3 Yohana 1 - Núúboòd Gú'dúgke Puu Sambə́ Nwɔŋú bìá

¹ Núúboòraa yée, mə́ dam Eklisiya bə̀, bád tùm mə́ àà ɔ̀dzéd mə́ Gayus, nɛ́ŋə̀ aa mə́ í'ù sɔ̀ɔ̀nkè roó.

² Ɔ̀dzéd í'sɛ̀lbə̀ mə́ra, in aa ń tə́ ma'ǹ də kóólé, mə́ í' oò sɔ̀ɔ̀n kúnú. Mə́ í' si' ń kə̀ nwul ń tá, boò kùm kə̀ gaŋsá.

³ Mə́ kìì làmkèì gbàákù, sɛŋ aa ɔ̀dkudvɛɛ̀l bəd yaà bə̀ wə́ə́, bə̀ bàà mə́ nyɛdkè, ń kùm tə́ vɛ́nà rú, kìínmbə̀ nɛɛ̀n aa ń lɛɛ̀m dú rə kíin doó.

⁴ In nə́ŋ̀má pii mə́ làmkè gbà'á, kə̀ kiìnmbə̀ yɛb mə́ bəd kùm tə́ vɛ́nà rú kíin sé.

Yohana mɔ̀' Gayus yàá

⁵ Ɔ̀dzéd í'sɛ̀lbə̀ mə́ra, ń tə́ tù' sɔ̀ɔ̀n ma'nàá, kə̀ ɔ̀dkudvɛɛ̀l bəd láŋ̀mbə̀ ba, bít kə̀ ɔ̀dkudvɛɛ̀l kam bəraa bə̀ sɛ̀ɛ́n bəd doó.

⁶ Boò kɔ̀, bə̀ mɔ̀' í'sɛ̀l ám bə̀ yàá, Eklisiya númú. Ǹ láŋ bə̀ kúnú, mə́ tə́ən kíìn nyɛmàá, bɔ̀b ɛ̀m boò dáá sɛ̀ɛ́n kpaŋ̀ boò númú, kìínmbə̀ nɛɛ̀n aa Vɛnɛ́b í' rú rə kíin.

⁷ Kàandə, pí' bə̀ mà' tù' Krístù nə́gə́lú, bə̀ kè' in nə́ŋ̀má nɛ́b aa bə̀ bàg Vɛnɛ́b síndə naà sé.

⁸ Kə̀ taàbìá, bə́n nɛ́b bagké bəd gə́, báà láŋ̀ nɛ́b aarə bə kíin sɔ̀ɔ̀nkè. Bə́n ma'ǹnì kàangə́, bə́n ma'ǹ tù' tə́ kə̀ boò tá, Yéésù nə́gə́lú.

Diotref kə̀ Demetriyus tá

⁹ Mə́ bád Eklisiya bəd núúboòrá; zá Diotref aa í' sáá kuùmbə̀ gààd boò tə́ŋə́ rə gə́, kè' nwɔŋ aa mə́ bàà rə sé.

¹⁰ Kə̀ taàbìá, dá mə́ wə́ə́ì wərə̀ gə́, bàà yaà má in vaksə́ bəraa tə́ ma'ǹ də kíìn vú'nàá; nwɔŋ vaksə́ bəraa tə́ gáàm kə̀ gúsuúm bəd tə́ obə́n yílə́ roó. Aa mà' yérə máá, də́ŋ̀ sé. Məə ɔ̀dkuvɛɛ̀l í'sɛ̀lbə̀ bəraa yaà bə̀ tə́ wə́ə̀n wərə̀ rə kíìn ke'ǹmbìá, bít gáŋ sáá nɛ́b kam aa í' ɔ̀dkudvɛɛ̀l bəraa ke'ǹmbə̀ rə kɔ̀ kúnú, bít nìŋ vú' bə̀ kíìn Eklisiya bəd tə́ŋú.

¹¹ Ɔ̀dzéd mə́ra, m̀ màg invaksə́ aa nɛ́b bəd tə́ ma'ǹ də sí, zá ǹ màg insɔ̀ɔ̀n aa nɛ́b kambəd tə́ ma'ǹ doó. Màn aa tə́ sɔ̀ɔ̀n ma'ǹ də, oò gə́, tə́ Vɛnɛ́b nɛɛ̀n tɛ́mú, zá nɛ́ŋə̀ aa tə́ invaksə́ ma'ǹ də gə́, gàb Vɛnɛ́b sé.

¹² Nɛ́b bəd kóólé, bə̀ mà' sedako sɔ̀ɔ̀nkè Demetriyus yílú. Vɛ́nà máá, gám nwɔŋ sɔ̀ɔ̀nkèì oò yílú. Zá obə́ kɔ̀ bə́ mà'ù sedako yàá, bít ń gàb yàá, sedako aa bə́ mà' rə, sedako sɔ̀ɔ̀ná.

Dɔ̀msɛ̀l aa dùg kə̀ bòd doó

¹³ Mə́ tə́ kə̀ nwɔŋ naà zùúm ámbə̀ bádǹmbìá, zá mə́ í' nwɔŋ aarə bádǹmbə̀ kə̀ núúboòd sé.

¹⁴ Kàandə, mə́ zíg tə́ ámbə̀ dáàn bé'ǹmbə̀ záàn yóo, bít báan nwɔŋ gáàm pɛ́ɛ́nàá.

¹⁵ Vɛnɛ́b tɛbə̀ oò kùm kə̀ ám tá! Ɔ̀dzéd ḿ bəd dɔ̀m m yàá. Ǹ dɔ̀m ɔ̀dzéd bə́ bəraa wərə̀ rə gə́ kóólé nə́ŋ̀ nə́ŋ̀.