1 Piyɛr 3 - Núúboòd Gú'dúgke Puu Sambə́ Nwɔŋú bìá

Nɛɛ̀n aa nɛ́b vɔ̀ɔ̀m bagké bəd kə̀ nɛ́b kɛ́ɛ̀m bagké bəd tá, bə̀ dá kuùm dú roó

¹ Nɛɛ̀n aarə rú, aí kɔ̀ íí nɛ́b kɛ́ɛ̀m bərá, ìì ləə vɔ̀ɔ̀m íí bərá, bɔ̀b kóó dáà nɛ́b kam boò tə́ŋú, bə̀ kè' Vɛnɛ́b nwɔŋ sín máá, boò bɔ̀b tɛ́mbagké nɛɛ̀n aa íí kùm dú rə bòórú, nwɔŋ máá gám íí mú' bə̀ bə gá.

² Kàandə, bə̀ dá nɛɛ̀n aa íí kùm dú nyɛdkè, bít íí ləə Vɛnɛ́b dú rə bé'nàá.

³ Ìì sàà si' íí kudǹmbə̀, bɔ̀b oò sɔ̀ɔ̀n kíìn, kə̀ yíl gí' kùlə́ bə̀ bəd teènmbìá, kə̀ kɛ̀ɛ́ŋ ba' nwuukè bə̀ páànmbìá, sínkɔ̀ gɔ̀' sɔ̀ɔ̀nkè bəd vəə̀nmbə̀ sí.

⁴ Zá aa dá sɔɔ̀n də, sɔ̀ɔ̀nkè aí bə̀ oò vúgà tɛ́m ba, kìínmbə̀ nwul ɔ̀gkeá, bít kə̀ nwul tɛbə̀ bə̀ kíin. Aarə sɔ̀ɔ̀nkè aa dá kuùm zèd kə̀ zèd doó. Aarə tə́ kə̀ pɛ̀sə́ naà gbàákù Vɛnɛ́b númú.

⁵ Kə̀ aakíin, nɛ́b kɛ́ɛ̀m gìdń bəraa nyàamdoorú, bə̀ zíg tɛ́m boò Vɛnɛ́b naà rə, bə̀ bí' taà yíl boò bəd sɔ̀ɔ̀nkèá, bə̀ ləə vɔ̀ɔ̀m boò bərá.

⁶ Saratu kɔ̀ mà' kàani, ləə váàn oò Abraham kúnú, bít dɛ̀rə̀ «nɛ̀ná.» Bə́ŋyée, aí kɔ̀ íí Saratu yɛb kɛ́ɛ̀m bərá, dáà íí mà' sɔ̀ɔ̀nkè yàá, də́dǹ mà' ii kə̀ in nə́ŋ̀má síngə́ roó.

⁷ Íí nɛ́b vɔ̀ɔ̀m bəd kɔ̀, ìì gàb in aa kɛ́ɛ̀m íí bəd í' rə kúnú. Ìì kìì bə̀ nwɔŋ kúnú, kàandə, bə̀ kə̀ kpɛŋsɛ́l naà, kə̀ aí kíin sé. Ìì mà' kàani, bɔ̀b boò kɔ̀ boò bɔ̀b in tɛdńní bə̀ gɔ̀ŋsə́ bə̀ aa Vɛnɛ́b pii roó. Ìì mà' kàani, bɔ̀b Vɛnɛ́b oò kè' nyɛmsɛ́l íí kúnú.

Búúd í'ǹmbə̀ insɔ̀ɔ̀n ma'ǹmbə̀ bòórú

⁸ Bə́ŋyée gə́, íí kóólé, ìì kùm kə̀ inselké luùm nə́ŋ̀ní, bít ɛ̀g ìì bé' ɔ̀dnə́ŋ̀ bəd búúd íí bòdba. Ìì í' ɔ̀dnə́ŋ̀ kə̀ ɔ̀dkudvɛɛ̀l bəd kíin, ìì kùm kə̀ tɛ́m ɔ̀gkeá, bít kə̀ sɔ̀ɔ̀nkèá, aí bòdba.

⁹ Nɛ́ŋə̀ mà' ii invaksə́ì gə́, mà' ìì bí'ù sí; nɛ́ŋə̀ dúliyì kɔ̀, dúl ìì bí'ù sí. Zá aa dá sɔɔ̀n də, ìì nyɛ̀m Vɛnɛ́b oò mà' nɛ́ŋə̀ aa mà' ii invaksə́ rə pə̀dkèá. Kàandə, Vɛnɛ́b dɛ̀riyà taàbìá, bɔ̀b aí kɔ̀ ìì bɔ̀b pə̀dkè kɔ̀.

¹⁰ Kìínmbə̀ nɛɛ̀n aa Núúboòd Gìdń bàà rə kíin: «Màn aa í'ì gɔ̀ŋsə́ sɔ̀ɔ̀n bɔbm̀bìá, bít í'ì làmkè kiìnmbə̀ zɔ̀ŋə yɛ́b bərə, oò dàà kíìn nwɔŋ vaksə́ gáàmbìá, bít oò dàà gúsuúmá.

¹¹ Oò dàà invaksə́ ma'ǹmbìá, oò mà' insɔ̀ɔ̀ná, oò sàà tɛbàá, bít oò dìì taà ní saànmbìá.

¹² Kàandə, Báátììkpɛ̀ŋ ɛ̀g núù tə́ nɛ́b wɔ̀ɔ̀lə̀ oò bəd ba, bít túŋ oò kɔ̀ tə́ nyɛmsɛ́l boò bəd kiinàá. Zá Báátììkpɛ̀ŋ mà' nə́gə̀d tə́ kə̀ nɛ́b aa bə̀ tə́ invaksə́ ma'ǹ doó.»

¹³ Bít nɛ́ɛ̀réè dá ii sə̀n invaksə́ ma'ǹ gú, dáà íí dìì tə́ insɔ̀ɔ̀nkè ní ma'ǹmbə̀ gə́ roó?

¹⁴ Kóó dáà íí dá búúd bé'ǹ tə́ tù' wɔ̀ɔ̀lə̀ bəraa íí tə́ ma'ǹ də bòórú máá, Vɛnɛ́b gə́, dá ii nɛɛ̀n zígǹ yílú. Ìì nùù nɛ́ŋə̀ sí, bít tɛ́m oò nyá'gə́li kə̀ in aa bə̀ dá ii ma'ǹ də sí.

¹⁵ Zá ìì ɛ̀g Krístù aí tɛ́mú, kìínmbə̀ Báátììkpɛ̀ŋ kíin. Ìì nwán sɛŋ gə́ kóólé, ke'ǹ í'ǹmbə̀ nwɔŋ aa nɛ́b bəd dá ii dɛdǹ tɛ́m zígke aa aí naà rə yílə́ roó.

¹⁶ Zá kè' ìì í' kə̀ tɛ́m ɔ̀gkeá, bít kə̀ ləəkèá. In aa íí tə́ ma'ǹ də gə́ kóólé, tɛ́m íí oò bàà ii gə́, tə́ wɔ̀ɔ̀làá, bɔ̀b nɛ́b bəd pè' iiyì kə̀ gú' wadké gə́, nɛ́b aa tə́ nwɔŋ sɔ̀ɔ̀nsín gáàm aí yílú, nɛɛ̀n aa íí kùm dú sɔ̀ɔ̀nkè, kə̀ Krístù nɛ́b bagké kíin də, sə́ə́mnúù oò mà' bə̀ kə̀ nwɔŋ boò bəraa ìì tə́ gáàm doó.

¹⁷ Dáà Vɛnɛ́b í' yàá, ìì í' búúd gə́, aa dá sɔɔ̀n də, ìì í' búúd kə̀ insɔ̀ɔ̀n ma'ǹmbìá, kə̀ invaksə́ ma'ǹmbə̀ gə́ roó.

¹⁸ Kə̀ aakíin də, Krístù kə̀ yíl oò bìá, val ko'ù sɛŋ nə́ŋ̀ní, nɛ́b bəd kóólé invaksə́ bòórú. Oòrə, nɛ́ŋə̀ wɔ̀ɔ̀làá, val kò'ù nɛ́b bəraa wɔ̀ɔ̀lə̀ síndə bòórú, bɔ̀b aí bə̀ aànmbə̀ Vɛnɛ́b sunú. Sɛŋ aa bə̀ lò'ù rə, kə̀ nɛ́ŋə̀ sisá, zá sɛŋ aa Vɛnɛ́b dímə̀ kə̀ valə́ rə, kə̀ si' nwulú bìá.

¹⁹ Bít kə̀ si' nwulú bə̀ aa roó, ɛ̀m dá sán taà nwul kam bəraa wúltígə́l bə̀ rú rə iná,

²⁰ baànmbə̀ nɛ́b aa nyàam bə̀ məə Vɛnɛ́b ləə̀nmbə̀ rə nwul bərá, sɛŋ aa Vɛnɛ́b nwán kə̀ tɛ́m sidkéá, Nuhu tə́ kə̀ kə̀ə̀d gbà'á nyi'ǹ doó. Nɛ́b bəd zɔ̀gɔ̀ní, boò dàgwà, bə̀ pìì sə̀n kə̀ə̀d gbà'á aarə rú, bít wəl súú bə̀ yàá.

²¹ Wəl aarə, kùmsə̀n kìínmbə̀ baptisma aa tə́ bə́n súùn bə́ŋyée rə kíin' baptisma aarə, bɔ̀b oò sùg lígə́raa bə́n sisə́ rə gá, zá Vɛnɛ́b dɛdǹmbə̀, bɔ̀b sùg oò nyɛ́' bə́n tɛ́má. Baptisma aarə, súú bə́n yàá, kə̀ zá'ke Yéésù Krístù bə̀ valú.

²² Bə́ŋyée, Yéésù Krístù na'ì lɛgə́ poú, dáá kùm tə́ Vɛnɛ́b nɛɛ̀n váànú, dá ləə gààd tə́ malaika bəd yílú, nɛ́b gbàád kambəd yílú, bít kə̀ kpɛŋsɛ́l bəraa lɛgə́ paà rə yílú.