2 Korintu 10 - Núúboòd Gú'dúgke Puu Sambə́ Nwɔŋú bìá

Pol tə́ tù' oò tágàá

¹ Máára mə́ Pol la, máá ii nwɔŋ nə́ŋ̀ dɛràá. Mə́ kùmsə̀n nɛ́ŋə̀ aa bə̀ dɛ̀d nɛ́ŋə̀ tɛ́m lə́ə́ke bìá, sɛŋ aa mə́ tə́ kə̀ aí tá, zá nɛ́ŋə̀ vaksá, sɛŋ aa mə́ kə̀ aí tə́ síndoó. Mə́ tə́ ii nyɛɛ̀m kə̀ tɛ́m ɔ̀gke Krístù bìá, bít kə̀ sɔ̀ɔ̀nkè Krístù bìá.

² Mə́ tə́ ii kíìn nyɛmàá, ìì pè' mə́ kə̀ kpɛŋsɛ́l sí. Kàandə, mə́ gàb yàá vɛ́nà, má kíìn báàn kpɛŋsɛ́l i'ǹmbìá, kə̀ nɛ́b aa bə̀ tə́ seèl gə́, bə́ mà' tə́ kìínmbə̀ nɛ́b zɔ̀ŋə yɛ́b bə bə̀ kíin doó.

³ Vɛ́nà, bə́n kuùm tə́ nɛ́b aa bàg Vɛnɛ́b síndə tə́ŋú. Zá bə́n nə́'ǹ bùm kìínmbə̀ nɛ́b aa bàg Vɛnɛ́b síndə kíin sé.

⁴ In bəraa bə́n tə́ən kə̀ bùm nə́'ǹ də, vúgə́là nɛ́b aa bàg Vɛnɛ́b síndə naà gá. Aarə in bùm bə̀ nə́'ǹ kpɛŋsɛ́l bə̀ bəraa vúgə́là Vɛnɛ́b naà roó. Kə̀ in bùm bə̀ nə́'ǹ bəraa roó, báan taà ɔ̀dmáàn bə́n bəd inselké gúsuúm bə̀ boò bəd dúŋàá.

⁵ Bə́ tə́ nwɔŋ yíl pa'ké bə̀ boò bəraa tə́ nɛ́b bəd daŋ̀ Vɛnɛ́b bagǹmbə̀ rə dúŋàá. Bə́ tə́ inselké boò bəd gə́ kóólé ko'ǹ aàn, bɔ̀b boò ləə Krístù ra.

⁶ Bít sɛŋ aa íí kóólé, íí ì' bə́ yíl aí bə̀ yàá, íí ləə bə́ì rə, kùm bə́ tə́ nwáàn nɛ́ŋə̀ aa ləə bə́ síndə búúd í'ǹmbìá.

⁷ Ìì ɛ̀g in bəraa aí númú yéroó. Dáà nɛ́ŋə̀ nə́ŋ̀ bàà yàá, bəǹ Krístù nɛ́ŋə̀ gə́, sèl oò gàb kíìn sɔ̀ɔ̀nkè sɛŋ nə́ŋ̀ní. Dáà bààì bəǹ Krístù nɛ́ŋə̀ gə́, obə́ kɔ̀ bə́ Krístù nɛ́b bərá, kìínmbə̀ oò kíin.

⁸ Mə́ nùù sə́ə́mnúù kùlú ma'ǹmbə̀ kə̀ kpɛŋsɛ́l aa Báátììkpɛ̀ŋ pii mə́ rə gá. Kpɛŋsɛ́l aarə, aí bə̀ yɛɛ̀lǹmbə̀ kə̀ kùrú gá, zá bɔ̀b aí bə̀ gbá'ǹmbə̀ númú.

⁹ Mə́ í' in nə́ŋ̀má ma'ǹmbə̀, bɔ̀b aí bə̀ də́dǹ ká'ǹmbə̀ kə̀ núúboòd mə́ bəd sé.

¹⁰ Kə̀ aakíin də, aa yée nwɔŋ aa bə̀ bàà roó: «Pol núúboòd bəd tə́ kpɛŋkéá, bít vé'keá. Zá sɛŋ aa tə́ obə́n tə́ŋə́ kə̀ yíl oòrə, tə́ ɔ̀gkeá. Bít nɛɛ̀n aa tə́ nwɔŋ gáàm dú rə, sɔ̀ɔ̀n kùd sé.»

¹¹ Màn aa sèl tə́ gáàm kə̀ aakíin də, oò gàb kíìn sɔ̀ɔ̀nkè' in nə́ŋ̀má pɛ̀d nwɔŋ aa bə́ tə́ bádǹ obə́ núúboòd bərú, sɛŋ aa bə́ kə̀ aí tə́ síndə, kə̀ nwɔŋ aa báráàn gáàm aí səǹ də sé.

¹² Vɛ́nà, bə́ í' yíl obə́ bə̀ də́'ǹmbə̀ kə̀ nɛ́b kam bəraa bə̀ tə́ yíl boò piìn kə̀ yíl boò ní rə sé. Bə̀ kùd in in bə̀ də́'ǹ boò, bɔ̀b yíl boò bə̀ də́'ǹmbìá. Bə̀ də́' yíl boò tə́ kə̀ yíl boò ní. Bə̀ kèéd bərá!

¹³ Obə́ gə́, bə́ mà' kùlə́ taà nɛɛ̀n gá. Mà' bá də́'ǹ kə̀ tùsaa Vɛnɛ́b zíg bə́ roó, kə̀ obə́ bə̀ kpaŋ̀ piìnmbə̀ dá báà wə́ə́ aí kàrú zé.

¹⁴ Obə́ gə́, taà bə́ dàà bɛŋə̀ bə́ bəd sé, yaà bə́ wə́ə́ aí kàrú yée gə́ roó. Kàandə, yaà bə́ wə́ə́ì aí kàrú, kə̀ aí bə̀ Nwɔŋ Puu Sɔ̀ɔ̀nkè aa bə́ gám Krístù yílə́ rə baànmbìá.

¹⁵ Kə̀ aakíin də, vúg taà bə́ dàà bɛŋə̀ aa bə̀ zíg bə́ rə gá. Bít bə́ mà' kùlə́ kə̀ tùsaa nɛ́b kambəd mà' sə̀n də gá. Zá bə́ tə́ tɛ́m zígǹ, bə́ bàà tɛ́mbagké aí bə̀ kàŋ dá dáàn númú. Bít bá kíìn báàn tù' zùúm pɛ̀sə́ bə̀ ma'ǹmbə̀ aí tə́ŋú, kə̀ kuùmbə̀ sɛŋ gə́ kóólé, bɛŋə̀ aa Vɛnɛ́b zíg bə́ rə ba;

¹⁶ bɔ̀b bá taà báàn Nwɔŋ Puu Sɔ̀ɔ̀nkè aànmbə̀ yɛ́b bəraa aí bòórú yérə ba. Bə́ mà' kùlə́ kə̀ tùsaa nɛ́b bəd mà' boò lɛsú rə gá.

¹⁷ Kàandə kɔ̀, kìínmbə̀ nɛɛ̀n aa Núúboòd Gìdń bàà rə kíin: «Màn aa í'ì kùlə́ ma'ǹmbə̀ rə, oò mà' kùlə́ kə̀ tùsaa Báátììkpɛ̀ŋ mà' roó.»

¹⁸ Vɛnɛ́b kè' nɛ́b aa bə̀ káŋ yíl boò kə̀ yíl boò ní rə gá. Zá Vɛnɛ́b kè' màn aa Báátììkpɛ̀ŋ gám nwɔŋ sɔ̀ɔ̀nkè oò yílə́ roó.