1 Timote 1 - Núúboòd Gú'dúgke Puu Sambə́ Nwɔŋú bìá

Dɔ̀msɛ̀lá

¹ Núúboòraa vúgà máá mə́ Pol, Yéésù Krístù gbantumsə̀ naú. Kə̀ kpaŋ̀ Vɛnɛ́b Nɛ́d Nɛ́ŋə̀ bə̀ Súùn bə́n bìá, bít kə̀ Yéésù Krístù màn aa bə́n tə́ən tɛ́m zígǹ oò naà roó, mə́ kùm taà Yéésù Krístù gbantumsàá.

² Mə́ bád núúboòraa yée Timote ra, oòra kùmsə̀n wàà vɛ́nà bə̀ mə́ tɛ́mbagké rú bìá. Mə́ dɔ̀m m yàá. Mə́ nyɛ̀m Báá bə́n Vɛnɛ́b, kə̀ Yéésù Krístù Báá bə́n Tììkpɛ̀ŋ tá, boò mà' n pə̀dkèá, ɛ̀g boò bé' n búúrá, bít boò pii n tɛbàá.

Ìì gú' yíl íí kə̀ insánke gúsuúm bə̀ bərá

³ Sɛŋ aa mə́ tə́ ɛɛ̀m Makedoniya yɛ́b bərə, mə́ bàà n, ǹ kùm Efesus bìlú. Nɛ́b kam wərà, bə̀ tə́ nɛ́b bəd nwɔŋ gúsuúm bə̀ sánàá. Dáá ǹ bàà bə̀ kə̀ kpɛŋsɛ́lá, boò dàà kíìn nɛ́b bəd nwɔŋ gúsuúm bə̀ aarə sáànmbìá.

⁴ Ǹ bàà bə̀, boò dàà súúsu boò bəraa roó, bít boò dàà kíìn dam bəd nə́gə́l gádǹmbìá. Nwɔŋ aarə, dá bə̀ álsɛ̀l ní zá'nàá, láŋ bə̀ Vɛnɛ́b tù' ma'ǹmbə̀ bə gá; Vɛnɛ́b tù' gə́, ma'míìn kə̀ tɛ́mbagké ní.

⁵ In aa íí zíg tɛ́m bɔbm̀bə̀ indaŋ̀mbə̀ aa rú rə, í'sɛ̀l aa vúgà tɛ́m nyɛdkè rú roó, kə̀ inselké sɔ̀ɔ̀nkèá, bít kə̀ tɛ́mbagké vɛ́nà bìá.

⁶ Nɛ́b kambəd áá bə̀ dàà insɔ̀ɔ̀n bəraa yée yàá, bít bə̀ bàg tə́ nwɔŋ tɛdń bəraa nɛ́b bəd tə́ gáàm doó.

⁷ Bə̀ ɛ̀g yíl boò tə́ kìínmbə̀ nɛ́b aa gàb bə̀ kàn kə̀ Musa indaŋ̀mbə̀ rə kíni. Zá bə̀ gàb nwɔŋ aa bə̀ tə́ baàn də sé, bít bə̀ gàb nwɔŋ wàà aa bə̀ tə́ baàn kə̀ váàndo rə sé.

Indaŋ̀mbə̀ nwɔŋá

⁸ Bə́n gabm̀ yàá, indaŋ̀mbə̀ gə́, tə́ sɔ̀ɔ̀nkèá, nɛ́ŋə̀ mà'ì kə̀ tù' kə̀ nɛɛ̀n aa Vɛnɛ́b í' rə kíin gə́ roó.

⁹ Kə̀ aakíin də, kìì báà kudǹ nwɔŋ aa yée kíìn sɔ̀ɔ̀nkè. Indaŋ̀mbə̀ yaà nɛ́b wɔ̀ɔ̀lə̀ bəd bə̀ gá, zá yaà nɛ́b invaksə́ bə̀ ma'ǹ bəd sunú, nɛ́b aa məə nɛ́b bəd ləə̀nmbə̀ rə sunú, nɛ́b aa ləə Vɛnɛ́b indaŋ̀mbə̀ síndə sunú, nɛ́b aa bə̀ kùm gɔ̀ŋsə́ gìdńnú síndə sunú, nɛ́b aa bə̀ tə́ in aa tə́ Gìdń də dúlǹ də sunú, nɛ́b aa bə̀ tə́ báá boò lodǹ kə̀ nà' boò bəd tə́ rə sunú, bít nɛ́b nɛ́b bəd bə̀ lodǹ kambəd sunú. Indaŋ̀mbə̀ yaà,

¹⁰ nɛ́b labsə̀ bə̀ ma'ǹ bərá, kə̀ nɛ́b aa tə́ kilə̀ wáàl nɛ́ŋ váàndoá kə̀ nə́ŋ váàndoá, sínkɔ̀ nɛ́ŋ kéèndo kə̀ nɛ́ŋ kéèndo rə sunú; nɛ́b aa bə̀ tə́ nɛ́b bəd ko'ǹ lɛ́bm̀ kə̀ kɔ̀' kíin doó, kə̀ nɛ́b gúsuúm bə̀ bərá, nɛ́b in gúsuúm bə̀ nwɔɔ̀m bərá, bít kə̀ nɛ́b aa mà' in gə́ kóólé, dáá kə̀ insánke vɛ́nà bə̀ síndə sunú.

¹¹ Insánke aarə, vúgà núúboòd Nwɔŋ Puu Sɔ̀ɔ̀nkè aa bə̀ pii máà naà, máà bàà nɛ́b bəd də rú. Nwɔŋ Puu Sɔ̀ɔ̀nkè aarə, gám nwɔŋ tə́ Vɛnɛ́b kaŋsɛ́l bə̀ yílú, Vɛnɛ́b aa báannə̀ káŋ̀ doó.

Pol sèl tə́ insɔ̀ɔ̀nkè bəraa Krístù mà'ù rə zá'nàá

¹² Mə́ mɔ̀' Báá bə́n Tììkpɛ̀ŋ Yéésù Krístù yàá. Oòra pii mə́ sə̀n kpɛŋsɛ́lá, máà mà' tù' bəǹ da. Mə́ mɔ̀'ù yàá, ɛ̀g mə́, mə́ də́ŋì tɛ́m zígǹmbə̀ ba, bít sààvúŋ mə́, máà kùm obəǹ tùsú.

¹³ Nyàam də, sɛŋ aa bə́ŋ̀ mə́ bíl nɛ́d bagké síndə, mə́ gám nwɔŋ vaksə́ oò yílú. Mə́ tɔ̀gə̀d nɛ́b oò bərá. Mə́ sàà bə̀ kə̀ nwɔŋ saasɛ́lá. Zá Vɛnɛ́b ɛ̀g bé' mə́ búúd yàá. Kàandə, mə́ kə̀ tɛ́mbagké naà sé, bít mə́ gàb in aa mə́ tə́ ma'ǹ də sé.

¹⁴ Báá bə́n Tììkpɛ̀ŋ mà' mə́ pə̀dkè zùúm. Kə̀ aakíin də, pii mə́ tɛ́mbagkéá, kə̀ í'sɛ̀l aa Yéésù Krístù rú roó.

¹⁵ Nwɔŋ aa yée də́ŋì tɛ́m zígǹmbə̀ ba, kóó nɛ́ɛ̀réè oò kè' kúnú, gàbkíìn bə sé. Yéésù Krístù yaà zɔ̀ŋə yɛ́b ba. Yaà nɛ́b invaksə́ bə̀ ma'ǹ bəd súùnmbìá. Máára mə́ kàn bə̀ sə̀n kə̀ invaksə́ ma'ǹmbìá.

¹⁶ Zá kə̀ taàbìá, Vɛnɛ́b ɛ̀g bé' mə́ taà búúrá, bɔ̀b Yéésù oò ì' insidké gbà'á oò máá ba. Máára mə́ kùmsə̀n nɛ́ŋə̀ aa kàn bə̀ kə̀ invaksə́ ma'ǹmbə̀ roó. Nɛɛ̀n aa Krístù sìd mə́ rú, mə́ kùmà ɔ̀dmáàn oò, bít mà' yaà bí' mə́, mə́ bíl nɛ́d tù' bə̀ ma'ǹ oòrə, dá nɛ́b aa bə̀ tə́ù bagǹ də ma'ǹ nɛɛ̀n aarə rú, bít bə̀ dá gɔ̀ŋsə́ aa bɛ́d bə gá rə bɔbàá.

¹⁷ Mə́ tə́ gààd zèd kə̀ zèd bə̀ naàn káŋàá, val kò'ù kɔ̀ gá, bé'míìn kɔ̀ gá. Bít oò nə́ŋ̀ní kùmsə̀n Vɛnɛ́bá. Gbà'á kə̀ kaŋsɛ́l tá, bə̀ tə́ oò naú, zèd kə̀ zèrá! Oò kùm kàani.

Kpɛŋsɛ́l piìnmbə̀, bɔ̀b nə́gə̀d sɔ̀ɔ̀n nə́'ǹmbìá

¹⁸ Ámda ń wàà mə́ Timote ra, mə́ tə́ən nwɔŋ aa yée baanàá; nwɔŋ aarə, dáá tə́ kə̀ nwɔŋ aa vúgà Vɛnɛ́b naà, Vɛnɛ́b gbantumsə̀ bəd bə̀ gám nyàamdoorú ám yílə́ roó. Kò' ǹ və́' nwɔŋ aarə naú, bɔ̀b nə́gə̀d sɔ̀ɔ̀n bə̀ nə́'ǹná.

¹⁹ Bít ǹ kò' tɛ́mbagké ń da, kə̀ inselké sɔ̀ɔ̀nkè ám tɛ́mú. Nɛ́b kam lɛ́' bə̀ dàà inselké boò yàá, bít tɛ́mbagké boò bɔ̀b yàá.

²⁰ Hymenus kə̀ Alekzandriya tá, bə̀ tə́ nɛ́b aarə tə́ŋú. Mə́ pii bə̀ì Satan nɛɛ̀n tɛ́mú, bɔ̀b boò gàb kúnú, boò gám nwɔŋ vaksə́ Vɛnɛ́b yílə́ sí.