2 Korintu 6 - Núúboòd Gú'dúgke Puu Sambə́ Nwɔŋú bìá

¹ Kə̀ aakíin də, nɛ́b aa bə́n tə́ən tù' ma'ǹ kə̀ Vɛnɛ́b tə́ rə, bə́ tə́ ii kíìn nyɛmàá, ìì dàà pə̀dkè aa íí bɔ̀bà Vɛnɛ́b naà rə oò bɔ̀b sí.

² Kə̀ aakíin də, Vɛnɛ́b bàà Núúboòd Gìdńnú: «Sɛŋ aa mə́ ì'à pə̀dkè mə́ bərə, mə́ kìì nyɛmsɛ́l ń yàá. Sɛŋ aa súúke nyàmú rə, yaà mə́ láŋ n yàá.» Èè, sɔ̀ɔ̀n yàá! Bə́ŋyée sɛŋ wə́ə́ì pə̀dkè Vɛnɛ́b bə̀ ke'ǹmbìá. Aa yée nyàm aa nɛ́ŋə̀ dá báàn súùnmbə̀ bəroó.

³ Bə́ í' nɛ́ŋə̀ oò bán bə́ álǹmbə̀ tù' báà bə sí. In aa bə́ sàà rə, nɛ́ŋə̀ lɛ́' oò dàà tɛ́mbagké oò gá.

⁴ Zá bə́ ì' yíl bə́ in gə́ kóólé ba. Bə́ bàà bə́ kùmsə̀n nɛ́b Vɛnɛ́b tù' bə̀ ma'ǹ bərá. Bə́ sìd kə̀ tɛ́m sidké gbà'á, búúd bərá, in bəraa tə́ nɛ́ŋə̀ tɛ́m nwuùn doó, kə̀ gbò'kè bərá.

⁵ Bə̀ zìb bə́ kúnú, bít kò' bə̀ pál bə́ wúltígə́l bə̀ rú. Bə̀ zá' nwɔŋ bəd kə̀ obə́ra. Bə́ mà' tù' gbò'kè bərá. Bə̀ dàŋ bə́ kíìn ləəm ləə̀nmbìá, bít bə̀ nyaa bə́ inlíìnmbə̀ kúnú.

⁶ Bə́ ì' yíl bə́, bə́ nɛ́b Vɛnɛ́b tù' bə̀ ma'ǹ nyɛdkè bə̀ bərá, kə̀ ingabké bə́ ra, kə̀ tɛ́m sidké bə́ ra, kə̀ sɔ̀ɔ̀nkè bə́ ra, kə̀ Nwul Gìdńná, kə̀ í'sɛ̀l vɛ́nà bə̀ bə́ ra,

⁷ kə̀ nwɔŋ sɔ̀ɔ̀n bə̀ aa bə́ tə́ udǹ doó, bít kə̀ Vɛnɛ́b kpɛŋsɛ́lá. Wɔ̀ɔ̀lə̀ kùmsə̀n in bùm bə̀ nə́'ǹ bə́ ra, kóó bə́ tə́ kíìn nə́'nàá, kóó bə́ tə́ kíìn tágàá.

⁸ Nɛ́b bəd bə̀ tə́ bə́ kíìn káŋàá. Nɛ́b kambəd kɔ̀ bə̀ tə́ bə́ in aa dá bə́ sə́ə́mnúù daàn də ma'nàá. Bə̀ tə́ nwɔŋ vaksə́ gáàm obə́ yílú, bít bə̀ tə́ nwɔŋ sɔ̀ɔ̀nkè gáàm obə́ yílú kɔ̀. Bə̀ ɛ̀g bə́ kìínmbə̀ bə́ nɛ́b gúsuúm bə̀ bəd kíin. Kàandə kɔ̀, bə́ bàà nwɔŋ sɔ̀ɔ̀ná.

⁹ Bə̀ ɛ̀g bə́ kìínmbə̀ bə̀ gàb bə́ sín kíin. Kàandə kɔ̀, nɛ́b bəd kóólé bə̀ gàb bə́ yàá. Bə̀ ɛ̀g bə́ kìínmbə̀ bə́ val bəd kíin. Zá bə́ tə́ kə̀ gɔ̀ŋsá. Kə̀ aakíin də, kə̀ yíl aí bə̀ máá, íí dákíìn báàn bé'ǹmbìá. Bə̀ tə́ bə́ búúd í'nàá, zá bə̀ lòd bə́ sé.

¹⁰ Bə̀ tə́ bə́ in aa dá bə́ tɛ́m nwuùn də ma'nàá, zá sɛŋ gə́ kóólé, bə́ tə́ kə̀ tɛ́m làmkèá. Bə́ kùm kìínmbə̀ nɛ́b búúd bə̀ bəd kíin, zá mà' bə́ bí' nɛ́b bəd zùúm nɛ́b gbaŋə̀ bə̀ bərá. Bə́ kùm kìínmbə̀ bə́ kə̀ in nə́ŋ̀má naà sín kíin, zá vɛ́nà bə̀ gə́, in gə́ kóólé, bə́ tə́ kə̀ naú.

¹¹ Íí nɛ́b Korintu bìlú bə̀ bərá, bə́ bàà ii nwɔŋ aa kə̀ nyɛdkèá, in nə́ŋ̀má bə́ mə́' wərə̀ sé. Bə́ pii ii tɛ́m bə́ì gbàákù.

¹² Bə́ pii ii tɛ́m bə́ yàá, zá aíra íí pii bə́ sə̀n tɛ́m íí sé.

¹³ Kàanyée gə́, mə́ gám nwɔŋ aarə tə́ kə̀ aíra, kìínmbə̀ íí yɛb mə́ bəd kíin. Ìì mà' kìínmbə̀ nɛɛ̀n aa bə́ tə́ ii ma'ǹ də kíin, ìì pii bə́ tɛ́m íí kíìn gbàákù.

Ìì gú' yílə́ ra, kə̀ nɛ́b aa bàg Vɛnɛ́b síndə aí bə̀ zá'ǹ pa'ǹmbìá

¹⁴ Wál ìì mà' tù' kə̀ nɛ́b aa bàg Vɛnɛ́b síndə tə́ sí. Nɛ́b aarə, bə̀ sɔ̀ɔ̀n kuùmbə̀ kə̀ aí tə́ sé. Kə̀ aakíin də, ééleè in wɔ̀ɔ̀lə̀ dá taà báàn wáàlǹmbə̀ kə̀ in vaksə́ tə́ gú? Bít ééleè zɔ̀ŋ nyɛdkè dá taà báàn wáàlǹmbə̀ kə̀ tígə́l tə́ gú?

¹⁵ Ééleè Krístù dá taà saŋ̀ kə̀ Sámbàŋyɛ́rə̀ gú? Sínkɔ̀ níì dá sə̀n nɛ́d bagké wáàl kə̀ nɛ́ŋə̀ aa bàg Vɛnɛ́b síndə gú?

¹⁶ Ééleè Vɛnɛ́b láŋsə́ wúl dá taà báàn wáàlǹmbə̀ kə̀ vɔɔm gú? Kàandə, obə́n da bə́n kuùm sə̀n Vɛnɛ́b galə̀ láŋsə́ wúlá, kìínmbə̀ Vɛnɛ́b kə̀ yíl oò bə̀ má, bàà rə kíin: «Má kuùm kə̀ boò tá, bít má ɛɛ̀m kə̀ boò tá. Má kuùm Vɛnɛ́b boò ra, bít boò kɔ̀ bə̀ dá kuùm nɛ́b mə́ bərá.»

¹⁷ Kə̀ taàbìá, Báátììkpɛ̀ŋ tə́ taà baanàá: «Ìì vúg kíìn boò tə́ŋú, bít ìì pɛd kíìn kə̀ boò ra. Ìì pig innyìbbə̀ nə́ŋ̀má sí, bít máá kɔ̀ má ii kíìn ke'nàá.

¹⁸ Má kuùm báá íí ra, bít aí kɔ̀ íí dá kuùm yɛb vɔ̀ɔ̀m mə́ bərá, bít yɛb kɛ́ɛ̀m mə́ bərá. Báátììkpɛ̀ŋ gbìntaŋ kpɛŋsɛ́l bə̀ bàà kàani.»