2 Timote 1 - Núúboòd Gú'dúgke Puu Sambə́ Nwɔŋú bìá

Dɔ̀msɛ̀lá

¹ Núúboòraa vúgà Pol naú, Yéésù Krístù gbantumsàá, kə̀ nɛɛ̀n aa Vɛnɛ́b í' rə kíin. Vɛnɛ́b zígə̀, oò bàà gɔ̀ŋsə́ nwɔŋ aa bàà dàà, bít bə́n bɔbm̀ kə̀ wálke kə̀ Yéésù Krístù roó.

² Bád mə́ pii wàà í'sɛ̀lbə̀ mə́ Timote ra. Mə́ dɔ̀m m yàá. Mə́ nyɛ̀m Báá bə́n Vɛnɛ́b, kə̀ Yéésù Krístù Báá bə́n Tììkpɛ̀ŋ tá, boò mà' n pə̀dkèá, ɛ̀g boò bé' n búúrá, bít boò pii n tɛbàá.

Nyɛmsɛ́l mɔ̀'ke bìá

³ Mə́ mɔ̀' Vɛnɛ́b aa mə́ tə́ù tù' ma'ǹ kə̀ inselké nyɛdkè máá tɛ́mú bìá, kìínmbə̀ doo mə́ bəd mà' rə kíin də yàá. Mə́ nyɛ̀m Vɛnɛ́b mə́ dàà bə sé, tígə́l kə̀ nyàámbərə̀ tá. Sɛŋ aa mə́ tə́ Vɛnɛ́b nyɛɛ̀m də, mə́ dàà nə́gə́l ámbə̀ dɛdǹmbə̀ sé.

⁴ Sèl mə́ tə́ nyíím wəl aa ń zà', sɛŋ aa bə́n tə́ən pɛdǹ dú rə zá'nàá. Bít mə́ í' n bé'ǹmbə̀ gbàákù, bɔ̀b tɛ́m mə́ oò nyìì kə̀ làmkèá.

⁵ Sèl mə́ zá' tɛ́mbagké vɛ́nà bə̀ aa ń kə̀ naà roó. Nyàam də, kàám Loyis kə̀ nà'ám Eunika tá, bə̀ kə̀ tɛ́mbagké luùm aarə naú. Bít mə́ gàb yàá vɛ́nà, ń tə́ kə̀ tɛ́mbagké aarə naà kɔ̀.

Ǹ í' búúd kə̀ máá tá, Nwɔŋ Puu Sɔ̀ɔ̀nkè bə̀ baànná

⁶ Kə̀ taàbìá, sèl mə́ tə́ən kíìn zá'nàá' m̀ mà' tùsaa Nwul Gìdń piinnà rə, oò ɛ̀m númú kə̀ váàndoá. Tùsaa Vɛnɛ́b piinnà sɛŋ aa mə́ zíg n kə̀ nɛɛ̀n yílə́ roó.

⁷ Kàandə, nwul aa Vɛnɛ́b pii bə́n də, bə̀ báà kuùm kə̀ sə́ə́mnúù gá. Zá pii bə́nnà nwul kpɛŋsɛ́l bìá, nwul í'sɛ̀l bìá, bít kə̀ nwul ingabké bìá.

⁸ Ǹ nùù sə́ə́mnúù kə̀ Báátììkpɛ̀ŋ sedako diìnmbə̀ sí. Bít ǹ nùù sə́ə́mnúù kə̀ máá, màn aa mə́ pìì wúltígə́l bə̀ rú rə sí. Zá ǹ bé' búúd kə̀ máá tá, bɔ̀b Nwɔŋ Puu Sɔ̀ɔ̀nkè baànmbìá, kə̀ kpɛŋsɛ́l aa Vɛnɛ́b dá n piìn doó.

⁹ Oòra súú bə́n sùnú, dɛ̀d bə́n, bɔ̀b báà kuùm nɛ́b gìdń bəǹ bəd, kə̀ tù' sɔ̀ɔ̀nkè aa bə́n tə́ən ma'ǹ də gá. Zá kə̀ nɛɛ̀n aa sèl zíg dú rə kíin, bít kə̀ pə̀dkè oòra. Pii bə́n pə̀dkè aarə kə̀ Yéésù Krístù ra; sɛŋ də bərə, bɔ̀b bə́ŋ̀ yɛ́b séémíìn sé.

¹⁰ Zá bə́ŋyée Vɛnɛ́b ì' bə́n pə̀dkè oò aarə, kə̀ yaaké Nɛ́d Nɛ́ŋə̀ bə̀ Súùn bə́n Yéésù Krístù bìá. Kàandə, Yéésù Krístù kàn val yàá; bít kə̀ Nwɔŋ Puu Sɔ̀ɔ̀nkèá, yaà ì' gɔ̀ŋsə́ aa vàd bə gá rə yàá.

¹¹ Vɛnɛ́b sààvúŋ mə́, máà kùm Yéésù gbantumsàá, máà ùd nɛ́b bəd nwɔŋ bəǹ da, bít máà sán bə̀ Nwɔŋ Puu Sɔ̀ɔ̀nkèá.

¹² Kə̀ taàbìá, mə́ tə́ taà búúd bəraa bé'nàá. Zá mə́ nùù sə́ə́mnúù sé. Kàandə, mə́ gàb màn aa mə́ tə́ tɛ́m zígǹ bərə yàá. Mə́ gàb yàá vɛ́nà, tə́ kə̀ kpɛŋsɛ́l naú, in bəraa pii dàà mə́ rə nwáànmbìá, yaà dá wə́ə̀n sɛŋ aa fágə́n dá wə́ə̀n bərə zé.

¹³ Ǹ ɛ̀g nwɔŋ nyɛdkè bəraa ń kììà máá naà yérə, kə̀ nwɔŋ sɔ̀ɔ̀n aa dá n kpaŋ̀ i'ǹ də kíin, bít ǹ kùm və̀'kè tɛ́mbagké aa kə̀ í'sɛ̀l tá, Yéésù Krístù rú rə rú.

¹⁴ Insánke sɔ̀ɔ̀nkè bəraa bə̀ pii n yérə, kò' ǹ kùd kíìn sɔ̀ɔ̀nkè. Nwul Gìdń aa kùm obə́n dú rə, dá n láŋ̀ ba.

Nɛɛ̀n aa Onezifor kùm dú kə̀ vɛ́nà, kə̀ ligə̀ oò tə́ roó

¹⁵ Ń gàb yàá, nɛ́b bagké bəraa kùm Aziya yɛ́b bərə gə́ kóólé, zá' bə̀ dàà mə́ yàá, Figelus kə̀ Hermogenes tá, bə̀ tə́ nɛ́b aa zá' bə̀ dàà mə́ rə tə́ŋú.

¹⁶ Báátììkpɛ̀ŋ oò mà' sɔ̀ɔ̀nkè oò nɛ́b aa Onezifor yiìl lə kóólé yílú. Kàandə, sɛŋ gə́ kóólé, tə́ mə́ kpɛŋsɛ́l piinàá. Oòrə, nùù sə́ə́mnúù sɛŋ aa mə́ wúltígə́l bə̀ rú rə sé.

¹⁷ Zá sɛŋ aa dá wə́ə́ Roma bìlə́ rə, sɔ̀d mə́ saànmbìá, dàà bə sé, sàà yaà bɔ̀b mə́ zé.

¹⁸ Mə́ tə́ Báátììkpɛ̀ŋ nyɛɛ̀m, bɔ̀b oò mà'ù sɔ̀ɔ̀nkè Vɛnɛ́b sunú, Fágə́n Nyàmú. Ń gàb tù' sɔ̀ɔ̀nkè bəraa mà' mə́, sɛŋ aa mə́ tə́ Efesus bìlə́ rə yàá.