Efesus 1 - Núúboòd Gú'dúgke Puu Sambə́ Nwɔŋú bìá

Dɔ̀msɛ̀lá

¹ Núúboòraa vúgà máá, mə́ Pol naú. Kə̀ nɛɛ̀n aa Vɛnɛ́b í' rə kíin, mə́ kùm taà Yéésù Krístù gbantumsàá. Bád mə́ pii nɛ́b aa bə̀ tə́ Yéésù bagǹ kə̀ tɛ́m nə́ŋ̀ní, bɔ̀b bənə́ kumnə́ gìdń oò númú, bə̀ ləə Efesus bìlə́ roó.

² Mə́ nyɛ̀m Báá bə́n Vɛnɛ́b, kə̀ Báátììkpɛ̀ŋ Yéésù Krístù tá, boò mà' ii pə̀dkèá, bít boò pii ii tɛbàá.

Insɔ̀ɔ̀nkè bəraa Vɛnɛ́b pii bə́nnà kə̀ Krístù roó

³ Báà káŋ̀ Vɛnɛ́bá, Báá bə́n Tììkpɛ̀ŋ Yéésù Krístù bóòra! Oòra zíg bə́nnà sə̀n nɛɛ̀n yílú, kə̀ wálke bə́n kə̀ Krístù ra. Mà' bə́nnà pə̀dkè kə̀ obə́n bə̀ Nwul Gìdń piìnmbə̀ Vɛnɛ́b gààd lɛgə́ paà bə̀ rú.

⁴ Kə̀ aakíin də, bɔ̀b bə́ŋ̀ Vɛnɛ́b séé yɛ́b sé, sààvúŋ bə́nnàì gbòód, bɔ̀b báà kuùm nɛ́b bəǹ bərá, Krístù rú; bɔ̀b báà kuùm nɛ́b gìdń bərá, bít báà kuùm kə̀ invaksə́ nə́ŋ̀má naà obəǹ númú sí. Í'sɛ̀l oò rú,

⁵ Vɛnɛ́b sèl zígà nyàamdoorú, bəǹ dá bə́n ma'ǹ bí'ǹ báà kuùm yɛb bəǹ bərá, kə̀ Yéésù Krístù ra. Í' ma'ǹmbə̀ kàandə, in aarə sɔ̀ɔ̀nə̀ kúnú.

⁶ Ogə́ báà káŋ̀ Vɛnɛ́bá, kə̀ pə̀dkè aa sɔ̀ɔ̀n kàn nɛɛ̀n, mà' bə́nnà wàà oò í'sɛ̀lbə̀ rú, kə̀ tɛ́m yádke roó.

⁷ Kə̀ aakíin də, kə̀ Krístù nyɛ̀lə́má, Vɛnɛ́b káákè' bə́nnà taà invaksə́ rú, bít invaksə́ bə́n bəd daamíìn yàá. Kə̀ aakíin, Vɛnɛ́b ì' bə́n taà pə̀dkè gbaŋə̀ oò bìá.

⁸ Vɛnɛ́b pii bə́nnà pə̀dkè aarə gbàákù, kə̀ obə́n bə̀ ingabké sɔ̀ɔ̀n piìnmbìá, bít kə̀ yílə sɔ̀ɔ̀n piìnmbìá.

⁹ Vɛnɛ́b mà' báà gabm̀ pìrə̀ mə́'ke bəǹ aa páá bəǹ zígà kə̀ yíl bəǹ nyàamdoorú, mà' bəǹ dá zə́'ǹ Krístù rú roó.

¹⁰ Tùsaa rə, Vɛnɛ́b mà' dá zə́'ǹ sɛŋ aa yɛ́b dá bɛ́dǹ bəroó. Taà kùmsə̀n in bəraa lɛgə́ paà rə kóólé, bít kə̀ aa bəraa zɔ̀ŋə yɛ́b bərə kóólé wáàlǹmbə̀ gààd gbà'á nə́ŋ̀ní tə́ŋtə́ŋ nɛɛ̀n tɛ́mú. Gààd gbà'á rə, Krístù ra.

¹¹ Wálke obə́n bə̀ kə̀ Krístù rə, bə́n bɔbm̀ súúke obə́n bə̀ yàá, kàandə, Vɛnɛ́b sààvúŋ bə́nnà nyàam kpɔ̀ɔ̀m, kə̀ nɛɛ̀n aa páá pìrə̀ oò rú rə kíin; bít mà' in gə́ kóólé, kə̀ nɛɛ̀n aa sèl zígà rə kíin. Bít í' sùnú, kə̀ yíl oò bìá.

¹² Ogə́ báà káŋ̀ kaŋsɛ́l Vɛnɛ́b bìá, nɛ́b aa éèn bə́n zígǹ tɛ́m Krístù bəroó!

¹³ Aí kɔ̀, sɛŋ aa íí kììà nwɔŋ sɔ̀ɔ̀n vɛ́nà bə̀, Nwɔŋ Puu Sɔ̀ɔ̀nkè aa ààiyà súúke rə, íí bàg Krístù yàá. Kə̀ aakíin də, Vɛnɛ́b sèrà taà bírə́ oò aí sisú, pii ii taà Nwul Gìdń aa bàà dàà roó.

¹⁴ Éèn Nwul Gìdń kò' sə̀n gbaŋə̀ bəraa Vɛnɛ́b zígà nɛ́b oò bəd kìínmbə̀ valligə̀ kíin də duná; bàà nyɛ́' bə́nnà, bə̀ báan in bəraa rə bɔbm̀, sɛŋ aa súúke bə́n nyìì dá bɛ́dǹ bəroó. Tə́ kàangə́, báà mɔ̀'ǹ kaŋsɛ́l Vɛnɛ́b bìá!

Pol nyɛmsɛ́lá

¹⁵ Kə̀ taàbìá, máá kɔ̀ sɛŋ aa mə́ kìì íí tə́ kə̀ tɛ́mbagké naà Báátììkpɛ̀ŋ Yéésù Krístù ba, bít íí í' Vɛnɛ́b nɛ́b gìdń bəd gə́ kóólé tə́ kíìn də,

¹⁶ mə́ dàà Vɛnɛ́b mɔ̀'ǹmbə̀ aí bòórú sé. Sɛŋ aa mə́ tə́ Vɛnɛ́b nyɛɛ̀m də gə́ kóólé, mə́ tə́ nə́gə́l aí bə̀ gɔnàá.

¹⁷ Mə́ nyɛ̀m Báátììkpɛ̀ŋ Vɛnɛ́b kaŋsɛ́l bə̀ oò pii ii ingabkéá. Báà káŋ̀ Báá Vɛnɛ́b kaŋsɛ́l bìá, oòra kùmsə̀n Yéésù Krístù Báá oòra, bít Báá bə́n da. Nwul Gìdń dá ii nɛɛ̀n aa íí dá Vɛnɛ́b gabm̀ dú sɔ̀ɔ̀nkè rə i'nàá.

¹⁸ Mə́ nyɛ̀m Vɛnɛ́b, bɔ̀b ìì bɔ̀b zɔ̀ŋ nyɛdkè ingabké íí rú, ìì gàb tɛ́mzígke luùm aa Vɛnɛ́b dɛ̀riyà kə̀ kùrú roó. Aarə kùmsə̀n gbaŋə̀ zùúm bəraa zíg nɛ́b gìdń oò bəd kìínmbə̀ valligə̀ kíin doó.

¹⁹ Bít níì kpɛŋsɛ́l gbà'á luùm, Vɛnɛ́b zíg bə́n taà, bə́n nɛ́b bagké oò bəd gú! Kpɛŋsɛ́l aa Vɛnɛ́b dá bə́n piìn yérə, bɔ̀b oò mà' tù' obə́n dú, bɔ̀b oò láŋ bə́n ba, báà bagǹnə̀ kə̀ kùrú,

²⁰ sɛŋ aa díímà Krístù valú, yaà piiù gɔ̀ŋsá, bít yaà kúmə̀ oò nɛɛ̀n váànú, lɛgə́ paà roó.

²¹ Lɛgə́ paà wərə̀ rə, Krístù ləə gààd tə́ malaika gbàád lɛgə́ paà bə̀ bəd yílú, kə̀ malaika kpɛŋsɛ́l bə̀ bəd yílú, Báátììkpɛ̀ŋ bəd yílú, bít kə̀ nə́gə́l aa nɛ́b bəd dá báàn dɛdǹmbə̀ rə gə́ kóólé yílú. Zɔ̀ŋə yɛ́b aa bə́ŋyée rə bəní gá, zá zèd bəraa dáà yaànà númú rə kɔ̀.

²² Vɛnɛ́b lə́ə́à in bəd kóólé tə́ Krístù dun dùú, bít piiùwà oò kùm gààd gbà'á Eklisiya bìá.

²³ Eklisiya kùmsə̀n Krístù sisá. Aarə oò rú, Krístù nyìì taà bə́ŋyée rú wərà. Krístù gə́, tə́ zɔ̀ŋ gə́ kóólé.