2 Korintu 11 - Núúboòd Gú'dúgke Puu Sambə́ Nwɔŋú bìá

Pol kə̀ Yéésù gbantumsə̀ gúsuúm bə̀ bəd tá

¹ Aa mə́ í' rə gə́, kóó dáà mə́ tə́ kèéd zɔ̀gɔ̀ máá, ìì sìd mə́ kúnú! Èè, sɔ̀ɔ̀n yàá! Ìì sìd mə́ kúnú!

² Mə́ tə́ kə̀ kisɛ̀l kə̀ aíra, kisɛ̀l aa vúgà Vɛnɛ́b naà roó. Kàandə, íí tə́ kìínmbə̀ wàà kéèn bèlzá aa bàà mə́ dàà gə́, nɛ́ŋ váàndo nə́ŋ̀ní tə́ŋtə́ŋ oò pà' sə̀n də kíin; Nɛ́ŋ Váàndo rə, Krístù ra.

³ Zá mə́ nùù inselké íí dákíìn nwɔɔnàá, bít lɛ́' íí dá vɛ́nà íí kə̀ kumké nyɛdkè íí kə̀ Krístù kíìn daanàá, kìínmbə̀ nɛɛ̀n aa bi' záá lɛ́' Auwa kə̀ tɔ̀ɔ̀l in oòrə kíin.

⁴ Kə̀ aakíin də, dáà nɛ́ŋə̀ nə́ŋ̀ yaà ùri Yéésù nə́ŋ̀ gɔ̀ŋ nwɔŋ yàá, pɛrì kə̀ Yéésù aa bə́ ùri nwɔŋ oò roó, sínkɔ̀ dáà íí kè' nwul nə́ŋ̀ gɔ̀ŋ nwɔŋ yàá, pɛrì kə̀ nwul aa íí bɔ̀bà roó, bítsɔ̀ŋ dáà íí kè' Nwɔŋ Puu Sɔ̀ɔ̀nkè nə́ŋ̀ gɔ̀ŋ yàá, pɛrì kə̀ aa íí kè'à rə gə́, ìì sìrə̀ kíìn gbàákù.

⁵ Zá mə́ gàb yàá vɛ́nà, mə́ də́ŋ tə́ kə̀ «Yéésù gbantumsə̀ gbàárí» bəd nə́ŋ̀ní.

⁶ Dáà gám mə́ bán nwɔŋ síngə́, zá ingabké gə́, mə́ tə́ kə̀ naú. Bə́ ì' iiyàì nyɛdkè in gə́ kóólé yílú, bít nɛ́b bəd kóólé númú.

⁷ Sɛŋ aa mə́ bàà ii Vɛnɛ́b Nwɔŋ Puu Sɔ̀ɔ̀nkè rə, mə́ sàà dùm nə́ŋ̀má aí naà sé. Mə́ bí' yíl mə́ dùú, bɔ̀b yíl aí bə̀ zá'ǹmbìá. Mə́ mà' kə̀ aakíin də, aarə invaksə́ì?

⁸ Mə́ kè'à ba' Eklisiya kambəd naú, bɔ̀b tù' ma'ǹmbə̀ aí tə́ŋú. Aarə tə́ kìínmbə̀ bɔ̀n mə́ pà' Eklisiya kambəd iná, bɔ̀b aí bə̀ láŋ̀mbə̀ bə kíin.

⁹ Bít sɛŋ aa mə́ kùmà aí kàrú rə, sɛŋ aa ba' kpán mə́ rə, mə́ dɛ̀d in nə́ŋ̀má nɛ́ŋə̀ naà sé. Kàandə, ɔ̀dkudvɛɛ̀l bəraa bə̀ vúgə́là Makedoniya yɛ́b bərə, bə̀ àà máà in aa dá mə́ láŋ̀ bə kə̀ tù' ma'ǹmbə̀ rə gə́ kóólé. Mə́ nwán yíl mə́, mə́ í' kóó in nə́ŋ̀má dɛdǹmbə̀ aí naà sé. Bít má diìn yíl mə́ nwáànmbə̀ nɛɛ̀n aarə rú.

¹⁰ Kə̀ vɛ́nà Krístù bə̀ aa máá rú roó, bàà mə́ tə́ kíìn nyɛ́'nàá, kóó nɛ́ŋə̀ nə́ŋ̀má Akaya yɛ́b ba, dá báàn kùlə́ mə́ aa yée daŋ̀mbə̀ sé.

¹¹ Kə̀ níìbə̀ mə́ bàà taà nwɔŋ aarə gú? Mə́ í' ii sínì? Vɛnɛ́b má gàb yàá, mə́ í' ii tə́ kúnú!

¹² Nɛɛ̀n aa mə́ məə ba' ke'ǹmbə̀ aí naà rə, mà' máá dáàn nɛɛ̀n aarə rú ní aí tə́ŋú, bɔ̀b nɛ́b gúsuúm bə̀ bəd boò pà' yíl baànmbə̀ mà' bənə́ də́ŋnə́ tù' tə́ kə̀ nə́ŋ̀ní sí.

¹³ Nɛ́b aarə, bə̀ Yéésù gbantumsə̀ gúsuúm bə̀ bərá. Nɛ́b aarə, bə̀ tə́ gúsuúm dugǹ kə̀ tù' boò bəraa bə̀ tə́ ma'ǹ doó. Bə̀ pɛ́n si' boò, bɔ̀b boò ɛ̀g bənə́ kìínmbə̀ Yéésù Krístù gbantumsə̀ bəd kíin.

¹⁴ In yíl bə̀ ko'ǹ nə́ŋ̀má bə wərə̀ sé. Kàandə, Satan kə̀ yíl oò bə̀ má, dákíìn báàn si' oò pɛ́ɛ̀nmbə̀ kìínmbə̀ malaika zɔ̀ŋ nyɛdkè rú bə̀ kíin.

¹⁵ Kə̀ aakíin də, aarə in yíl bə̀ ko'ǹ gá. Dáà nɛ́b tù' bə̀ ma'ǹ bəraa rə, bə̀ pɛ́n yíl boò yàá, bə̀ bààì bənə́ nɛ́b Vɛnɛ́b tù' wɔ̀ɔ̀lə̀ bə̀ ma'ǹ bəd gə́, sɛŋ bɛ́dke bə gə́, bə̀ dá fágə́n bɔbm̀ kìínmbə̀ nɛɛ̀n aa bə̀ mà' tù' boò rú rə kíin.

Pol mà' kùlə́ tə́ kə̀ búúraa bé' roó

¹⁶ Mə́ tə́ ii bídǹ baàn sɔ̀ŋ' nɛ́ŋə̀ nə́ŋ̀má oò sèl baànmbə̀ oò tɛ́mú, mə́ kèéd sí. Zá dáà íí ɛ̀g mə́ì kə̀ aakíin gə́, ìì kè' kíìn baànmbə̀ mə́ kèéd doó, bɔ̀b máá kɔ̀ máà mà' kùlə́ zɔ̀gɔ̀.

¹⁷ Vɛ́nà, nwɔŋ aa mə́ tə́ baàn bə́ŋyée rə, aarə nwɔŋ aa Báátììkpɛ̀ŋ í' rə gá. Nɛɛ̀n aa mə́ kùm dú, yaà mə́ tə́ kə̀ kùlə́ ma'ǹ yérə, mə́ gám nwɔŋ tə́ kìínmbə̀ mə́ kèéd kíin.

¹⁸ Kàandə, nɛɛ̀n aa nɛ́b zùúm bəd tə́ kùlə́ ma'ǹ dú, kìínmbə̀ nɛ́b aa bàg Vɛnɛ́b síndə kíin yérə, máá kɔ̀ má kùlə́ ma'ǹ nɛɛ̀n aarə rú kɔ̀.

¹⁹ Ìì ɛ̀ga, íí kùmsə̀n nɛ́b in bə̀ gabm̀ bəd yée gə́, íí sìd taà kèéd bəd kə̀ tɛ́m làmkè gbàákù!

²⁰ Íí sìd kúnú, bɔ̀b nɛ́b bəd boò ɛ̀gì kìínmbə̀ kɔ̀' kíin, boò kè' in aa íí kə̀ naà roó, boò záá ii kúnú, boò ɛ̀gi kìínmbə̀ fɔ̀g kíin, bít boò tàŋi nɛɛ̀n kàrá.

²¹ Sə́ə́mnúù mà' mə́ tə́ kíìn nwɔŋ aarə baànmbìá. Bə́ kə̀ váàndo naà, ma'ǹmbə̀ kə̀ aakíin sé! Zá dáà nɛ́ŋə̀ nə́ŋ̀ bààì bəǹ dá kùlə́ ma'ǹ in nə́ŋ̀ yílə́ gə́, máá kɔ̀ má ma'ǹ nɛɛ̀n aarə rú. (Mə́ gám nwɔŋ tə́ kìínmbə̀ mə́ kèéd kíin.)

²² Bə̀ tə́ Ibraniŋko bəd máá, máá kɔ̀ mə́ Ibraniŋko kɔ̀. Bə̀ tə́ nɛ́b Israila bə̀ bəd má, máá kɔ̀ mə́ nɛ́d Israila bə̀ kɔ̀. Bə̀ tə́ Abraham yɛb kàá bəd má, máá kɔ̀ mə́ Abraham wàà kàá kɔ̀.

²³ Boò rə, bə̀ kùmsə̀n nɛ́b Krístù tù' bə̀ ma'ǹ bərì? Má nwɔŋ gáàm kìínmbə̀ mə́ kèéd kíin. Mə́ kàn bə̀ sùnú. Mə́ kàn bə̀ sə̀n kə̀ tù' ma'ǹmbìá. Kò' bə̀ páá mə́ wúltígə́l bə̀ rú sɛŋ zùúm. Bə̀ zìb mə́ gbà'ákù, sɛŋ zùúm, mə́ nyɛ́d zɔ̀gɔ̀ní vadǹmbìá.

²⁴ Gə̀b núnà, Yahudu bəd nɛ́b gbàád bəd bə̀ zìb mə́ nyɛ́gsə̀ nɛɛ̀n laa nə́ŋ̀ zè kób zè dàànə́ŋ̀ní.

²⁵ Gə̀b toora bə̀ zìb mə́ kə̀ gbàsá. Bít gə̀b nə́ŋ̀ kɔ̀, nɛ́b bəd bə̀ í' mə́ laàn lo'ǹmbə̀ kə̀ bəŋá. Kə̀ə̀d gbà'á zàà mə́ wəlú gə̀b toora. Bít gə̀b nə́ŋ̀ kɔ̀ mə́ kùm wəlú nyàm nə́ŋ̀ kə̀ tígə́l nə́ŋ̀.

²⁶ Mə́ ɛ̀m sɛ̀ɛ́n kpaŋ̀ kə̀ duná. Mə́ í' búúd kə̀ wəl nwuurú bìá. Mə́ í' búúd lííro bəd nɛɛ̀n tɛ́mú. Mə́ í' búúd kun mə́ bəd nɛɛ̀n tɛ́mú, bít nɛ́b aa bàg Vɛnɛ́b síndə nɛɛ̀n tɛ́mú. Mə́ í' búúd bìl gɔ̀ŋ gɔ̀ŋ bərú. Mə́ í' búúd fɔ̀g dùú. Mə́ í' búúd wəl nyìgə̀lú. Mə́ í' búúd ɔ̀dkudvɛɛ̀l mə́ gúsuúm bə̀ bəd tə́ŋú.

²⁷ Mə́ mú'ì kə̀ tù' nwuukè bəd ma'ǹmbìá. Tígə́l zùúm, mə́ bɔ̀b ləəm ləə̀nmbə̀ sé. Mə́ kìì gulùmá, mə́ kùmì kə̀ wəlsúurá. Sɛŋ zùúm, mə́ bɔ̀b inlíìnmbə̀ nə́ŋ̀má sé. Nwùm í' mə́ búúd gbàákù, mə́ bɔ̀b gɔ̀' sé.

²⁸ Mə́ gád búúd kam bəraa nyɛ́d də gá. Nyàm gə́ kóólé, mə́ tə́ tùsaa má ma'ǹ Eklisiya bərú kóólé rə selàá.

²⁹ Ɔ̀dkudvɛɛ̀l nə́ŋ̀ tɛ́mbagké ɔ̀gì gə́, máá kɔ̀ mə́ kìì ɔ̀gke oòrə kɔ̀. Ɔ̀dkudvɛɛ̀l nə́ŋ̀ yi'ì invaksə́ rú gə́, mə́ kìì tɛ́m nwuukè gbàákù.

³⁰ Dáà má kùlə́ kíìn ma'ǹ gə́, máá kùlə́ ma'ǹ kə̀ in aa ì' gə́, mə́ nɛ́ŋə̀ vɛɛmké roó.

³¹ Vɛnɛ́b, Báátììkpɛ̀ŋ Yéésù bóò, nɛ́ŋə̀ aa bə̀ tə́ù káŋ̀ zèd kə̀ zèd də máá, gàb yàá, mə́ dùg gúsuúm sé.

³² Sɛŋ aa mə́ tə́ tù' ma'ǹ Damas bìlə́ rə, gɔ̀mnà aa tə́ tù' ma'ǹ gààd Areta dùù rə, zíg sóózè bəd boò nwán bìl waàlá, bɔ̀b boò kò' mə́ kúnú.

³³ Zá ɔ̀dkudvɛɛ̀l bəd pà' bə̀ vúŋ mə́ mawol wəərú. Bə̀ páá mə́ pìlə̀mú, bə̀ tab kaasə́ pìlə̀m də ba, pà' bə̀ vúŋ mə́ taà mawol wəərú, bít bə̀ sí' mə́ taà yɛ́b ba. Bít kə̀ aakíin, bɔ̀b mə́ súú taà gààd Areta bə̀ nɛɛ̀n tɛ́mú.