Filipiya 1 - Núúboòd Gú'dúgke Puu Sambə́ Nwɔŋú bìá

Dɔ̀msɛ̀lá

¹ Núúboòraa vúgà Pol naú, kə̀ Timote naú, nɛ́b Yéésù Krístù tù' bə̀ ma'ǹ bərá. Núúboòd aarə, bád bə́ pii Vɛnɛ́b nɛ́b gìdń bəraa bə̀ kùm Filipiya bìlə́ rə gə́ kóólé, aa bəraa bə̀ tə́ Yéésù Krístù bagǹ doó, nɛ́b yíl bə̀ bəraa Eklisiya bəd tə́ŋə́ roó, bít kə̀ diakre bəd tá.

² Mə́ nyɛ̀m Báá bə́n Vɛnɛ́b bít kə̀ Báátììkpɛ̀ŋ Yéésù Krístù tá, boò mà' ii pə̀dkèá, bít boò pii ii tɛbàá.

Pol nyɛ̀m Vɛnɛ́b, nɛ́b bagké bəraa Filipiya bìlə́ rə yílú

³ Sɛŋ aa sèl mə́ zá' nwɔŋ aí bə̀ rə gə́ kóólé, mə́ mɔ̀' Vɛnɛ́b aí yílú.

⁴ Sɛŋ aa mə́ tə́ Vɛnɛ́b nyɛɛ̀m aí yílə́ rə gə́ kóólé, mə́ nyɛ̀m kə̀ tɛ́m làmkèá,

⁵ nɛɛ̀n aa íí láŋ mə́ kə̀ gbaŋə̀ íí bəd, bɔ̀b Nwɔŋ Puu Sɔ̀ɔ̀nkè baànmbə̀ rə bòórú, sɛŋ aa sɔ̀d dú roó, yaà wə́ə́ bə́ŋyée zé.

⁶ Mə́ gàb nwɔŋ aa yée yàá vɛ́nà' Vɛnɛ́b aa sɔ̀d tùsaa ma'ǹmbə̀ aí tə́ŋə́ rə, mà' dá dáàn kə̀ númú, yaà dá bɛ́dǹ sɛŋ aa Yéésù Krístù dáà bídǹnà bərə zé.

⁷ Tə́ sɔ̀ɔ̀ní, máá bə̀ aí bə̀ seèlǹmbə̀ kə̀ aakíin, íí kóólé. Mə́ zígi tə́ máá tɛ́m ba. Kə̀ aakíin də, íí kóólé, íí bɔ̀b pə̀dkè aa Vɛnɛ́b mà' máà tùsaa bə̀ ma'ǹ də yàá, kóó sɛŋ aa mə́ wúltígə́l bə̀ rú yóo, kóó sɛŋ aa nyàam mə́ nɛ́ŋə̀ yíl bə̀ roó, bɔ̀b máà tág Nwɔŋ Puu Sɔ̀ɔ̀nkèá, bít máà mà'ù oò kùm və̀'kèá.

⁸ Vɛnɛ́b sə̀n sedako mə́ra, nwɔŋ aa mə́ bàà rə tə́ vɛ́nà, sɛŋ aa mə́ bàà gə́, mə́ í' iiyì íí kóólé, kə̀ í'sɛ̀l gbà'á Yéésù Krístù bə̀ roó.

⁹ Aa yée Vɛnɛ́b aa mə́ nyɛ̀m aí bòórú roó' mə́ nyɛ̀m Vɛnɛ́b, í'sɛ̀l íí kàŋ oò dáá númú, ìì nyìì kə̀ ingabké zùúmá, bít kə̀ inselké nyɛdkèá,

¹⁰ bɔ̀b ìì bán kíìn insɔ̀ɔ̀nkè saàn pa'ǹmbìá. Kə̀ aakíin də, íí dá kuùm nyɛdkèá, bít nɛ́ŋə̀ nə́ŋ̀má báni álǹmbə̀, nyàm aa Krístù dáà bídǹnà bərə gá.

¹¹ Gɔ̀ŋsə́ íí dá nyiìn kə̀ tù' wɔ̀ɔ̀lə̀ bəraa Yéésù Krístù lɛ̀b aí rú roó, kə̀ kaŋsɛ́lá, bít kə̀ káŋke Vɛnɛ́b bìá.

Gɔ̀ŋsə́ tə́ Krístù naà ní

¹² Ɔ̀dkudvɛɛ̀l mə́ í'sɛ̀lbə̀ bərá, mə́ í' ìì gàb kúnú, in aa bɔ̀b mə́ rə, láŋì Nwɔŋ Puu Sɔ̀ɔ̀nkè aànmbə̀ númú.

¹³ Kə̀ aakíin də, nɛ́b aa bə̀ tə́ gààd gbà'á Roma bə̀ ligə̀ nwáàn də gə́ kóólé, kə̀ nɛ́b kambəd tá, bə̀ gàb yàá, mə́ tə́ Krístù tù' ma'ǹ də, bə̀ páá mə́ taà wúltígə́l bə̀ rú.

¹⁴ Kə̀ bé'ke máá bə̀ wúltígə́l bə̀ rú, ɔ̀dkudvɛɛ̀l mə́ bəd zùúm, ìì zíg taà tɛ́m Báátììkpɛ̀ŋ ba, bít bə̀ dìì taà Vɛnɛ́b nwɔŋ baàn dáànmbə̀ kə̀ númú kə̀ váàndoá, bə̀ nùù də́dǹ bə sé.

¹⁵ Kə̀ aakíin də, nɛ́b kambəd boò tə́ŋú, bə̀ ùd Vɛnɛ́b nwɔŋ tə́ kə̀ kisɛ̀l máá yílú, kìínmbə̀ bə́ ɔ̀dmáàn kíin. Zá nɛ́b kambəd gə́, bə̀ ùd Vɛnɛ́b nwɔŋ tə́ kə̀ inselké sɔ̀ɔ̀ná.

¹⁶ Nɛ́b aa bə̀ ùd Vɛnɛ́b nwɔŋ kə̀ inselké sɔ̀ɔ̀n də, bə̀ mà' tù' tə́ kə̀ í'sɛ̀lá. Kàandə, bə̀ gàb yàá, Vɛnɛ́b pii máà sə̀n tùsaa roó, máà tág Nwɔŋ Puu Sɔ̀ɔ̀nkèá.

¹⁷ Nɛ́b kisɛ̀l bə̀ bəraa rə, bə̀ ùd Krístù nwɔŋ kə̀ vɛ́nà sé. Zá bə̀ bàà Krístù nwɔŋ tə́ kìínmbə̀ bə̀ ɔ̀dmáàn bəd kíin. Bə̀ sèl gə́, bənə́ dáánnə́ búúd mə́ bəd zəgàá, sɛŋ aa mə́ tə́ wúltígə́l bə̀ rú roó.

¹⁸ Zá in nə́ŋ̀má wál mə́ sé! Kóó dáà inselké boò oò kùm vaksá, sínkɔ̀ sɔ̀ɔ̀nkèá, kóó dáà oò kùm leè gə́ kóólé, aa kàn nɛɛ̀n də gə́, Krístù nwɔŋ baamíìn yàá, bít mə́ tə́ kə̀ tɛ́m làmkèá. Bít kìì má tɛ́m làmkè dáàn kə̀ númú.

¹⁹ Kàandə, mə́ gàb yàá, in bəraa rə kóólé, dá líbm̀ tə́ súúke mə́ ba, nyɛmsɛ́l aí bə̀ bòórú, bìn bə̀ dá mə́ taà lɛ́'ǹ kə̀ láŋke aa vúgà Yéésù Krístù nwulú roó.

²⁰ Kə̀ aakíin də, kìínmbə̀ nɛɛ̀n aa mə́ nwán, bít mə́ zíg tɛ́m gbàákù rə kíin, sə́ə́mnúù nə́ŋ̀má mà' mə́ gá. Zá bə́ŋyée, máá nyiìn kə̀ tɛ́m zígkeá. Bít kə̀ aakíin də, máá kaŋsɛ́l Krístù bə̀ i'nàá, kə̀ yíl mə́ tə́ kóólé, kóó mə́ tə́ kə̀ gɔ̀ŋsá, kóó val dá mə́ tə́ kíìn ko'nàá.

²¹ Kàandə, máá gə́, kuùmbə̀ kə̀ gɔ̀ŋsə́ gə́, Krístù ra, bít val kò' mə́ì gə́, in aa má bɔbm̀ də, dá sə̀n bə́ŋyée bə̀ kanàá.

²² Zá máá gə́, kuùmbə̀ kə̀ gɔ̀ŋsə́, pii mə́ tə́ kpaŋ̀ tù' sɔ̀ɔ̀n ma'ǹ dáànmbə̀ kə̀ númú gə́, mə́ gàb aa sàà má pa'ǹ də sé.

²³ Tɛ́m mə́ pɛd tə́ zɔ̀ŋ iira' mə́ í' yɛ́b aa yée zá'ǹ daànmbìá, bít dáàn kuùmbə̀ kə̀ Krístù tá; in aa dá nɛɛ̀n sɔɔ̀n kaàn də taá.

²⁴ Zá aí bòórú, má kuùm zɔ̀ŋə yɛ́b ba; kàandə, kumsɛ́l mə́ zɔ̀ŋə yɛ́b bərə, in pɛ̀sə́ bə̀ gbà'á íí ra.

²⁵ Kìínmbə̀ nɛɛ̀n aa mə́ kùm kə̀ vɛ́nà in aarə bə̀ rə kíin, mə́ gàb yàá, máá kíìn kumàá, mə́ gàb yàá máá kuùm kə̀ aí tə́ kóólé, bɔ̀b aí bə̀ láŋ̀mbə̀ bə ìì ɛ̀m númú, bít ìì kùm kə̀ tɛ́m làmkè tɛ́mbagké rú.

²⁶ Kə̀ aakíin də, sɛŋ aa bíd yaà máá wə́ə̀n aí səǹ sɔ̀ŋ də, íí dá kuùm kə̀ tɛ́m yádke gbà'á máá bòórú, nɛɛ̀n aa íí kùm kə̀ gɔ̀ŋsə́ Yéésù Krístù rú ní roó.

²⁷ Bə́ŋyée mə́ tə́ ii baàn sɔ̀ŋ, ìì kò' yíl íí kə̀ nɛɛ̀n aa kùm íí dá saŋ̀ kə̀ Nwɔŋ Puu Sɔ̀ɔ̀nkè Krístù bə̀ roó, bɔ̀b dá máà bé' ii kúnú, kóó sínkɔ̀ mə́ dáá sín má, máá kíìn báàn gabm̀bìá, íí kùm tə́ və̀'kèá, inselké íí wál tə́ nə́ŋ̀ní. Bít íí nə́' nə́gə̀d tə́ kə̀ tɛ́m nə́ŋ̀ní, tɛ́mbagké aa Nwɔŋ Puu Sɔ̀ɔ̀nkè tə́ piìn də bìá.

²⁸ Ìì dàà ɔ̀dmáàn íí bəd boò káá ii də́dǹ kə̀ in nə́ŋ̀má sí. Aarə boò gə́, dá bə̀ i'ǹ gə́, bə̀ tə́ ɛɛ̀m bɔ̀bke rú. Bít aí kɔ̀ dá kuùm in i'ǹmbə̀ aa dá ii aàn súúke kpaŋə́ roó, bít aarə vúgà Vɛnɛ́b naú.

²⁹ Kàandə, Vɛnɛ́b mà' ii pə̀dkè, bɔ̀b ìì mà' Krístù tù' kə̀ oò bə̀ bagǹmbə̀ ní gá, zá kə̀ búúd í'ǹmbə̀ oò bòórú kɔ̀.

³⁰ Bə́ŋyée íí nə́' bùm luùm nə́ŋ̀ní aa mə́ tə́ nə́'ǹ də tə́ kɔ̀. Bùm aarə, kùmsə̀n bùm luùm nə́ŋ̀ní aa íí bé' mə́ nə́' nyàam doó, bít mə́ tə́ nə́'ǹ sɔ̀ŋ, kìínmbə̀ nɛɛ̀n aa íí gàb də kíin.