2 Yohana 1 - Núúboòd Gú'dúgke Puu Sambə́ Nwɔŋú bìá

Dɔ̀msɛ̀lá

¹ Núúboòraa yée, mə́ dam Eklisiya bə̀ bád mə́ tùmà sə̀n nà'á aa Vɛnɛ́b sààvúŋà roó, kə̀ yɛb oò bəd tá. Mə́ í' ii tə́ sɔ̀ɔ̀n. Máára mə́ í' ii sə̀ní mə́ nə́ŋ̀ní gá, zá nɛ́b aa bə̀ gàb vɛ́nà rə gə́ kóólé.

² Kàandə, vɛ́nà tə́ obə́n tɛ́mú, bít dá kuùm kə̀ obə́n tá, zèd kə̀ zèrá.

³ Báá bə́n Vɛnɛ́b, kə̀ Wàà oò Yéésù Krístù tá, bə̀ dá bə́n pə̀dkè ma'nàá, ɛ̀g bə̀ dá bə́n búúd bé'nàá, bít bə̀ dá bə́n tɛbə̀ piinàá, vɛ́nà rú, kə̀ í'sɛ̀lú.

Vɛ́nà, kə̀ í'sɛ̀lá

⁴ Mə́ bɔ̀b yɛb ḿ bəd kam bə̀ tə́ insánke vɛ́nà bə̀ ko'ǹ, kə̀ nɛɛ̀n aa Báá indaŋ̀mbə̀ bàà rə kíin. Tɛ́m mə́ kìì làmkè yàá.

⁵ Bít bə́ŋyée gə́, mə́ tə́ən kíìn nyɛmàá, nà'á, báà í'ǹ ɔ̀dnə́ŋ̀ bə́n bòdba. Aarə indaŋ̀mbə̀ puu mə́ bád n taà gá, aarə indaŋ̀mbə̀ aa bə́ bɔ̀bà sɛŋ aa sɔ̀d dú roó.

⁶ Í'sɛ̀l kùmsə̀n ko'ǹmbə̀ Vɛnɛ́b indaŋ̀mbə̀ bərá. Indaŋ̀mbə̀ aa íí dá bagǹ də, tə́ kìínmbə̀ aa íí sán sɛŋ aa sɔ̀d dú rə kíin ní' kuùmbə̀ í'sɛ̀lú.

⁷ Nɛ́b gúsuúm bə̀ bəd zùúm, bə̀ pììà tə́ zɔ̀ŋə yɛ́b ba, nɛ́b bəd tə́ŋú. Bə̀ məə tə́ kíìn ke'ǹmbə̀ Yéésù Krístù, yaà bíl nɛ́ŋə̀ yàá. Màn aa mà' kàandə, nɛ́d gúsuúm bìá; oòra kùmsə̀n Yéésù Krístù ɔ̀dmáàná.

⁸ Kə̀ aakíin də, ìì gú' yíl íí ra, bɔ̀b ìì tɛ̀ŋ mú'sɛ̀l dùm íí sí, zá ìì kè' mú'sɛ̀l dùm íí kə̀ zɔ̀ŋtá.

⁹ Kə̀ aakíin də, màn aa dìì Krístù insánke rú sé, zá áá dààì rə, Vɛnɛ́b oò tɛ́mə́ sé. Nɛ́ŋə̀ aa kùmì Krístù nwɔŋə́ rə, Báá kə̀ Wàà tá, bə̀ tə́ oò tɛ́mú.

¹⁰ Dáà nɛ́ŋə̀ yaaì aí sunú, bít ɛ̀mà kə̀ Yéésù insánke aa naà síngə́, ìì kè'ù aí kàrə́ sí, bít ìì dɔ̀mə̀ nwɔŋ sí.

¹¹ Kàandə, màn aa dɔ̀mə̀ nwɔŋ də, wál mà' tù' vaksə́ bəd tə́ kə̀ oò tá.

Nwɔŋ aa dùg kə̀ bòd doó

¹² Mə́ tə́ kə̀ nwɔŋ naà zùúm, aí bə̀ baànmbìá, zá mə́ í' nwɔŋ aarə bádǹmbə̀ kə̀ núúboòd sé. Kàandə, mə́ zíg tɛ́m tə́ dáànmbə̀ aí kàrú, bít nwɔŋ gáàm dáàn pɛ́ɛ̀nmbə̀ kə̀ aíra, bɔ̀b tɛ́m làmkè bə́n oò kùm nyɛdkèá.

¹³ Kun kéèn ń aa Vɛnɛ́b sààvúŋà rə, kə̀ yɛb oò bəd tá, bə̀ dɔ̀m m yàá.