2 Piyɛr 2 - Núúboòd Gú'dúgke Puu Sambə́ Nwɔŋú bìá

Nɛ́b in bə̀ sáàn gúsuúm bə̀ bərá

¹ Zá kìínmbə̀ nɛɛ̀n aa Vɛnɛ́b gbantumsə̀ gúsuúm bə̀ bəd bə̀ yaà nɛ́b Israila bə̀ bəd tə́ŋú, nyàamdoorú rə kíin, nɛɛ̀n aarə rú, nɛ́b in bə̀ sáàn gúsuúm bə̀ bəd kɔ̀ bə̀ dáà yaànnà aí tə́ŋə́ kàani. Mə́' bə̀ dáà insánke gúsuúm bə̀ bəd aanàá, insánke aa dá nɛ́b bəd yɛɛ̀l loó, məə bə̀ dá nɛ̀n boò aa súú bə̀ rə kíìn daanàá; kə̀ aakíin də, bə̀ dá búúraa lò' dá bə̀ dúŋ̀ də dɛdǹ aàn boò yílə́ kə̀ báŋ.

² Bít nɛ́b bəd zùúm, bə̀ dá kpaŋ̀ vaksə́ boò bəd bagàá. Tù' vaksə́ boò bəd bòórú, nɛ́b bəd dá nwɔŋ vaksə́ gáàm kpaŋ̀ vɛ́nà bə̀ yílú.

³ Nɛ́b in bə̀ sáàn gúsuúm bə̀ bəraa rə, bə̀ í' ba' tə́ kúnú. Bə̀ dá gbaŋə̀ ma'ǹ aí yílú, záá ìì dá ii kíìn líìn kə̀ gúsuúm nwɔŋ boò bəraa roó. Vɛnɛ́b gə́, fág kò' bə̀ì nyàam kpɔ̀ɔ̀m, bít bɔ̀bke boò gə́, náŋ wə́ə̀nmbə̀ gá.

⁴ Kàandə, malaika bəraa bə̀ mà' invaksə́ rə má, Vɛnɛ́b dàà bə̀ sé, zá tab bə̀ tə́ kə̀ sɛ̀gsɛ́g bərá, bít lɛ́l bə̀ tə́ lɔ̀ŋ tígə́l bə̀ rú, yaà dá wə́ə̀n fágə́n nyàmú zé.

⁵ Vɛnɛ́b dàà nɛ́b aa nyàamdoorú rə sé, zá mà' náŋ nwan gbà'á zɔ̀ŋə yɛ́b ba, nɛ́b vaksə́ bəd yílú. Zá Nuhu, nɛ́d Vɛnɛ́b nwɔŋ bə̀ udǹ, súú sə̀ní oò nə́ŋ̀ní tə́ŋtə́ŋ, bít kə̀ nɛ́b kambəd nə́ŋsínà.

⁶ Vɛnɛ́b fág kò' Sodoma bìlá, kə̀ Gomora bìlá, dúú bìl bəraa rə kə̀ laá, in aa dá nɛ́b vaksə́ bəd wə́ə̀n də i'ǹmbìá, bɔ̀b də́' boò ì' nɛ́b vaksə́ bəd gə́ kóólé, boò bé' in aa dá bə̀ bɔbm̀ doó.

⁷ Vɛnɛ́b bìn lɛ́' Ludu yàá. Ludu rə, nɛ́ŋə̀ wɔ̀ɔ̀lə̀ aa tɛ́m nwuù kə̀ insɔ̀ɔ̀nsín bəraa nɛ́b vaksə́ bəd tə́ ma'ǹ doó.

⁸ Kàandə, nɛ́ŋə̀ wɔ̀ɔ̀lə̀ aarə, kùmà boò tə́ŋú, kìì bít bé'à in luùm bəraa bə̀ tə́ ma'ǹ də yàá. Tɛ́m nwuù sɛŋ gə́ kóólé, kə̀ tù' vaksə́ boò bəraa bə̀ tə́ ma'ǹ doó.

⁹ Kə̀ aakíin də, nɛ́b bəraa bə̀ tə́ ma'ǹ nɛɛ̀n aa Báátììkpɛ̀ŋ í' rú rə, Báátììkpɛ̀ŋ gàb nɛɛ̀n aa bìn dá bə̀ lɛ́'ǹ dú rə yàá, sɛŋ aa bə̀ tə́ gbò'kè rú roó. Bít gàb nɛɛ̀n aa dá nɛ́b vaksə́ bəd zígǹ búúrú rəì kɔ̀, bɔ̀b boò bə̀ yaàn fágǹmbə̀ fágə́n nyàmú.

¹⁰ Bít Vɛnɛ́b dá nɛ́b aa bə̀ tə́ inlɛ'kè vaksə́ boò tɛ́m bə bə̀ bəraa tə́ bə̀ díŋ̀ də bagàá, bít bə̀ tə́ kaŋsɛ́l oò ɛgǹ gɔɔ̀n də, búúd í'ǹ pɛràá. Nɛ́b in bə̀ sáàn gúsuúm bə̀ bəraa mə́ gám ii nwɔŋ boò yérə, bə̀ nɛ́b kùlə́ bə̀ ma'ǹ bərá, bít bə̀ nɛ́b yíl bə̀ pa'ǹ bərá. Boò gə́, bə̀ ləə kaŋsɛ́l bəraa lɛgə́ paà rə sé, zá bə̀ dúl bə̀ tə́ kúnú.

¹¹ Malaika bəraa bə̀ kàn Vɛnɛ́b gbantumsə̀ gúsuúm bə̀ bəraa rə máá, bə̀ mà' kaŋsɛ́l bəraa lɛgə́ paà rə fágə́n mud bə̀ Báátììkpɛ̀ŋ númú gá.

¹² Nɛ́b aarə, bə̀ tə́ in aa bə̀ gàb síndə dúlàá. Bə̀ sèl in sé, kə̀ gɔ̀g fɔ̀gú bə̀ bəd kíin. Gɔ̀g fɔ̀g dùù bə̀ bəd gə́, tù' boò rə, boò bə̀ kodǹ lodǹmbìá. Nɛ́b aarə, bə̀ tə́ kìínmbə̀ gɔ̀g fɔ̀g dùù bə̀ bəd kíin; lòd bə̀ dá bə̀ kíin dúŋàá.

¹³ Kə̀ aakíin, mú'sɛ̀l dùm boò dá kuùm búúrá, invaksə́ tù' boò bəraa ìì mà' rə bòórú. Bə̀ kìì tɛ́m làmkè kə̀ insɔ̀ɔ̀nsín bəd ma'ǹmbə̀ nɛ́b bəd núùrú. Bə̀ tə́ kìínmbə̀ in diíŋ bəd kíin aí tə́ŋú. Bə̀ àà iiyà sə́ə́mnúù tə́ yílú, wál ìì tə́ gbèd líìn kə̀ aí tá, bít bə̀ tə́ làmkè kiìn kə̀ gúsuúm nwɔŋ boò bəd gə́ roó.

¹⁴ Boò gə́, núù ləə bə̀ tə́ nɛ́b kɛ́ɛ̀m labsə̀ bə̀ bəd bəní, bə̀ mú' invaksə́ ma'ǹmbə̀ kɔ̀ sé. Bə̀ tə́ nɛ́b vɛɛmké tɛ́mbagké rú bə̀ bəd páàn gɔ̀wà rú. Tɛ́m boò í' ba' zùúm bɔbm̀bìá. Nwɔŋyɛɛ̀l Vɛnɛ́b bə̀ tə́ boò yílú!

¹⁵ Vúg bə̀ dàà kpaŋ̀ wɔ̀ɔ̀lə̀ yàá, bə̀ pìì tə́ kpaŋ̀ vaksə́ rú. Boò gə́, bə̀ bàg Balam, Bior wàà kpaŋ̀á. Balam də, í' boò ká' bəǹ sòò basá, invaksə́ tù' bəraa bəǹ tə́ ma'ǹ də bòórú.

¹⁶ Zá vɔɔmlə̀ wàà ál Balam yàá, nɛɛ̀n aa ləə Vɛnɛ́b síndə bòórú. Kə̀ aakíin də, vɔɔmlə̀ wàà aa gám nwɔŋ gá rə, yaà gám nwɔŋ kìínmbə̀ nɛ́ŋə̀ kíin, bít kò' díí Vɛnɛ́b gbantumsə̀ kèéd, tù' bəraa tə́ ma'ǹ də yàá.

¹⁷ Nɛ́b in bə̀ sáàn gúsuúm bə̀ bəraa rə, ìì tə́ kìínmbə̀ wəl yíl aa wəl bə síndə kíin, bə̀ tə́ kìínmbə̀ mɔb aa nwul pɛ̀b tə́ pú'ǹ də kíin. Vɛnɛ́b zíg bə̀ zɔ̀ŋ boò tə́ tígə́l aa kàŋ kàn nɛɛ̀n də rú.

¹⁸ Boò gə́, bə̀ gám nwɔŋ yíl pa'ké bə̀ bərá, kə̀ nwɔŋ tɛdń bərá; bə̀ mà' tù' tə́ kə̀ inlɛ'kè vaksə́ boò tɛ́mú bìá. Kàandə, bə̀ í' nɛ́b aa bə́ŋ̀ nùù bə̀ súúà nɛ́b aa bə̀ kùm invaksə́ rú rə naà rə, kó'ǹmbə̀ gɔ̀'wà rú.

¹⁹ Bàà bə̀, bìn bəǹ dá bə̀ kíìn lɛ́'nàá. Zá kə̀ yíl oò bə̀ máá, invaksə́ kɔ̀sá; kàandə, kóó nɛ́ɛ̀réè, in nə́ŋ̀ ləə gààrì oò tɛ́mə́ gə́, dá kuùm in aarə kɔ̀sá.

²⁰ Kə̀ aakíin də, dáà nɛ́b aa nùù bə̀ súúà in nyìb bə̀ bəraa zɔ̀ŋə yɛ́b bərə rú, kə̀ gabké Báá bə́n Tììkpɛ̀ŋ Yéésù Krístù bə̀ rə, bə̀ dàà in aarə záá yaà tə́ bə̀ pa'ǹ puuní sɔ̀ŋ, bít yaà tə́ gààd ləə̀n boò tɛ́mú gə́, nɛɛ̀n aa bə́ŋyée bə̀ dá kuùm dú rə, yɛɛ̀l dá sə̀n sɛŋ aa éèn sɔ̀d dú rə kanàá.

²¹ Aa dá sɔɔ̀n də, dáà boò gàb kpaŋ̀ wɔ̀ɔ̀lə̀ sí, kə̀ gabm̀bìá, bít məə̀n daànmbə̀ indaŋ̀mbə̀ Gìdń oò aa bàà bə̀ rə gə́ roó!

²² In aa wə́ə́ bə̀ yérə, ì' nwɔŋ sɔ̀ɔ̀n aa zagəm aa yée bàà roó: «Yagəd kidbíràì in aa gɔ̀ŋ dàà rə líìnmbìá», bít zagəm ɔ̀d nə́ŋ̀ bàà sɔ̀ŋ: «Bə̀ nyíŋ Sìírə̀ nyììro wəl yàá, bít pí' dáá ləə tə́ zɔ̀gə̀rú sɔ̀ŋ.»