Filemon 1 - Núúboòd Gú'dúgke Puu Sambə́ Nwɔŋú bìá

Dɔ̀msɛ̀lá

¹ Núúboòraa vúgà máá mə́ Pol naú, kə̀ ɔ̀dkudvɛɛ̀l bə́n Timote naú. Pol lə, màn aa kò' bə̀ páù wúltígə́l bə̀ rú, Yéésù Krístù nwɔŋ bòórú roó. Mə́ tə́ Núúboòraa yée Filemon báràá, oòra kùmsə̀n ɔ̀dzéd í'sɛ̀lbə̀ bə́ tùsú bìá.

² Mə́ tə́ kə̀ nɛ́b bagké bəraa bə̀ tə́ wáàl ám kàrú roó, kun kéèn bə́n Appiya ra, kə̀ Arkipus, nɛ́d nə́gə̀d bə̀ láŋ̀ nə́'ǹ bə́n da.

³ Mə́ nyɛ̀m Báá bə́n Vɛnɛ́b kə̀ Báátììkpɛ̀ŋ Yéésù Krístù tá, boò mà' ii pə̀dkèá, bít boò pii ii tɛbàá.

Filemon í'sɛ̀lá, kə̀ tɛ́mbagké oòra

⁴ Filemon, sɛŋ aa mə́ tə́ Vɛnɛ́b nyɛɛ̀m də gə́ kóólé, mə́ tə́ ám selàá, bít mə́ tə́ Vɛnɛ́b mə́ mɔ̀'nàá,

⁵ kàandə, mə́ kìì í'sɛ̀l ń aa kə̀ Vɛnɛ́b nɛ́b gìdń bəd də yàá, bít kə̀ tɛ́mbagké ń aa Báátììkpɛ̀ŋ Yéésù bəroó.

⁶ Mə́ nyɛ̀m Vɛnɛ́b ǹ kùm gágkeá, bɔ̀b tɛ́mbagké ń pɛdǹ gabm̀bə̀ kə̀ nɛ́b bagké kam bərá, bɔ̀b ǹ bɔ̀b ingabké nyììkèá, kə̀ insɔ̀ɔ̀nkè aa bə́n kə̀ naà bə́n gɔ̀ŋsə́ rú, Yéésù rú rə gə́ kóólé.

⁷ Ɔ̀dkudvɛɛ̀l mə́ í'sɛ̀l bìá, í'sɛ̀l ámbə̀ pii mə́ tɛ́m làmkèì gbàákù, kə̀ váàndo tá. Kàandə, ń nyɛ́' Vɛnɛ́b nɛ́b gìdń bəd tɛ́m yàá.

Pol nyɛ̀m Filemon, bɔ̀b bíd oò kè' Onesimus oò yiilú

⁸ Kə̀ aakíin də, Krístù pii máà sə̀n kpɛŋsɛ́l gə́ kóólé, bít máá n sə̀n kpaŋ̀ piìn, bɔ̀b ǹ mà' tùsaa roó.

⁹ Zá í'sɛ̀l mə́ aa kə̀ ám də bòórú, mə́ í' n nwɔŋ nə́ŋ̀ dɛdǹmbìá. Èè, máá mə́ Pol gə́, mə́ nɛ́ŋə̀ dooroá, bít bə́ŋyée kɔ̀, kò' bə̀ páá mə́ì wúltígə́l bə̀ rú, Yéésù Krístù nwɔŋ bòórú.

¹⁰ Mə́ tə́ən nyɛɛ̀m wàà mə́ Onezimus bòórú, wàà aa mə́ lɛ̀b wúltígə́l bə̀ rú roó. Kàandə, máára mə́ páù sə̀n tɛ́mbagké rú.

¹¹ Nyàamdoorú rə, mà' n tù' sé, zá bə́ŋyée gə́, dá n tù' kíìn ma'nàá, bít dá mə́ tù' kíìn ma'ǹ kɔ̀.

¹² Bə́ŋyée, mə́ tə́ù tuùm bí'ǹ ám sunú. Oòrə, mə́ í'ù tə́ kìínmbə̀ yíl máá bə̀ kíin.

¹³ Mə́ í' oò kùm kə̀ máá tá, sɛŋ aa bə́ŋ̀ mə́ tə́ wúltígə́l bə̀ rú, Nwɔŋ Puu Sɔ̀ɔ̀nkè bòórú roó; bɔ̀b oò mà' mə́ tù' ám zɔ̀ŋ ba.

¹⁴ Zá dáà ń í' síngə́, mə́ bán in nə́ŋ̀má ma'ǹmbə̀ gá. Mə́ í' n pe'ǹmbə̀ kə̀ kpɛŋsɛ́l, bɔ̀b m̀ mà' mə́ insɔ̀ɔ̀nkè gá. Mə́ í' ǹ mà' kə̀ nɛɛ̀n aa tɛ́m ámbə̀ í' rə kíin.

¹⁵ Kamgə́, Onesimus pɛd kə̀ ám sɛŋ zɔ̀gɔ̀ bìá, bɔ̀b bíd sàà ǹ bɔ̀bə̀, oò kùm kə̀ ám tá, zèd kə̀ zèrá.

¹⁶ Kàandə, kùm kìínmbə̀ kɔ̀' tɛdń kíin sɔ̀ŋ gá, zá kànsə̀n kɔ̀sá. Oòrə, ɔ̀dkudvɛɛ̀l mə́ í'sɛ̀lbìá. Mə́ í'ù tə́ gbàákù. Zá í' ń dáù sə̀n nɛɛ̀n taanàá, kìínmbə̀ nɛ́ŋə̀ kíin, bít kìínmbə̀ ɔ̀dkudvɛɛ̀l í'sɛ̀lbə̀ Báátììkpɛ̀ŋ bə̀ bagǹ kíin.

¹⁷ Ń kè' mə́ dunì máà yaà sɔ̀ɔ̀ní, kə̀ ɔ̀dzéd ń tɛ́mbagké rú bə̀ kíin gə́, ogə́, ń kè'ùwì kìínmbə̀ nɛɛ̀n aa ń dá mə́ ke'ǹ də kíni.

¹⁸ Bít mà' n tə́ invaksá, sínkɔ̀ ń bàgə̀ tə́ kpob gə́, kpob oòrə, máá sə̀n ká'nàá.

¹⁹ Aarə, máá mə́ Pol la, mə́ bád n sə̀n núúboòraa kə̀ nɛɛ̀n máá bìá. Máára máá sə̀n kpob ń də ká'nàá. Ń gàb yàá, ń dá mə́ yíl ń piinàá. Sèl zá' mə́ mú' n gá.

²⁰ Báà ɛɛ̀m kúnú, ɔ̀dkudvɛɛ̀lá. Ǹ mà' mə́ tùsaa yérə Báátììkpɛ̀ŋ nə́gə́lú. Ǹ nyɛ́' mə́ tɛ́m, kə̀ wálke mə́ kə̀ Krístù ra.

²¹ Sɛŋ aa mə́ tə́ən núúboòraa bádǹ bərə, mə́ gàb yàá vɛ́nà, ń dá in aa mə́ dɛ̀d n də kíìn ma'nàá. Mə́ gàb yàá, bíd ń dá nɛɛ̀n ma'ǹ tá'ǹ dú sɔ̀ŋ.

²² Bítsɔ̀ŋ, ǹ kùd mə́ zɔ̀ŋ ləə̀nmbìá; kàandə, mə́ sèl lə, Vɛnɛ́b dá nyɛmsɛ́lí kíìn ke'ǹ í'nàá, bít dá mə́ kíìn bí'ǹ aí sunú.

Dɔ̀msɛ̀l aa dùg kə̀ bòd doó

²³ Epafras, màn aa kùm wúltígə́l bə̀ rú kə̀ máá tə́, Yéésù Krístù bòórú rə, dɔ̀m m yàá.

²⁴ Nɛ́b aa bə̀ mà' tù' kə̀ máá tə́ rə, Markus da, Aristarkus da, Demas da, kə̀ Luka tá; bə̀ dɔ̀m m yàì kɔ̀.

²⁵ Pə̀dkè Báátììkpɛ̀ŋ Yéésù Krístù bə̀ oò kùm kə̀ aí tá.