1 Yohana 5 - Núúboòd Gú'dúgke Puu Sambə́ Nwɔŋú bìá

Bə́n kaàn nɛ́b aa zɔ̀ŋə yɛ́b bərə yàá

¹ Nɛ́ŋə̀ aa kè' yàá, Yéésù kùmsə̀n Krístù rə, nɛ́ŋə̀ aarə, kùmsə̀n Vɛnɛ́b Wàá. Màn aa í' Báá rə, dá í'ǹ kə̀ yɛb oò bəd tá.

² Bə́n tə́ən Vɛnɛ́b í'nàá, bít bə́n tə́ən tù' ma'ǹ kə̀ indaŋ̀mbə̀ oò bəd gə́, báan taà gabàá, bə́n í'ǹ Vɛnɛ́b nɛ́b bəd tə́ kúnú.

³ Níì kùmsə̀n í'ǹmbə̀ Vɛnɛ́b gú? Dáà nɛ́ŋə̀ í' Vɛnɛ́bì gə́, dá indaŋ̀mbə̀ oò bəd kíìn ke'nàá. Ko'ǹmbə̀ indaŋ̀mbə̀ oò gə́, gbò' bə́n gbàákù sé.

⁴ Kàandə, Vɛnɛ́b yɛb gə́ kóólé, bə̀ dákíìn báàn nɛ́b zɔ̀ŋə yɛ́b bə bə̀ kaànmbə̀ kə̀ kpɛŋsɛ́lá. Kə̀ Vɛnɛ́b bagǹmbìá, báan taà nɛ́b aa zɔ̀ŋə yɛ́b bərə kanàá.

⁵ Nɛ́ŋə̀ nə́ŋ̀má bán nɛ́b zɔ̀ŋə yɛ́b bə bə̀ kaànmbə̀ gá, sìná màn aa kè' yàá, Yéésù kùmsə̀n Vɛnɛ́b Wàà roó.

Sedako ma'ǹmbə̀ Yéésù Krístù yílú

⁶ Yéésù Krístù kùmsə̀n màn aa yaà zɔ̀ŋə yɛ́b bə kə̀ wəlá bít kə̀ nyɛ̀lə́m doó. Yaà kə̀ wəl ní gá, zá yaà kə̀ wəlá bít kə̀ nyɛ̀lə́má. Bít Nwul Gìdń mà' sedako, bàà gə́, nwɔŋ aarə tə́ vɛ́nà; kàandə, Nwul Gìdń kùmsə̀n vɛ́nà.

⁷ Sedako bəraa toorə yée, bə̀ ì' bə́n sə̀n, Yéésù Krístù kùmsə̀n Vɛnɛ́b Wàá'

⁸ Nwul Gìdńná, wəlá, kə̀ nyɛ̀lə́má. Boò toorə kóólé, bə̀ wál tə́ nə́ŋ̀ní.

⁹ Màìgə́, nɛ́b bəd mà' sedakoì gə́, bə́n ke'ǹ kúnú. Zá sedako aa Vɛnɛ́b mà' rə, kànsə̀n kə̀ nyɛdǹmbìá; aarə sedako aa mà' Wàà oò yílə́ roó.

¹⁰ Kə̀ aarə kíni, nɛ́ŋə̀ aa bàg Vɛnɛ́b Wàà rə, zíg sedako aa bə̀ mà' rə tə́ oò tɛ́mú, zá màn aa bàg Vɛnɛ́b síndə gə́, zíg Vɛnɛ́b tə́ nɛ́ŋə̀ gúsuúm bìá. Kàandə, kè' Vɛnɛ́b sedako aa mà' Wàà oò yílə́ rə sé.

¹¹ Sedako aa mà' rə yóo' Vɛnɛ́b pii bə́nnà gɔ̀ŋsə́ aa bɛ́d bə gá roó, bít gɔ̀ŋsə́ aa bɛ́d bə gá rə, tə́ Wàà oò rú.

¹² Màn aa bàg Wàà aarə, bɔ̀b gɔ̀ŋsə́ aarə yàá; nɛ́ŋə̀ aa wál kə̀ Vɛnɛ́b Wàà sə́n də, bɔ̀b gɔ̀ŋsə́ aarə gá.

Gɔ̀ŋsə́ aa bɛ́d bə gá roó

¹³ Mə́ bári nwɔŋ aa yée, bɔ̀b ìì gàb kúnú, íí tə́ kə̀ gɔ̀ŋsə́ aa bɛ́d bə gá rə naú, nɛ́b aa íí bàg Vɛnɛ́b Wàà nə́gə́l loó.

¹⁴ Kə̀ taàbìá, báà zígǹ tɛ́m Vɛnɛ́b naú' bə́n gabm̀ yàá, dá bə́n nwɔŋ kíìn zɛŋàá, bə́n dɛdǹnì kə̀ nɛɛ̀n aa í' rə kíin doó.

¹⁵ Kə̀ aakíin, bə́ŋyée bə́n gabm̀ yàá, tə́ bə́n kíìn zɛŋàá; bə́n dɛdǹnə̀ tə́ níì kóólé, dá bə́n kíìn piinàá.

¹⁶ Dáà nɛ́ŋə̀ nə́ŋ̀ bé' ɔ̀dkudvɛɛ̀l oò mà' invaksə́ nə́ŋ̀ aa àà nɛ́ŋə̀ valə́ gá rəì gə́, oò nyɛ̀m Vɛnɛ́bá, bít Vɛnɛ́b kɔ̀ dá ɔ̀dkudvɛɛ̀l aarə gɔ̀ŋsə́ kíìn piinàá. Aarə dá sɔɔ̀n kə̀ nɛ́b aa invaksə́ boò bəd àà bə̀ valə́ gá roó. Zá invaksə́ nə́ŋ̀ túrú, oò gə́, àà nɛ́ŋə̀ kíìn valú. Aarə gə́, mə́ sàà baànmbə̀ boò nyɛ̀m Vɛnɛ́b kə̀ taà sé.

¹⁷ Tù' vaksə́ gə́ kóólé, invaksá. Zá invaksə́ kambəd túrú, àà nɛ́ŋə̀ valə́ gá.

¹⁸ Bə́n gabm̀ yàá, Vɛnɛ́b yɛb gə́, bə̀ dìì invaksə́ ní ma'ǹmbə̀ gá. Kàandə, Vɛnɛ́b Wàà tə́ bə̀ kíìn nwánàá, bít Nɛ́ŋə̀ Vaksə́ mà' bán bə̀ in gá.

¹⁹ Bə́n gabm̀ yàá, bə́n Vɛnɛ́b yɛbá, zá yɛ́b gə́, kə̀ zɔ̀ŋtá, tə́ Nɛ́ŋə̀ Vaksə́ nɛɛ̀n tɛ́mú.

²⁰ Bə́n gabm̀ yàá, Vɛnɛ́b Wàà yaà yàá, bít pii bə́n tɛ́m nwɔŋ bə̀ kiìn yàá, bɔ̀b báà gabm̀ Vɛnɛ́b aa Vɛnɛ́b vɛ́nà roó. Kùm bə́n wáàl tə́ kə̀ Vɛnɛ́b aa Vɛnɛ́b vɛ́nà rə tá, Wàà oò Yéésù Krístù rú. Oòra kùmsə̀n Vɛnɛ́b sɔ̀ɔ̀n vɛ́nà. Oòra kùmsə̀n gɔ̀ŋsə́ aa bɛ́d bə gá roó.

²¹ Yɛb í'sɛ̀lbə̀ mə́ bərá, ìì gú' yíl íí ra, kə̀ vɔɔm bəd pɔ̀bm̀bìá!