2 Korintu 1 - Núúboòd Gú'dúgke Puu Sambə́ Nwɔŋú bìá

Dɔ̀msɛ̀lá

¹ Mə́ bád núúboòraa yée, kə̀ ɔ̀dkudvɛɛ̀l Timote tá. Kə̀ nɛɛ̀n aa Vɛnɛ́b í' rə kíin, mə́ bíl taà Yéésù Krístù gbantumsàá. Bə́ bád núúboòraa yée, Eklisiya bəraa Korintu bìlə́ roó, kə̀ Vɛnɛ́b nɛ́b Gìdń bəraa bə̀ ləə bìl bəraa Korintu bìl kàd bə, Akaya yɛ́b bəroó.

² Báá bə́n Vɛnɛ́b, kə̀ Báátììkpɛ̀ŋ Yéésù Krístù tá, boò mà' ii pə̀dkèá, bít boò pii ii tɛbàá.

Pol tə́ Vɛnɛ́b mɔ̀'nàá

³ Báà káŋ̀ Vɛnɛ́bá, Báá bə́n Tììkpɛ̀ŋ Yéésù Krístù bóòra, báá aa tə́ bə́n búúd ɛgǹ bé'ǹ doó. Bít oòra kùmsə̀n Vɛnɛ́b aa tɛ́' sáá bə́n tɛ́m, in gə́ kóólé bə̀ roó!

⁴ Pii bə́n tɛbàá, sɛŋ aa bə́n tə́ən gbò'kè rú rə gə́ kóólé, bɔ̀b báà kuùm kə̀ kpɛŋsɛ́lá, bɔ̀b báà piìn nɛ́b kambəd tɛ́m tɛbàá, sɛŋ aa bə̀ tə́ gbò'kè rú rə gə́ kóólé.

⁵ Kə̀ aakíin, bə́n tə́ən taà Krístù búúd zùúm bəraa bé' rə bé'ǹ kɔ̀. Bít kə̀ aarə kíin kɔ̀, bə́n tə́ən taà tɛ́m tɛbə̀ gbà'á bɔbm̀ kə̀ Krístù ra.

⁶ Búúraa bə́ tə́ í'ǹ də, bɔ̀b ìì bɔ̀b kə̀ tɛ́m tɛbàá, bít kə̀ súúkeá. Tɛ́m íí tɛbì gə́, bɔ̀b ìì bɔ̀b kə̀ kpɛŋsɛ́l búúd luùm nə́ŋ̀ní aa bə́n tə́ən bé'ǹ də sidǹmbìá.

⁷ Kə̀ aakíin də, bə́ tə́ kə̀ tɛ́m zígke və̀'kè aí ba. Kàandə, bə́ gàb yàá, nɛɛ̀n aa íí tə́ búúd luùm nə́ŋ̀ní aa bə́ bé' rə bé'ǹ kɔ̀ rə kíin, tɛ́m tɛ́'ǹmbə̀ luùm nə́ŋ̀ní aa Vɛnɛ́b pii bə́ rə, íí dá bɔbm̀ kɔ̀.

⁸ Ɔ̀dkudvɛɛ̀l mə́ í'sɛ̀lbə̀ bərá, bə́ í' ìì gàb búúd bəraa bə́n bé'ǹ zɔ̀ŋə Aziya yɛ́b bərə kúnú. Pi'kè oòrə, kàŋ kàn bə́n yàá. Bə́n báàn sidǹmbə̀ sé. Bə́ zíg tɛ́m kuùmbə̀ kə̀ gɔ̀ŋsə́ sé.

⁹ Bə́ bàà nyà'aa val dá bə́ kíìn koràá. Kə̀ aakíin də, tɛ́m zígke obə́ bə̀ bán diìnmbə̀ obə́ yílə́ ní gá. Zá bá tɛ́m zígǹ Vɛnɛ́b aa tə́ val bəd díìm də ba.

¹⁰ Oòra nyá'kè' báà sə̀n val luùm aarə naú, bít nyá' dá bə́ kíìn ke'ǹ sɔ̀ŋ. Bə́ zíg tɛ́m bə́ tə́ oò ba, bít nyá' dá bə́ sə̀ní ke'ǹ sɛŋ gə́ kóólé.

¹¹ Kə̀ yíl aí bə̀ má, ìì láŋ bə́ kə̀ Vɛnɛ́b nyɛɛ̀mbìá. Kə̀ aakíin də, Vɛnɛ́b kè' dá nyɛmsɛ́l aa nɛ́b zùúm bəd tə́ nyɛɛ̀m obə́ yílə́ rə kíìn í'nàá. Dá bə́ insɔ̀ɔ̀nkè aarə kíìn piinàá, bít nɛ́b zùúm bəd bə̀ dáù kíìn mɔ̀'ǹ obə́ bòórú.

Pol gbá' sɛŋ aa və̀d zíg də númú

¹² Aa yée in aa tə́ mə́ tɛ́m sɔ̀ɔ̀nkè piìn doó. Inselké bə́ bàà tə́ bə́ kíìn nyɛ́'nàá. Bə́ mà' tù' nɛ́b aa zɔ̀ŋə yɛb bərə tə́ŋú, bít aa kàn nɛɛ̀n də, aí tə́ŋú; invaksə́ bə sé, gúsuúm bə sé. Kə̀ láŋke Vɛnɛ́b bìá, bə́ kùmà taà gìdńná. Aarə kə̀ ingabké nɛ́ŋə̀ zɔ̀ŋə yɛ́b bə bə̀ gá, zá kə̀ pə̀dkè Vɛnɛ́b bìá.

¹³ Núúboòd bəraa mə́ tə́ ii bádǹ yée, nwɔŋ gbò'kè nə́ŋ̀má rú wərə̀ sé.

¹⁴ Íí gàb bə́ì zɔ̀gɔ̀; bə́ zíg tɛ́m gàb íí dá bə́ kíìn kudǹ nyɛdkè. Tɛ́m oò yárì kə̀ obə́ra, kìínmbə̀ obə́ kɔ̀ tɛ́m tə́ bə́ yádǹ kə̀ aí rə kíin.

¹⁵ Kə̀ taàbìá, mə́ sèl taà taànmbə̀ aí kàrú sɛŋ iira, bɔ̀b aí bə̀ tɛ́m làmkè piìn zəgǹmbìá.

¹⁶ Kə̀ aakíin də, mə́ zíg bagǹmbə̀ aí kàrú, bɔ̀b taàn ɛɛ̀mbə̀ Makedoniya yɛ́b ba, bítsɔ̀ŋ mə́ bíràì Makedoniya yɛ́b bə gə́, máà bagǹnà aí kàrú sɔ̀ŋ, bɔ̀b ìì láŋ mə́ kə̀ in aa má kə̀ sɛ̀ɛ́n kpaŋ̀ ɛɛ̀m Yahudiya yɛ́b bəroó.

¹⁷ Sɛŋ aa mə́ tə́ nwɔŋ aa seèl lə, mə́ ɛ̀g kə̀ nwɔŋ pɛ̀sə́ bə̀ kíin sínì? Sínkɔ̀ in bəraa mə́ sèl ma'ǹmbə̀ rə, mə́ gám tə́ gú' bəní kə̀ nɛ́b zɔ̀ŋə yɛ́b bə bə̀ bəd kíniì?

¹⁸ Vɛnɛ́b sə̀n sedako mə́ra' nwɔŋ aa mə́ bàà ii rə, mə́ gám gú' bəní sé.

¹⁹ Kə̀ aakíin də, nwɔŋ aa Silas, Timote, kə̀ máá mə́ Pol tá, bə́ gámi Yéésù Krístù, Vɛnɛ́b Wàà yílə́ rə, nwɔŋ lód bə̀ gá.

²⁰ Kə̀ Yéésù ra, bə́n bé'ǹ taà in aa Vɛnɛ́b bàà dàà rə gə́ kóólé tə́ vɛ́nà. Tə́ kàangə́, kə̀ Yéésù Krístù ra, bə́n tə́ən taà baàn «oò kùm kàani» bɔ̀b Vɛnɛ́b káŋ̀mbìá.

²¹ Vɛnɛ́b kə̀ yíl oò bìá, yaà və́' bə́ sə̀n kə̀ aí tá, gɔ̀ŋsə́ rú, kə̀ wálke kə̀ Krístù ra. Vɛnɛ́b kə̀ yíl oò bìá, sààvúŋ zíg tɔ̀b bə́n sə̀n gààd kílə́m yílú.

²² Vɛnɛ́b bád nə́gə́l oò obə́n tɛ́mú, bít éèn páá sə̀n Nwul Gìdń obə́n tɛ́mú, kìínmbə̀ dun ko'ǹmbə̀ insɔ̀ɔ̀nkè bəraa zíg bə́n də bə̀ kíin.

²³ Máá gə́, mə́ pà' Vɛnɛ́b tə́ kìínmbə̀ sedako mə́ kíin, máá gɔ̀ŋsə́ rú' mə́ dùg gúsuúmì gə́, oò lò' mə́ kúnú. Mə́ bíd Korintu bìlú síndə, bɔ̀b tɛ́m íí oò yɛɛ̀l sí.

²⁴ Íí və̀' ìì tɛ́mbagké rú. Bə́ í' gààd ləə̀nmbə̀ aí yílú, tɛ́mbagké íí rú sé. Zá bə́ í' tù' ma'ǹmbə̀ kə̀ aí tá, bɔ̀b aí bə̀ tɛ́m làmkè piìnmbìá.