2 Korintu 2 - Núúboòd Gú'dúgke Puu Sambə́ Nwɔŋú bìá

¹ Kə̀ aakíin də, mə́ məə bídǹ dáànmbə̀ aí kàrú rə, mə́ í' ii tɛ́m dáàn yɛɛ̀l bə̀ sé.

² Kàandə, dáà mə́ yɛ̀li tɛ́mì gə́, nɛ́ɛ̀réè dá mə́ sə̀n tɛ́m làmkè piìn sɔ̀ŋ gú? Nɛ́b aa bə̀ tə́ mə́ tɛ́m làmkè piìn də, mə́ bán bə̀ tɛ́m yɛɛ̀lǹmbə̀ gá.

³ Mə́ bári núúboòraa yóo, kə̀ dáànmbə̀ aí sunú, aí bə̀ tɛ́m dáàn yɛɛ̀lǹmbə̀ gə́ roó. Mə́ gàb yàá kə̀ yíl máá bìá, màìgə́, mə́ kìì tɛ́m làmkèì gə́, íí kóólé, íí tə́ kə̀ tɛ́m làmkè kɔ̀.

⁴ Vɛ́nà, mə́ bári núúboòraa rə kə̀ tɛ́m gíbkeá, tɛ́m nwuukèá, bít kə̀ nyímwəl zùúm núùrú rə, bɔ̀b tɛ́m oò nwuu ii kíìn gá. Zá bɔ̀b ìì gàb nɛɛ̀n aa mə́ í' ii rú gbàákù roó.

Lɛ́' ìì dàà invaksə́ aa nɛ́ŋə̀ mà' ii rə kúnú

⁵ Zá dáà nɛ́ŋə̀ nə́ŋ̀ yɛ̀l nɛ́ŋə̀ nə́ŋ̀ tɛ́mì gə́, aarə mà' máá ní gá, zá íí kóólé, sínkɔ̀ nɛ́b kambəd aí tə́ŋú.

⁶ Nɛ́ŋə̀ aa kə̀ aakíin də gə́, nɛ́b zùúm bəraa bə̀ álə̀ rə, də́ŋ yàá.

⁷ Kə̀ taàbìá, bə́ŋyée aa dá sɔɔ̀n də gə́, lɛ́' ìì dààù invaksə́ aa mà' rə kúnú, bít ìì tɛ́'ù tɛ́má, bɔ̀b boò dààù oò kùm kə̀ inselké gbà'á aa dáù aàn zɔ̀ŋ aa tɛ́m zígke kùm bə síndə sí.

⁸ Bítsɔ̀ŋ, mə́ tə́ ii kíìn nyɛmàá, ìì mà' in aa dá i'ǹ gə́, íí í'ù tə́ kíìn doó.

⁹ Kə̀ aakíin də, mə́ bári taà núúboòraa yóo, kə̀ dáànmbə̀ aí kàrú gə́ roó. Mə́ í' ii də́'ǹ ɛgǹmbìá, íí ləə in aa mə́ tə́ ii sáàn də tə́ bée kóólé gə́ roó.

¹⁰ Màìgə́, lɛ́' íí dàà nɛ́ŋə̀ nə́ŋ̀ invaksə́ aa mà' rəì gə́, máá kɔ̀ máù kíìn lɛ́'ǹ daàn kɔ̀. Kàandə, dáà lɛ́' mə́ dàà nɛ́ŋə̀ invaksə́ì gə́, mə́ mà' in aarə bɔ̀b aí bə̀ laŋ̀bə̀ ba, Krístù númú,

¹¹ bɔ̀b báà dàà yíl bə́, Satan záá oò pà' bə́ sí. Kə̀ aakíin də, bə́n gabm̀ pìrə̀ oò bəraa záá pà' kə̀ nɛ́ŋə̀ rəì sɔ̀ɔ̀nkè.

Sɛŋ aa Pol ləə tá'à Torowas bìlú zɔ̀gɔ̀ roó

¹² Sɛŋ aa dá mə́ wə́ə́ Torowas bìlú, Krístù Nwɔŋ Puu Sɔ̀ɔ̀nkè baànmbə̀ rə, sàà mə́ bɔ̀b gə́, kə̀ pə̀dkè Báátììkpɛ̀ŋ bìá, mə́ bɔ̀b kpaŋ̀ sɔ̀ɔ̀nkè tù' bə̀ ma'ǹ yàá.

¹³ Zá tɛ́m nyágə́l mə́ kúnú; kàandə, sàà mə́ bɔ̀b ɔ̀dkudvɛɛ̀l mə́ Titus sé. Kə̀ taàbìá, zá' mə́ dàà bə̀ taá, bít mə́ ɛ̀m taà Makedoniya yɛ́b ba.

Kanké tə́ Yéésù Krístù naú

¹⁴ Zá mɔ̀'ke tə́ Vɛnɛ́b naú! Kàandə, mà' bə́n, ɛ̀m bə́n sáàn kə̀ Krístù tá, bɔ̀b Sámbàŋyɛ́rə̀ dáàn kaànmbìá. Mà' tù' tə́ kə̀ obə́n da, bə́n nɛ́b aa bə́n tə́ən Nwɔŋ Puu Sɔ̀ɔ̀nkè baàn doó, bɔ̀b nɛ́b bəd boò gàb Krístù zɔ̀ŋ gə́ kóólé, kìínmbə̀ urdi aa tə́ so'ǹ zɔ̀ŋ gə́ kóólé rə kíin.

¹⁵ Kə̀ aakíin də, bə́n kuùm tə́ kìínmbə̀ wardé sol sɔ̀ɔ̀nkè bə̀ aa Krístù pii Vɛnɛ́b də kíin. Bə́n kuùm tə́ nɛ́b aa bə̀ tə́ kpaŋ̀ súúke bə̀ bagǹ də tə́ŋú, bít nɛ́b aa bə̀ tə́ bɔ̀bm̀ də tə́ŋú.

¹⁶ Nɛ́b aa bə̀ tə́ bɔ̀bke kpaŋ́ rə gə́, Nwɔŋ Puu Sɔ̀ɔ̀nkè aa bə́n baàn də, tə́ bə̀ val i'nàá. Zá nɛ́b aa bə̀ tə́ kpaŋ̀ súúke bə̀ bərə gə́, Nwɔŋ Puu Sɔ̀ɔ̀nkè aarə, tə́ bə̀ gɔ̀ŋsə́ piinàá. Bít nɛ́ɛ̀réè dá sə̀n báàn tù' gbà'á aarə ma'ǹmbə̀ gú?

¹⁷ Bə́ kùm kìínmbə̀ nɛ́b zùúm kam bəraa bə̀ tə́ Vɛnɛ́b nwɔŋ gə́ə̀l lɛ́bm̀, bɔ̀b oò yɛɛ̀l kíìn də kíin sé. Zá Vɛnɛ́b tùm báà sùnú. Bə́ gám nwɔŋ kə̀ tɛ́m sɔ̀ɔ̀nkèá, Vɛnɛ́b númú, kə̀ wálke kə̀ Krístù ra.