1 Timote 6 - Núúboòd Gú'dúgke Puu Sambə́ Nwɔŋú bìá

Kɔ̀' bərá

¹ Nɛ́b aa bə̀ tə́ kɔ̀' rə gə́ kóólé, boò ləə báá boò tììkpɛ̀ŋá. Boò káŋ̀ kíin kə̀ kaŋsɛ́l oò tə́ kóólé, bɔ̀b nɛ́b bəd boò gám nwɔŋ vaksə́ Vɛnɛ́b yílú sí, bít kə̀ insánke bə́n bəd yílú sí.

² Kɔ̀' bəraa báá boò tììkpɛ̀ŋ tə́ nɛ́d bagké rə, boò dààù ləə̀nmbə̀ sí; kaàndə, bə̀ ɔ̀dkudvɛɛ̀l bərá. Aa dá kaàn də, mà' boò dáù tù' kə̀ númú sɔ̀ɔ̀nkè. Kàandə, nɛ́b bagké bəraa bə̀ tə́ in nə́ŋ̀ bɔbm̀ yílú wərə̀ kə̀ tù' boò rə, bə̀ kùmsə̀n nɛ́b bagké bəraa bə̀ tə́ bə̀ í'ǹ doó. Aa yée kùmsə̀n in aa ń dá nɛ́b bəd sáàn doó, bít kə̀ aa ń dá bə̀ tuùm piìn, boò mà' n doó.

Insánke gúsuúm bə̀ bərá, bít kə̀ gbaŋə̀ sɔ̀ɔ̀n bərá

³ Dáà nɛ́ŋə̀ nə́ŋ̀ sán nɛ́b bəd insánke ɔ̀d nə́ŋ̀ gɔ̀ŋ yàá, kè' Báá bə́n Tììkpɛ̀ŋ Yéésù Krístù nwɔŋ sɔ̀ɔ̀n sé, bít sán nɛ́b bəd kuùmbə̀ kìínmbə̀ nɛɛ̀n aa Vɛnɛ́b í' rə kíin síngə́,

⁴ oò gə́, wùb tə́ kə̀ yíl pa'kéá, bít gàb in nə́ŋ̀má sé. Oò gə́, tə́ kə̀ í'sɛ̀l vaksə́ pìrə̀ bə̀ i'ǹ naú, bít álsɛ̀l ma'ǹmbə̀ in tɛdń bəd yílú. In aa dáà vúgǹnà oò naà rə yóo' kisɛ̀lá, álsɛ̀lá, mud bərá, inselké vaksá,

⁵ bít kə̀ álsɛ̀l aa bɛŋə̀ bə síndoó. Nɛ́b luùm aarə, inselké boò yɛɛ̀l yàá, nwɔŋ sɔ̀ɔ̀n boò naà sɔ̀ŋ sé. Bə̀ sèl boò tɛ́mú gə́, kuùmbə̀ kìínmbə̀ nɛɛ̀n aa Vɛnɛ́b í' rə kíin də, aarə kpaŋ̀ in bə̀ bɔbm̀má.

⁶ Vɛ́nà, kuùmbə̀ kìínmbə̀ nɛɛ̀n aa Vɛnɛ́b í' rə kíin gə́, kùmsə̀n in gbà'á aa nɛ́ŋə̀ dá bɔbm̀ doó, nɛ́ŋə̀ bààì in aa bəǹ kə̀ naà rə ní də́ŋ bəǹ yàá, bít í' in ɔ̀d nə́ŋ̀ síngə́ roó.

⁷ Kə̀ aakíin də, bə́n yaànnà zɔ̀ŋə yɛ́b bə tɛdńní, in nə́ŋ̀má bə́n pa'ǹnà naà sé, bít báan bídǹ tɛdńní, in nə́ŋ̀má bə́n pa'ǹ naà gá.

⁸ Kə̀ taàbìá, bə́n tə́ən kə̀ inlíìnmbə̀ naú, bít bə́n tə́ən kə̀ gɔ̀' naà gə́, aarə oò də́ŋ bə́n kúnú.

⁹ Zá nɛ́b aa bə̀ í' kuùmbə̀ nɛ́b gbaŋə̀ bə̀ bəd də gə́, bə̀ yi' tə́ sɛŋ gə́ kóólé in zááke rú, kə̀ zàŋwà rú. Bít tɛ́m boò tə́ diìn nyiìnmbə̀ sɛŋ gə́ kóólé kə̀ í'sɛ̀l vaksə́ zùúmá. Kàandə kɔ̀, dìŋ bə̀ tə́ nɛ́b bəd aàn val zèd kə̀ zèd bə̀ rú, bít bɔ̀bke rú.

¹⁰ Kàandə, í'sɛ̀l ba' bə̀ kùmsə̀n lígə́d invaksə́ gə́ kóólé bìá. Bít nɛ́b kambəd í' ba' rəì gbàákù, áá bə̀ dàà tɛ́mbagké kpaŋ̀ yàá, bít bə̀ yɛ̀l tɛ́m boò tə́ kə̀ nwuukè bərá.

Nɛɛ̀n aa Timote dá kuùm dú roó

¹¹ Zá ám gə́, ń Vɛnɛ́b nɛ́ŋàá, nùù ǹ dàà in bəraa kúnú. Bít ǹ sàà wɔ̀ɔ̀làá, kuùmbə̀ kìínmbə̀ nɛɛ̀n aa Vɛnɛ́b í' rə kíin, kə̀ tɛ́m bagkéá, í'sɛ̀lá, kə̀ in sidǹmbìá, bít kə̀ kuùmbə̀ ɔ̀gkeá.

¹² Aa dá sɔɔ̀n də gə́, ǹ nə́' nə́gə̀d sɔ̀ɔ̀nkè tɛ́mbagké bìá, bɔ̀b m̀ bɔ̀b kə̀ gɔ̀ŋsə́ aa bɛ́d bə gá roó. Kàandə, Vɛnɛ́b dɛ̀dnnà yaà ǹ kùm gɔ̀ŋsə́ aa rú, sɛŋ aa ń mà' kə̀ sedako tɛ́mbagké rú, nɛ́b zùúm númú roó.

¹³ Mə́ tə́ən kíìn baàn kə̀ kpɛŋsɛ́lá, Vɛnɛ́b aa tə́ in bəd kóólé gɔ̀ŋsə́ piìn də númú, bít Yéésù Krístù aa mà' sedako sɔ̀ɔ̀nkè vɛ́nà bə̀ Pontu Pilatu númú rə númú'

¹⁴ ǹ ləə indaŋ̀mbə̀ bəraaú. Ǹ zíg bə̀ kíìn sɔ̀ɔ̀nkè, bɔ̀b kóó nɛ́ŋə̀ nə́ŋ̀má oò bɔ̀b invaksə́ ám naà sí, yaà oò wə́ə́ sɛŋ aa Báátììkpɛ̀ŋ Yéésù Krístù dáà bídǹnà bərə zé.

¹⁵ Sɛŋ aa Vɛnɛ́b və̀d zíg də, Vɛnɛ́b yaà dáù i'ǹ obə́n núùrú, nɛ́ŋə̀ aa zígə̀ nɛɛ̀n yílú roó, bít oò nə́ŋ̀ní kùmsə̀n gààd kpɛŋsɛ́l bìá, gààd bəd Gààrá, bít báátììkpɛ̀ŋ bəd Báátììkpɛ̀ŋá.

¹⁶ Oò nə́ŋ̀ní tə́ŋtə́ŋ, kùmsə̀n Vɛnɛ́b zèd kə̀ zèd bìá. Kùm tə́ laa nyɛdkè aa nɛ́ŋə̀ bán gbadǹmbə̀ bə wərə̀ gá rə rú. Nɛ́ŋə̀ nə́ŋ̀má bé' bèrə̀ sé, nɛ́ŋə̀ nə́ŋ̀má bánə̀ bé'ǹmbə̀ gá kɔ̀. Kaŋsɛ́lá, bít kə̀ kpɛŋsɛ́l zèd kə̀ zèd bìá, tə́ oò naú! Oò kùm kaàni.

Tɔ̀gke nɛ́b gbaŋə̀ bə̀ bərá

¹⁷ M̀ bàà nɛ́b gbaŋə̀ bə̀ bəraa zɔ̀ŋə yɛ́b bərə nwɔŋ kə̀ kpɛŋsɛ́lá. Boò pà' yíl sí, bít boò zíg tɛ́m boò gbaŋə̀ aa ləə sə́g sə́g bə gá rə bə sí. Zá boò zíg tɛ́m boò Vɛnɛ́b ba, oòra pii sə̀n in zùúm gə́ kóólé, bɔ̀b báà kiìn tɛ́m làmkèá.

¹⁸ M̀ bàà boò mà' tù' sɔ̀ɔ̀ná. Tù' sɔ̀ɔ̀n oò kùmsə̀n gbaŋə̀ boò ra. Boò kùm nɛ́b in bə̀ piìn kə̀ tɛ́m yádkeá. Pɛ̀l boò gàb in aa bə̀ kə̀ naà rə kə̀ nɛ́b kam bərá.

¹⁹ Kə̀ aakíin, bə̀ dá taà gbaŋə̀ sɔ̀ɔ̀n bəd púùn kə̀ yíl boò ra, bít kə̀ gbaŋə̀ və̀'kèá, sɛŋ aa dáà yaàn númú rə bìá. Bít kàanyée gə́, bə̀ dá taà báàn gɔ̀ŋsə́ vɛ́nà bə̀ bɔbm̀bìá.

Dɔ̀msɛ̀l aa dùg kə̀ bòd doó

²⁰ Ɔ̀dzéd mə́ Timote, kò' ǹ kùd nwɔŋ aa Vɛnɛ́b piinnà yéroó. Ǹ nùù nwɔŋ tɛdń bəraa dáá kə̀ tɛ́mbagké síndoó. Ǹ nùù pìrə̀ vaksə́ bəraa nɛ́b kambəd tə́ dɛdǹ ingabkéá, zá ingabké gá roó.

²¹ Nɛ́b kam zíg yíl boò bənə́ tə́ənnə́ kə̀ ingabké aarə naú. Zá nɛ́b aarə, áá bə̀ dàà kpaŋ̀ tɛ́mbagké rú bə̀ yàá. Mə́ tə́ Vɛnɛ́b nyɛɛ̀m, bɔ̀b pə̀dkè oò, oò kùm kə̀ aí tə́ kóólé.