2 Tesalonika 3 - Núúboòd Gú'dúgke Puu Sambə́ Nwɔŋú bìá

Ìì nyɛ̀m Vɛnɛ́b kə̀ obə́ra

¹ Bə́ŋyée gə́, ɔ̀dkudvɛɛ̀l bərá, bə́ tə́ kə̀ nwɔŋ ɔ̀d kambəd naà, baàn zəgǹmbə̀ nwɔŋ bəraa bə́ gám yée yílú. Ìì nyɛ̀m Vɛnɛ́b kə̀ obə́ra, bɔ̀b Báátììkpɛ̀ŋ nwɔŋ oò dìì sa'ǹ ɛɛ̀mbə̀ númú kə̀ báŋ, bít boò káŋ̀ kúnú, kìínmbə̀ nɛɛ̀n aa taà aí tə́ŋə́ rə kíin.

² Ìì nyɛ̀m Vɛnɛ́b kə̀ obə́ra, bɔ̀b Vɛnɛ́b oò vú' bə́ nɛ́b yɛlké, bít nɛ́b vaksə́ bəd nɛɛ̀n tɛ́mú. Kàandə, nɛ́b aa zɔ̀ŋə yɛ́b bərə kóólé, bə̀ dá sə̀n nwɔŋ oò bə̀ bagǹ gá.

³ Báátììkpɛ̀ŋ gə́, nɛ́d tù' bə̀ ma'ǹ sɔ̀ɔ̀ná. Dá ii kíìn kpɛ́ŋ̀ tɛ́mbagké rú, bít dá ii kíìn nwánàá, bɔ̀b Nɛ́ŋə̀ Vaksə́ oò bɔ̀bi sí.

⁴ Bít Báátììkpɛ̀ŋ pii bə́ tɛ́m zígke tə́ aí yílú. Tə́ bə́ kíìn baàn vɛ́nà, nwɔŋ aa tùm bə̀ pii ii rə, íí tə́ in də kíìn ma'nàá, bít íí tə́ diìn ma'ǹmbìá.

⁵ Mə́ nyɛ̀m Báátììkpɛ̀ŋ oò ké' ii kpaŋ̀á, bɔbm̀ Vɛnɛ́b í'ǹmbìá, kə̀ ɔ̀dkudvɛɛ̀l íí bərá, bít sidǹmbə̀ búúd bəd kìínmbə̀ Krístù sìd də kíin.

Ìì kùm nɛ́b murə̀ bə̀ bəd sí

⁶ Ɔ̀dkudvɛɛ̀l í'sɛ̀lbə̀ bərá, bə́ tə́ ii kíìn nyɛɛ̀m Báátììkpɛ̀ŋ Yéésù Krístù nə́gə́lú' ìì kùm zɔ̀ŋ bùúd kə̀ ɔ̀dkudvɛɛ̀l bə́ murə̀ bə̀ bəraa bə̀ məə nɛɛ̀n aa bə́ sán bə̀ in dú rə bagǹmbə̀ roó.

⁷ Íí gàb nɛɛ̀n aa íí dá ma'ǹ dú, íí dá nɛɛ̀n aa bə́ mà' rú rə bagǹ də yàá. Kàandə, sɛŋ aa bə́ kùmà aí kàrú rə, bə́ nɛ́b murə̀ bə̀ bəd gá.

⁸ Bə́ dɛ̀d nɛ́ŋə̀ nə́ŋ̀má oò pii bə́ inlíìnmbə̀ bá kíìn líìn tɛdńní sé. Zá bə́ dìì tù' kpɛŋké ma'ǹmbə̀ tígə́l kə̀ nyàámbərə̀ tá. Bə́ mú' kúnú, bɔ̀b nɛ́ŋə̀ nə́ŋ̀má aí tə́ŋú oò zàn bə́ sə̀n sí.

⁹ Bə́ mà' kə̀ aakíin də, baànmbə̀ bə́ kə̀ kpaŋ̀ naà in ke'ǹmbə̀ aí naà sín gá. Zá bə́ í' ii də́'ǹ i'ǹmbìá, bɔ̀b aí kɔ̀ ìì mà' nɛɛ̀n aarə rú.

¹⁰ Kə̀ aakíin də, sɛŋ aa bə́ kùmà aí kàrú rə, bə́ bàà ii: «Màn aa í' tù' ma'ǹmbə̀ síndə, boò piiù inlíìnmbə̀ sí.»

¹¹ Bə́ gámi nwɔŋ kə̀ aakíin də, bə́ kìì gə́, nɛ́b kam tə́ aí tə́ŋú, bə̀ nɛ́b murə̀ bə̀ bərá. Bə̀ í' tù' ma'ǹmbə̀ gá, zá bə̀ pìì nwɔŋ aa páá bə̀ síndoó.

¹² Nɛ́b bəraa rə, bə́ tə́ bə̀ nwɔŋ aa yée udǹ, bít bə́ tə́ bə̀ baàn Báá bə́n Tììkpɛ̀ŋ Yéésù Krístù nə́gə́lú, nɔ̀ŋ boò mà' tù' sɛŋ gə́ kóólé, boò zààn taà kə̀ yíl boò ra.

¹³ Íí ɔ̀dkudvɛɛ̀l bərá, íí kóólé, ìì mú' insɔ̀ɔ̀nkè ma'ǹmbə̀ sí.

¹⁴ Dáà nɛ́ŋə̀ ləə indaŋ̀mbə̀ aa bád bə́ pii núúboòrú rə síngə́, ìì ɛ̀gə̀ kàaní, bít ìì wál kə̀ oò tə́ sí, bɔ̀b oò dàà kə̀ sə́ə́mnúùá.

¹⁵ Ìì ɛ̀gə̀ kìínmbə̀ ɔ̀dmáàn íí kíin sí, zá dɛ̀rì álə̀ kúnú, kìínmbə̀ ɔ̀dkudvɛɛ̀l íí kíni.

Pə̀dkèá, kə̀ dɔ̀msɛ̀lá

¹⁶ Mə́ nyɛ̀m Báátììkpɛ̀ŋ aa kə̀ tɛbə̀ naà rə, oò pii ii tɛbə̀ sɛŋ gə́ kóólé, zɔ̀ŋ aa íí kùm bərə gə́ kóólé. Báátììkpɛ̀ŋ oò kùm kə̀ aí tá, íí kóólé.

¹⁷ Máára mə́ Pol la, mə́ tə́ sə̀n dɔ̀msɛ̀l aa bɛ́d kə̀ naà yée bádǹ kə̀ nɛɛ̀n máá bìá. Nɛɛ̀n aa mə́ bád dɔ̀msɛ̀l aarə rú rə, ì' gə́, núúboòraa rə vúgà máá naú.

¹⁸ Pə̀dkè Báá bə́n Tììkpɛ̀ŋ Yéésù Krístù bə̀ oò kùm kə̀ aí tá, íí kóólé.