɔ̀ɔ̀lə̀, kə̀ wálke bə́n kə̀ Krístù ra, bít Yahudu kambəd bə̀ ɛ̀g bə́nnì kə̀ nɛ́b invaksə́ bə̀ ma'ǹ bəd kíin gə́, aarə í' tə́ bée baànmbə̀, Krístù tə́ sə̀n nɛ́b bəd diŋ̀ aàn invaksə́ ma'ǹbèì? Ə́ùwə́, kàan gá.

¹⁸ Kə̀ aakíin, dáà mə́ tə́ in aa mə́ wɔ̀b də bídǹ wəə̀n gə́, aarə ì' gə́, mə́ nɛ́d nwɔŋ bə̀ yɛɛ̀lá.

¹⁹ Kə̀ aakíin də, in aa ɛ̀g indaŋ̀mbə̀ rə gə́, val kò' mə́ yàá, bít indaŋ̀mbə̀ kə̀ yíl oò bìá, àà máà sə̀n val aarə ba. Val kò' mə́ sína gə́, indaŋ̀mbə̀ ləə gààd máá yílə́ sɔ̀ŋ gá. In bəraa wə́ə́ mə́ kàandə, pii mə́ kpaŋ̀, bɔ̀b máà kùm kə̀ gɔ̀ŋsá, Vɛnɛ́b tù' dáàn ma'ǹmbìá. Val kò' mə́ téélɛŋké bə kə̀ Krístù tá.

²⁰ Mə́ kə̀ gɔ̀ŋsə́ sɔ̀ŋ sé, zá Krístù kùmsə̀n máá rú. Nɛɛ̀n aa mə́ kùm dú kə̀ gɔ̀ŋsə́ bə́ŋyée rə, mə́ kùm tə́ kə̀ tɛ́mbagké Vɛnɛ́b Wàà aa í' mə́, bít pii yíl oò kìínmbə̀ sadaka kíin, bɔ̀b máá bə̀ súùnmbə̀ rə bìá.

²¹ Lɛ́' mə́ dàà Vɛnɛ́b pə̀dkè sé. Kàandə, kə̀ indaŋ̀mbìá, nɛ́ŋə̀ dá taà báàn kuùmbə̀ wɔ̀ɔ̀lə̀ gə́, ogə́ val kò' Krístù tɛdńní.