2 Korintu 7 - Núúboòd Gú'dúgke Puu Sambə́ Nwɔŋú bìá

¹ Ɔ̀dzéd mə́ í'sɛ̀lbə̀ bərá, nwɔŋ bəraa bàà dàà rə gə́ kóólé, tə́ kə̀ pɛ̀sə́ naà obə́n bìá. Kə̀ taàbìá, báà nyɛ́'ǹ yíl bə́n kə̀ in aa dá si' díŋ̀ də gə́ kóólé, sínkɔ̀ kə̀ in aa dá nyì' díŋ̀ də gə́ kóólé. Báà nɔŋ̀ kuùmbə̀ gìdńná, kə̀ Vɛnɛ́b nuùnmbìá.

Tɛ́m làmkè Pol bìá

² Ìì pii bə́ zɔ̀ŋ nə́ŋ̀ aí tɛ́mú! Bə́ mà' nɛ́ŋə̀ nə́ŋ̀má invaksə́ sé, bə́ láŋ nɛ́ŋə̀ nə́ŋ̀má bə, bɔ̀b oò mà' invaksə́ sé. Bít bə́ kè' in nɛ́ŋə̀ nə́ŋ̀má naà sé.

³ Nwɔŋ aa mə́ bàà yérə, mə́ í' ii fágǹ ko'ǹmbə̀ gá. Kàandə, bàà mə́ dàà yàá' Íí tə́ obə́ tɛ́mú, val dá bə́ ko'ǹ zé.

⁴ Mə́ zíg tɛ́m tə́ aí naà gbàákù, bít tɛ́m yád mə́ tə́ kə̀ aí gbàákù. Tɛ́m mə́ tə́ kə̀ tɛbàá, bít kə̀ làmkèá, kə̀ búúd bəraa mə́ tə́ bé'ǹ də tə́ kóólé.

⁵ Sɛŋ aa dá bə́ wə́ə́ Makedoniya yɛ́b bərə, bə́ bɔ̀b sɛŋ kuùm nyi'ǹmbə̀ sé. Zá bə́ í' búúd zɔ̀ŋ gə́ kóólé. Bə́ nə́' nə́gə̀d kə̀ nɛ́b kam bərá, bít də́dǹ nyìì bə́ tɛ́mú.

⁶ Zá Vɛnɛ́b aa tɛ́' nɛ́b yíl lə́ə́ke bə̀ tɛ́m də, obə́ kɔ̀ yaà tɛ́' bə́ tɛ́mì sɛŋ aa Titus wə́ə́ bəroó.

⁷ Yaaké Titus bə̀ tɛ́' bə́ sə̀ní tɛ́m gá, zá nwɔŋ aa bàà bə́, nɛɛ̀n aa íí piiùwà váàndo rú rə kɔ̀. Bít yaà bàà bə́ nɛɛ̀n aa íí í' mə́ bídǹ bé'ǹmbə̀ rú roó, nɛɛ̀n aa íí kùm kə̀ tɛ́m nwuukè gbà'á, bít íí í' mə́ tágǹmbə̀ rú roó. Kə̀ taàbìá, bə́ŋyée mə́ tə́ taà nyiìn kə̀ tɛ́m làmkè gbà'á sɔ̀ŋ.

⁸ Kə̀ aakíin də, kóó dáà núúboòraa mə́ bári rə, yɛ̀l ii tɛ́mì gə́, mə́ zá' gàbkíìn bə́ŋyée gá. Nə́ŋ̀ gə́, mə́ zá' gàbkíìn yàá, zá tɛ́m aa yɛ̀l ii rə gə́, sɛŋ zɔ̀gɔ̀ ní bìá.

⁹ Zá mə́ tə́ kə̀ tɛ́m làmkè bə́ŋyóo. Mə́ kìì tɛ́m làmkè kə̀ tɛ́m íí aa yɛɛ̀l lə gá. Zá kàandə, tɛ́m íí aa yɛɛ̀l lə, àà ii sɔ̀gke kpaŋú, kə̀ nɛɛ̀n aa Vɛnɛ́b í' rú rə kíin. Kə̀ aakíin də kɔ̀, bə́ mà' ii invaksə́ nə́ŋ̀má sé.

¹⁰ Kàandə, Vɛnɛ́b yɛ̀l tə́ sə̀n nɛ́ŋə̀ tɛ́m gə́, nɛ́ŋə̀ dáàn sɔ̀gàá, dákíìn súúnàá, bít zá' gàbkíìn bə wərə̀ gá. Zá in zɔ̀ŋə yɛ́b bə bə̀ yɛ̀l tə́ sə̀n nɛ́ŋə̀ tɛ́m gə́, val dá nɛ́ŋə̀ kíìn ko'nàá.

¹¹ Ìì ɛ̀g nɛɛ̀n aa Vɛnɛ́b yɛ̀l ii tɛ́m bít íí sɔ̀g gə́, íí kùm dú roó' bə́ŋyée íí gàbì insɔ̀ɔ̀n ma'ǹmbìá, íí vé' tə́ kə̀ yíl íí tágǹmbìá. Nɔ̀m mà' ii tə́ kə̀ in bəraa íí mà' roó, də́dǹ mà' ii tə́ kə̀ Vɛnɛ́bá, íí í' mə́ tə́ bídǹ bé'ǹmbə̀ gbàákù. Íí tə́ nɛ́b bəraa bə̀ tə́ invaksə́ ma'ǹ də búúd í'nàá. In bəraa íí mà' yée kóólé, invaksə́ nə́ŋ̀má rú wərə̀ sé.

¹² Kóó dáà mə́ báriyà núúboòd tə́ kə̀ aakíin máá, aarə mə́ bád nɛ́ŋə̀ aa mà'à invaksə́ rə bòórú gá, sínkɔ̀ nɛ́ŋə̀ aa bé'à búúd də bòórú gá. Zá bɔ̀b ìì gàb kíìn nyɛdkè, Vɛnɛ́b númú, nɛɛ̀n aa íí pii bə́ yíl aí bə̀ kə̀ zɔ̀ŋtə́ roó.

¹³ Kə̀ taàbìá, in aa íí mà' bə́ rə, tɛ́' bə́ tɛ́m yàá. Bə́ bɔ̀b tɛ́m tɛbə̀ ní sé, zá bə́ kìì tɛ́m làmkè gbà'á aa kàŋ kàn nɛɛ̀n də sɔ̀ŋ, sɛŋ aa bə́ bé' Titus kə̀ tɛ́m làmkèá, nɛɛ̀n aa íí kóólé, íí tɛ́'ù tɛ́m dú roó.

¹⁴ Vɛ́nà, mə́ mà' kùlə́ oò səǹ zɔ̀gɔ̀, aí yílú, bít íí dàà mə́ sə́ə́mnúù sé. Zá nɛɛ̀n aarə rú, sɛŋ gə́ kóólé, bə́ bàà ii nwɔŋ sɔ̀ɔ̀ná. Kə̀ aakíin də, nɛɛ̀n aarə rú sɔ̀ŋ, tɛ́m yádke aa bə́ ì' ii Titus númú rə, yaà kùmì vɛ́nà.

¹⁵ Bít kə̀ aakíin də, í'sɛ̀l oò aa kə̀ aí rə, kàŋ kàn nɛɛ̀nì gbàákù, sɛŋ aa sèl zá' rú íí tə́ù ləə̀n íí kóólé roó, bít nɛɛ̀n aa íí kèùwà kə̀ də́dǹná, bít kə̀ niŋ̀mbə̀ roó.

¹⁶ Bə́ŋyée mə́ nyìì tə́ kə̀ tɛ́m làmkè gbà'á; kàandə, má kíìn báàn tɛ́m mə́ kóólé zígǹmbə̀ aí ba.