2 Timote 4 - Núúboòd Gú'dúgke Puu Sambə́ Nwɔŋú bìá

¹ Mə́ tə́ən dɛdǹ Vɛnɛ́b númú, kə̀ Yéésù, màn aa yaà dá nɛ́b galə̀ bəd fágǹ kə̀ val bəd tə́ kóólé rə númú, sɛŋ aa dáà bídǹnà, yaà dá Gààd ləə̀n bəroó'

² ǹ ùd nɛ́b bəd Vɛnɛ́b nwɔŋá, kóó oò kùm sɛŋ sɔ̀ɔ̀nú, kóó oò kùm sɛŋ gbò'kè rú, ǹ dìì bə̀ taà ní udǹmbìá. Ǹ ì' bə̀ invaksə́ boò ra, ǹ ál bə̀ kúnú, ǹ kpɛ́ŋ bə̀ kúnú; bít ǹ sán bə̀ in kə̀ tɛ́m sidké gbà'á.

³ Kàandə, sɛŋ bəd dáà kíìn yaanàá, nɛ́b bəd bə̀ í' insánke və̀'kè Vɛnɛ́b nwɔŋ bə̀ aarə kiìnmbə̀ sɔ̀ŋ gá. Zá bə̀ dá in aa bə̀ í' rə bagàá, bít dɛ̀d bə̀ dá nɛ̀n bəraa bə̀ dá bə̀ nwɔŋ aa bə̀ í' kiìnmbə̀ rə gáàm də wáàl boò sunú.

⁴ Bə̀ kìì nwɔŋ sɔ̀ɔ̀n sɔ̀ŋ gá. Bə̀ dá tɛ́m boò kóólé bí'ǹ súúsu nwɔŋ bəd ba.

⁵ Zá ám gə́, ǹ nwán yíl ám bìá, in gə́ kóólé rú. Ǹ sìd búúd bərá, ǹ dìì Nwɔŋ Puu Sɔ̀ɔ̀nkè gəə̀l udǹmbìá, mà' m̀ bɛ́' Vɛnɛ́b tù' kìínmbə̀ nɛɛ̀n aa Vɛnɛ́b piinnà rə kíin.

⁶ Máá gə́, sɛŋ wə́ə́ì nyɛ̀lə́m mə́ za'ǹmbìá, kìínmbə̀ sadaka kíin. Sɛŋ aa gɔ̀ŋsə́ mə́ dá bɛ́dǹ bərə, wə́ə́ yàá.

⁷ Mə́ nə́' nə́gə̀d sɔ̀ɔ̀nkè yàá, nùù mə́ bɛ́' nɔg mə́ yàá, bít mə́ kò' tɛ́mbagké yàá.

⁸ Bít bə́ŋyée gə́, mú'sɛ̀l dùm aa nùù mə́ kè'à rə, tə́ mə́ nwánàá. Mú'sɛ̀l dùm də, kùmsə̀n mə̀ə̀lə̀ aa Báátììkpɛ̀ŋ wɔ̀ɔ̀lə̀ dá mə́ piìn fágə́n nyàmú, dá i'ǹ gə́, mə́ nɛ́d wɔ̀ɔ̀lə̀ oò númú roó. Bít dá máá ní piìn gá, zá dá nɛ́b aa tə́ sɛŋ aa dáà bídǹnà bərə nwáàn kə̀ í'sɛ̀l lə gə́ kóólé piìn kɔ̀.

Pol gám nwɔŋ oò yílə́ bìá

⁹ Ǹ nɔ̀ŋ máá bə̀ yaàn bɔbm̀bə̀ kə̀ báŋ.

¹⁰ Kàandə, Demas í' in zɔ̀ŋə yɛ́b bə bə̀ tə́ sɔ̀ɔ̀n, zá' dàà mə́ yàá. Kə̀ taàbìá, zá' ɛ̀m taà Tesalonika bìlú. Kereta kɔ̀ ɛ̀m tə́ Galatiya yɛ́b ba. Titus gə́, ɛ̀m tə́ Dalmatiya yɛ́b ba.

¹¹ Luka oò nə́ŋ̀ní, kùm tə́ sə̀n kə̀ máá tá. M̀ pà' Markus da, oò ɛ̀mà kə̀ ám tá. Kàandə, dá mə́ kíìn báàn láŋ̀mbə̀ bə tùsú.

¹² Mə́ tùm Tikikus, Efesus bìlú.

¹³ Sɛŋ aa ń dáà bídǹnà bərə, m̀ pà' máà gɔ̀' nwùm bə̀ aa mə́ dàà Karpus naà Torowas bìlə́ roó. M̀ pú' máà núúboòd bəraa mə́ dàà wərə̀ rə naú, aa kàn nɛɛ̀n də, núúboòd bəraa bə̀ kùd kə̀ kúlá, wál mə́ zúm wərə̀ roó.

¹⁴ Lam váàn nə́ŋ̀ bə̀ dɛ̀rə̀ Alekzandriya, mà' mə́ invaksə́ zùúm. Báátììkpɛ̀ŋ káá dá invaksə́ oòrə bí'ǹ kə̀ tù' bəraa mà' roó.

¹⁵ Ám kɔ̀, ǹ gú' yíl ń kə̀ oòra, kàandə oòrə, kpɛ́ŋ yíl oò tə́ kúnú. Məə nwɔŋ bə́n bəraa tə́ kíìn ke'ǹmbìá.

¹⁶ Sɛŋ aa éèn sɔ̀d mə́ dìì fágə́n númú, mə́ tə́ yíl mə́ tágǹ də, nɛ́ŋə̀ nə́ŋ̀má láŋ mə́ bə sé. Boò kóólé, lɛ́' bə̀ dàà mə́ kúnú. Mə́ nyɛ̀m Vɛnɛ́b oò fág bə̀ invaksə́ boò bəd sí!

¹⁷ Zá Báátììkpɛ̀ŋ kùm kə̀ máá tá, bít kpɛ́ŋ mə́ kúnú, yaà wə́ə́ sɛŋ aa ùd mə́ bɛ́' Nwɔŋ Puu Sɔ̀ɔ̀nkè rə bə zé. Nɛ́b aa bàg Vɛnɛ́b síndə kóólé, bə̀ kìì yàá, bít Báátììkpɛ̀ŋ súú mə́ì gbàál nyìg gú' ba.

¹⁸ Vɛ́nà, Báátììkpɛ̀ŋ dá mə́ súùn tù' vaksə́ bərú kóólé. Dá mə́ aàn kə̀ tɛbàá, oò Gààrú, lɛgə́ poú. Kaŋsɛ́l dá kuùm oò naú, zèd kə̀ zèrá! Oò kùm kàani!

Dɔ̀msɛ̀l aa dùg kə̀ bòd doó

¹⁹ Ǹ dɔ̀m Priskila kə̀ Akilas tá, bít ǹ dɔ̀m Onezifor kə̀ ligə̀ oò tá.

²⁰ Erastus kùmà tə́ Korintu bìlú, Torofimus kɔ̀ mə́ dààùwà tə́ mará, Miletus bìlú.

²¹ Ǹ ɛ̀m kə̀ báŋ, bɔ̀b sɛŋ aa nwùm sɛŋ dá wə́ə̀n, nɛ́ŋə̀ bán sɛ̀ɛ́n kpaŋ̀ ɛɛ̀mbə̀ gá rə, oò wə́ə́ sí. Ebulus kɔ̀, kə̀ Pudes tá, Linus da, kə̀ Klodiya ra, bít kə̀ ɔ̀dkudvɛɛ̀l mə́ í'sɛ̀lbə̀ kam bəraa nyɛ́d də gə́ kóólé, bə̀ dɔ̀mmmà yàá.

²² Mə́ nyɛ̀m Báátììkpɛ̀ŋ oò kùm kə̀ ám tá. Bít pə̀dkè Vɛnɛ́b bə̀ oò kùm kə̀ aí tə́ kóólé.