1 Yohana 1 - Núúboòd Gú'dúgke Puu Sambə́ Nwɔŋú bìá

Nwɔŋ gɔ̀ŋsə́ bìá

¹ Bə́ bári núúboòraa yée, Nwɔŋ aa tə́ gɔ̀ŋsə́ piìn də yílú. Nwɔŋ aa tə́ gɔ̀ŋsə́ piìn yérə, sɔ̀d nyàamdoorú, bɔ̀b bə́ŋ̀ in bəd kóólé séémíìn sé. Bə́ kìì nwɔŋ oò yàá, bə́ bé'ùwì kə̀ núù bə́ra. Bə́ ɛ̀gə̀ yàá, bít nɛɛ̀n bə́ bəd kɔ̀ pigə̀ yàá.

² Sɛŋ aa gɔ̀ŋsə́ aarə vúg bərə, bə́ bé'ù yàá; kə̀ taàbìá, bàà bə́ tə́ ii taà nwɔŋ oò nyɛ́'nàá, bít bə́ tə́ ii taà gɔ̀ŋsə́ bùúd aa kùmà Báá bə́n Vɛnɛ́b səǹ də nwɔŋ oò baanàá; gɔ̀ŋsə́ bùúraa Vɛnɛ́b pii bə́n doó.

³ In aa bə́ bé'à kə̀ núù bə́, bít bə́ kììà kə̀ túŋ bə́ rə, bə́ tə́ ii taà baanàá, bɔ̀b aí kɔ̀ ìì wál kə̀ obə́ tá. Kàandə, wálke obə́ bə̀ rə, tə́ kə̀ Báá tá, bít kə̀ Wàà oò Yéésù Krístù tá.

⁴ Bə́ bári nwɔŋ aa yée, bɔ̀b tɛ́m bə́n oò nyìì kə̀ làmkèá.

Vɛnɛ́b kùmsə̀n laa nyɛdkèá

⁵ Ìì zɛ̀ŋ nwɔŋ aa bə́ kììà Yéésù Krístù naà, bít bə́ tə́ ii baàn doó. Vɛnɛ́b kùmsə̀n laa nyɛdkèá; oò gə́, tígə́l zɔ̀gɔ̀má oò naà sé.

⁶ Bə́n baànnì bə́n wáàl tə́ kə̀ oòra, bít bə́n kuùm tə́ tígə́lə́ sɔ̀ŋ gə́, bə́n dugǹ gúsuúmá, bə́n baàn vɛ́nà sé.

⁷ Zá dáà bə́n kuùm tə́ zɔ̀ŋ nyɛdkè rú, kìínmbə̀ Vɛnɛ́b kɔ̀ kùm zɔ̀ŋ nyɛdkè rú yérə kíin gə́, bə́n wáàlǹnì kə̀ ɔ̀dnə́ŋ̀ bəd bə́n bòdba; bít Wàà oò Yéésù nyɛ̀lə́m, pà' zá' invaksə́ bəraa bə́n ma'ǹ dəì kóólé.

⁸ Bə́n baànnì bə́n ma'ǹ invaksə́ kɔ̀ gá gə́, bə́n záàn yíl bə́n tə́ kə̀ yíl bə́n ní, bít vɛ́nà obə́n naà sé.

⁹ Vɛnɛ́b gə́, nɛ́ŋə̀ wɔ̀ɔ̀làá, bít mà' in aa bàà bəǹ dá ma'ǹ də kúnú. Bàà bə́n i'ǹ invaksə́ bə́n bərì oò númú gə́, dá bə́n invaksə́ bə́n bəd kíìn lɛ́'ǹ daàn kóólé, bít báan kuùm nyɛdkè oò númú.

¹⁰ Bə́n baànì bə́n ma'ǹ invaksə́ síngə́, bə́n bí'ǹ Vɛnɛ́b tə́ nɛ́d gúsuúm bìá, bít vɛ́nà obə́n naà sé.