Filipiya 2 - Núúboòd Gú'dúgke Puu Sambə́ Nwɔŋú bìá

Yíl lə́ə́keá, bít káŋke Krístù bìá

¹ Mə́ gàb yàá sɔ̀ɔ̀nkè, tɛ́mbagké íí aa Krístù bərə, gáŋ ii tɛ́m tə́ kúnú. Mə́ gàb yàá sɔ̀ɔ̀nkè, í'sɛ̀l oò tɛ́' ii tɛ́m tə́ kúnú. Mə́ gàb yàá sɔ̀ɔ̀nkè, kùm íí wál tə́ kíìn kə̀ Nwul Gìdńná. Mə́ gàb yàá sɔ̀ɔ̀nkè, íí kùm tə́ kə̀ í'sɛ̀lá, bít kə̀ ɔ̀dnə́ŋ̀ búúd ɛgǹ bé'ǹmbə̀ íí bòdba.

² Kàanyée gə́, mə́ tə́ ii kíìn nyɛmàá, ìì nyíí mə́ tɛ́m kə̀ làmkèá, kə̀ aí bə̀ saŋ̀mbə̀ ɔ̀dba, kuùmbə̀ kə̀ í'sɛ̀l nə́ŋ̀ní, kuùm wáàlǹmbə̀ tɛ́m nə́ŋ̀ní, bít kə̀ inselké nə́ŋ̀ní.

³ Ìì mà' in nə́ŋ̀má ɔ̀dnə́ŋ̀ bə̀ kaàn bɔ̀b oò bə̀ kèéd lo'ǹ bí'ǹmbə̀ sí, sínkɔ̀ kə̀ yíl pa'ǹmbə̀ kə̀ ɔ̀dnə́ŋ̀ sí. Zá kə̀ tɛ́m lə́ə́keá, ìì ɛ̀g nɛ́b kambəd kìínmbə̀ bə̀ kàniì kíin.

⁴ Kóó nɛ́ɛ̀réè, oò sàà in aa dá yíl oò bə̀ láŋ̀ bərə ní sí, zá oò sàà in aa dá nɛ́b kambəd láŋ̀ bərə kɔ̀.

⁵ Inselké íí oò kùm kìínmbə̀ Yéésù Krístù bə̀ kíin.

⁶ Nyàam kpɔ̀ɔ̀m də má, oòra kùmsə̀n Vɛnɛ́bá, zá zɔ̀ŋ aa yaà bí' yíl oò kə̀ nɛ́ŋə̀ kíin də, sàà yíl oò bə̀ də́'ǹmbə̀ kə̀ kpɛŋsɛ́l kə̀ Vɛnɛ́b sé.

⁷ Zá kə̀ yíl oò bə̀ má, lɛ́' dàà kpɛŋsɛ́l aa oò naà kìínmbə̀ Vɛnɛ́b kíin doó, bít yaà kùm kə̀ kɔ̀' kíin, yaà lúŋ nɛ́b bərá, bít kùm kìínmbə̀ nɛ́ŋə̀ kíin zɔ̀ŋə yɛ́b ba.

⁸ Bí' yíl oò dùú, ləə Vɛnɛ́bá, val kò'ù téélɛŋké bə zé.

⁹ Kə̀ taàbìá, Vɛnɛ́b zígə̀ taà zɔ̀ŋ káŋke bə̀ bə lɛgə́ poú, bít páù taà nə́gə́l aa kàn nə́gə́l bəd kóólé roó;

¹⁰ bɔ̀b bə̀ dɛ̀d Yéésù nɛ́gə́lə̀ì gə́, nɛ́b bəraa lɛgə́ paà roó, aa bəraa yɛ́b bəroó, bít kə̀ kam bəraa yɛ́b dùù val bəd tə́ŋə́ rə tə́ kóólé, boò kùm kə̀ dunlígə̀d oò númú, boò káŋ̀ kúnú,

¹¹ bít nɛ́b bəd gə́ kóólé bàà boò nyɛ́' kə̀ gú' boò bìá, Yéésù Krístù kùmsə̀n Báátììkpɛ̀ŋá, bɔ̀b boò káŋ Báá bə́n Vɛnɛ́bá.

Ìì nyɛd kìínmbə̀ laa kíin, zɔ̀ŋə yɛ́b ba

¹² Kə̀ aakíin də, ɔ̀dzéd mə́ bərá, sɛŋ aa mə́ kùmà aí səǹ də, sɛŋ gə́ kóólé íí tə́ mə́ kíin ləənàá, bít aa kàn nɛɛ̀n kə̀ pɛ̀sə́ sɔ̀ŋ də, mə́ kùm kə̀ aí tə́ sín má, íí tə́ mə́ kíin ləənàá. Ìì mà' tù' sɔ̀ɔ̀nkèá, ìì dìì kpaŋ̀ aa dá ii aàn súúke rú rə bagǹmbə̀ kə̀ də́dǹná, bít kə̀ ləəkè gbà'á Vɛnɛ́b númú.

¹³ Kàandə, Vɛnɛ́b dìì tə́ tù' ma'ǹmbə̀ aí rú, bɔ̀b aí bə̀ ma'ǹ bí'ǹmbə̀ ìì í' bít ìì mà' in aa í' roó.

¹⁴ Kə̀ taàbìá, tù' íí aa íí tə́ ma'ǹ də gə́ kóólé, ìì zòl in bə sí, sínkɔ̀ ìì nyá' nwɔŋ bəd aí dun bə sí;

¹⁵ bòb ìì kùm nɛ́b aa bə̀ kə̀ invaksə́ naà síndoó, bít ìì kùm nɛ́b nyɛdkè bərá, Vɛnɛ́b yɛb yíl bə̀ bəraa kə̀ invaksə́ naà síndoó, nɛ́b yɛlké vaksə́ bəraa zɔ̀ŋə yɛ́b bə yée tə́ŋú. Ìì nyɛd boò tə́ŋú, kìínmbə̀ dùdù yɛb aa lɛgə́ paà rə kíin,

¹⁶ bít ìì bàà bə̀ nwɔŋ aa pii sáá gɔ̀ŋsə́ roó. Sèl íí mà'ì kàangə́, máá kɔ̀ tɛ́m mə́ dá taà yádǹ kə̀ aí ra, nyàm aa Krístù dáà bídǹnà bəroó. Vɛ́nà, aarə dá taà i'nàá, tù' mə́ bəd gə́ kóólé, kə̀ nɛɛ̀n aa mə́ nɔ̀ŋ dú rə tá, taà tɛdńní sé.

¹⁷ Kam gə́, nyɛ̀lə́m mə́ra, dá zəgǹ kìínmbə̀ in piìnmbə̀ kíin, sadaka aa íí pii Vɛnɛ́b kə̀ tɛ́mbagké íí rə yílú, taà kùmsə̀n baànmbə̀ basaa íí pii mə́ roó. Tə́ kàangə́, mə́ tə́ kə̀ tɛ́m làmkèá, bít wál ìì kìì tɛ́m làmkè kə̀ máá tá, íí kóólé.

¹⁸ Kə̀ aarə kíin, aí kɔ̀ ìì kìì làmkèá, máá bə̀ tɛ́m làmkè kiìnmbə̀ kə̀ aí tá.

Pol tùm Timote kə̀ Epafrodite tá, Filipiya bìlú

¹⁹ Mə́ zíg tɛ́m tə́ Báátììkpɛ̀ŋ Yéésù naú, Timote tuùm aànnà bə̀ záàn zɔ̀gɔ̀ aí sunú, bɔ̀b máá kɔ̀ máà bɔ̀b kpɛŋsɛ́l kə̀ nwoŋ bəraa dáà vúgǹnà aí naà roó.

²⁰ Timote oò nə́ŋ̀ní tə́ŋ tə́ŋ, tə́ mə́ sə̀n láŋ̀ bə kə̀ tù' mə́ bərá, bít oòra tə́ ii sə̀n seèl vɛ́nà.

²¹ Kàandə, nɛ́b bəd kóólé, bə̀ sèl tə́ in boò yílə́ bə̀ bəd ní, bə̀ sèl Krístù bòórú bə̀ kɔ̀ sé.

²² Aí kɔ̀ íí gàb yàá kə̀ yíl aí bìá, nɛɛ̀n aa Timote də́' ɛ̀g yíl oò kə̀ vɛ́nà oò roó, bít nɛɛ̀n aa mà' tù' kə̀ máá tá, kìínmbə̀ wàà aa tə́ kə̀ báá oò tə́ rə kíin, Nwɔŋ Puu Sɔ̀ɔ̀nkè tùsú.

²³ Kə̀ aakíin də, mə́ zíg tɛ́m má oò tumàá, dáà mə́ gàb nɛɛ̀n aa má kuùm dú reì nyɛdkè gə́ roó.

²⁴ Bít mə́ gàb yàá vɛ́nà, kə̀ láŋke Báátììkpɛ̀ŋ bìá, kə̀ yíl máá bə̀ kɔ̀, má dáàn aí səǹ záàn zɔ̀gɔ̀ yóo.

²⁵ Mə́ sèl lə, tə́ sɔ̀ònkèá, aí bə̀ ɔ̀dkudvɛɛ̀l bə́n Epafrodite tuùm bí'ǹnà bə̀ aí sunú, ɔ̀d mə́ nə́ŋ̀ tùsú bìá, bít ɔ̀d mə́ nə́ŋ̀ bùmú bìá. Oòrə, nɛ́ŋə̀ aa íí tùmə̀ máá səǹ, oò àà mə́ láŋke in aa mə́ ɔ̀d də bə̀ roó.

²⁶ Íí kìì mad nwɔŋ oò yérə, í' taà aí bə̀ bé'ǹmbə̀ gbàákù, bít sèl taà in gbàákù.

²⁷ Kə̀ aakíin də, ləə mad yàá, nyɛ́d zɔ̀gɔ̀ní gɔ̀ŋsə́ oò dákíìn bɛ́ràá. Zá Vɛnɛ́b ɛ̀g bé'ù búúd yàá. Bít ɛ̀g bé' kə̀ oò ní gá, zá ɛ̀g bé' máá kɔ̀, bɔ̀b bíd máà bɔ̀b tɛ́m nwuukè ɔ̀d sɔ̀ŋ sí.

²⁸ Mə́ niŋsíìn tə́ aí bə̀ tuùm bí'ǹmbìá, bɔ̀b íí bé'ùwì gə́, ìì kìì tɛ́m làmkè sɔ̀ŋ. Bít máá gə́, máà kùm kə̀ tɛ́m nwuukè sɔ̀ŋ sí.

²⁹ Kàandə, ìì kè'ù kə̀ tɛ́m làmkè gbà'á, kìínmbə̀ ɔ̀dnə́ŋ̀ Báátììkpɛ̀ŋ tùsú bə̀ kíin. Ɛ̀g ìì káŋ nɛ́b bəraa kìínmbə̀ oò kíin doó.

³⁰ Kàandə, nyɛ́d zɔ̀gɔ̀ní, dáà val kò'ùwì Yéésù Krístù tù' bòórú' dáà dá gɔ̀ŋsə́ oò tɛŋ̀, bɔ̀b máá bə̀ lánke aa íí bán máà aànmbə̀ kə̀ yíl aí bə̀ gá rə aànmbìá.