2 Piyɛr 1 - Núúboòd Gú'dúgke Puu Sambə́ Nwɔŋú bìá

Dɔ̀msɛ̀lá

¹ Núúboòraa vúgà máá mə́ Simon Piyɛr naú. Mə́ Yéésù Krístù nɛ́d tù' bə̀ ma'ǹná, bít mə́ gbantumsə̀ oòra. Tùm mə́ pii núúboòraa íí nɛ́b aa íí bɔ̀bà tɛ́mbagké pɛ̀sə́ bə̀ kìínmbə̀ obə́ kíin doó. Íí bɔ̀b tɛ́mbagké aarə, Yéésù Krístù, Vɛnɛ́b bə́n, bít Nɛ́d Nɛ́ŋə̀ bə̀ Súùn bə́n insɔ̀ɔ̀n aa mà' rə bòórú.

² Mə́ dɔ̀m ii yàá. Vɛnɛ́b oò mà' ii pə̀dkè gbà'á, bít oò pii ii tɛbə̀ gbà'á, nɛɛ̀n aa íí gàb Vɛnɛ́b, bít íí gàb Báá bə́n Tììkpɛ̀ŋ Yéésù rə bòórú.

Nɛɛ̀n aa nɛ́b bagké Yéésù bə̀ bəd bə̀ dá kuùm dú roó

³ Vɛnɛ́b kpɛŋsɛ́l pii bə́nnà in gə́ kóólé, bɔ̀b obə́n bə̀ láŋ̀mbə̀ bə, kuùmbə̀ kə̀ nɛɛ̀n aa Vɛnɛ́b í' rə kíin. Mà' bə́n báà gabm̀ màn aa dɛ̀d bə́nnà, yaà báà kuùm oò kaŋsɛ́lú, bít sɔ̀ɔ̀nkè oò rú roó.

⁴ Kə̀ aakíin, Vɛnɛ́b pii bə́n taà in gbàád pɛ̀sə́ bə̀ bəraa bàà dàà roó; bɔ̀b íí bɔ̀b in aa bàà dàà rəì gə́, nùù ìì súú kíìn inlɛ'kè vaksə́ tɛ́m bə bə̀ aa tə́ gààd ləə̀n zɔ̀ŋə yɛ́b bərə rú, bít ìì kùm kə̀ Vɛnɛ́b kíin.

⁵ Kə̀ taàbìá, ìì mà' in aa íí dá ma'ǹ də gə́ kóólé, bɔbm̀ zəgǹmbə̀ kumké sɔ̀ɔ̀nkè tɛ́mbagké íí ba, kumké sɔ̀ɔ̀nkè íí bə kɔ̀, ìì zəg ingabkéá,

⁶ ingabké íí bə kɔ̀, ìì zəg yíl aí bə̀ nwáànmbìá, yíl aí bə̀ nwáànmbə̀ bə kɔ̀, ìì zəg tɛ́m sidkéá, tɛ́m sidké íí bə kɔ̀, ìì zəg kumsɛ́l aa dá Vɛnɛ́b sɔɔ̀n doó.

⁷ Aa dùg kə̀ bòd də, kumsɛ́l aa dá Vɛnɛ́b sɔɔ̀n də bə kɔ̀, ìì zəg ɔ̀dnə́ŋ̀ bəd ko'ǹmbə̀ kə̀ tɛ́m nə́ŋ̀ní. Ɔ̀dnə́ŋ̀ bəd ko'ǹmbə̀ kə̀ tɛ́m nə́ŋ̀ní bə kɔ̀, ìì zəg í'sɛ̀lá.

⁸ Dáà íí tə́ kə̀ in luùm bəraa rə naà gə́, bə̀ dá ma'ǹ ingabké aa íí kə̀ naà Báátììkpɛ̀ŋ Yéésù Krístù yílə́ rə, bíl in tɛdń gá, zá bə̀ dá insɔ̀ɔ̀n lɛbàá.

⁹ Zá màn aa kə̀ in luùm bəraa rə naà síndə, bé' kùd núù gá; tə́ kìínmbə̀ nyəd kíin, yid bɔ̀' invaksə́ oò bəraa sugmíìn də yàá.

¹⁰ Kə̀ taàbìá, ɔ̀dkudvɛɛ̀l mə́ í'sɛ̀lbə̀ bərá, kò' ìì kùd dɛdké aa Vɛnɛ́b dɛ̀riyà, bít sààvúŋiyà yée kíìn sɔ̀ɔ̀nkè. Dáà íí mà'ì kàangə́, íí pí' invaksə́ rú gá.

¹¹ Kə̀ aakíin, Vɛnɛ́b dá bə́n taà kpaŋ̀ piìn sɔ̀ɔ̀nkè, bɔbm̀ piìnmbə̀ Báá bə́n Tììkpɛ̀ŋ, bít Nɛ́d Nɛ́ŋə̀ bə̀ Súùn bə́n Yéésù Krístù gààd aa dá ləə̀n zèd kə̀ zèd də rú.

¹² Kə̀ taàbìá, sèl mə́ tə́ ii taà nwɔŋ aa yée zá'ǹ sɛŋ gə́ kóólé, kóó íí gàb nwɔŋ aarə yàá, bít kóó íí kùm tə́ və̀'kè, vɛ́nà aa íí bɔ̀bà rə rú.

¹³ Zá mə́ sèl lə tə́ sɔ̀ɔ̀ní, aí bə̀ nwɔŋ bəraa seèlzá'ǹmbìá, sɛŋ aa bə́ŋ̀ mə́ tə́ kə̀ gɔ̀ŋsə́ ní yóo.

¹⁴ Kàandə, mə́ gàb yàá, zɔ̀ŋə númú zɔ̀gɔ̀ gə́, val dá mə́ kíin ko'nàá, kìínmbə̀ nɛɛ̀n aa Báá bə́n Tììkpɛ̀ŋ Yéésù Krístù ì' máà nyɛdkè rə kíin.

¹⁵ Bít má in aa má báàn ma'ǹmbə̀ rə kóólé ma'ǹ, bɔ̀b sèl ìì zá' nwɔŋ bəraa bòórú, val kò' mə́ì gə́ roó.

Nɛ́b aa bé' kaŋsɛ́l Krístù bə̀ roó

¹⁶ Nwɔŋ bəraa bə́ bàà ii Báá bə́n Tììkpɛ̀ŋ Yéésù Krístù kpɛŋsɛ́l yílú, bít kə̀ yaaké oò bə̀ zɔ̀ŋə yɛ́b bə yílə́ rə, súúsu nwɔŋ bəraa nɛ́b bəd séé sə̀n də gá. Zá bə́ bé' kaŋsɛ́l oò bə̀ yàá, kə̀ núù bə́ ra.

¹⁷ Bə́ tə́ wərà, sɛŋ aa Báá Vɛnɛ́b piiùwà kaŋsɛ́l kə̀ ləəkè tə́ roó. Vɛnɛ́b gbìntaŋ, kaŋsɛ́l oò rú, bàà Yéésù: «Màn aa yée kùmsə̀n Wàà mə́ra! Mə́ í'ù tə́ gbàákù! Mə́ zíg tɛ́m làmkè mə́ kóólé tə́ oò ba.»

¹⁸ Bə́ kììà pə̀gə̀lib nwɔŋ oò vúgà lɛgú, kə̀ túŋ bə́ra, sɛŋ aa bə́ kə̀ oò tə́ kɔ̀l gìdń bəroó.

¹⁹ In bəraa yée kóólé, ì' gə́, nwɔŋ bəraa Vɛnɛ́b gbantumsə̀ bəd bàà rə, nwɔŋ sɔ̀ɔ̀n vɛ́nà. Kə̀ aakíin də, kò' ìì kùd nwɔŋ aa bə̀ bàà ii rə kúnú. Nwɔŋ aarə, tə́ kìínmbə̀ laa aa tə́ nyɛdǹ zɔ̀ŋ tígə́l bə̀ rú rə kíin. Ìì dìì nwɔŋ aarə ko'ǹ kudǹmbìá, dùdùwà nwúunbə bə̀ yaà oò nyɛd aí tɛ́mú zé.

²⁰ Ìì gàb in aa yée kíìn sɔ̀ɔ̀nkè' Vɛnɛ́b gbantumsə̀ nə́ŋ̀má bán nwɔŋ aa Vɛnɛ́b piiù oò bàà rə baàn nyɛ́'ǹmbə̀ kə̀ yíl oò bə̀ ní gá, Nwul Gìdń láŋ̀ bə síngə́ roó.

²¹ Kàandə, nwɔŋ aa Vɛnɛ́b gbantumsə̀ bəd bə̀ tə́ gáàm də, aa bə̀ í' rə gá, zá Nwul Gìdń mà' sə̀n tù' boò tɛ́mú, bə̀ gám taà nwɔŋ Vɛnɛ́b yílú.