1 Piyɛr 1 - Núúboòd Gú'dúgke Puu Sambə́ Nwɔŋú bìá

Dɔ̀msɛ̀lá

¹ Núúboòraa vúgà máá mə́ Piyɛr, Yéésù Krístù gbantumsə̀ naú. Núúboòraa mə́ tə́ bádǹ yée, Vɛnɛ́b nɛ́b aa sààvúŋà, bə̀ kùm kìínmbə̀ sɛ̀ɛ́n bəd kíin, bə̀ saàl bəd Pontus yɛ́b ba, Galatiya yɛ́b ba, Kapadosiya yɛ́b ba, Aziya yɛ́b ba, bít kə̀ Bitiniya yɛ́b bərə bìá.

² Báá Vɛnɛ́b sààvúŋ iiyà kìínmbə̀ nɛɛ̀n aa í' rú rə kíin. Nwul oò bí' iiyì gìdńná, bɔ̀b ìì ləə Yéésù Krístù ra, bít bɔ̀b nyɛ̀lə́m oò, oò nyɛ́' ii kúnú. Vɛnɛ́b oò mà' ii pə̀dkè gbà'á, bít oò pii ii tɛbə̀ gbà'á.

Tɛ́m zígke aa galə̀ roó

³ Báà káŋ̀ Vɛnɛ́b, Báátììkpɛ̀ŋ Yéésù Krístù Bóò ra! Ɛ̀g bé' bə́n búúd tə́ gbàákù, pii bə́n gɔ̀ŋsə́ puuá, kə̀ díímke Yéésù Krístù bə̀ valú. Bə́ŋyée nyí' bə́n tɛ́m tə́ kə̀ tɛ́m zígke aa vàd bə gá roó,

⁴ bít báan kíìn báàn làmkè kiìnmbə̀ kə̀ insɔ̀ɔ̀nkè bəraa Vɛnɛ́b zíg nɛ́b oò bəd kìínmbə̀ valligə̀ kíin doó. Insɔ̀ɔ̀nkè bəraa rə, bə̀ bán yɛɛ̀lǹmbə̀ gá, bə̀ dìg gá, sínkɔ̀ bə̀ bɔ̀' nyɛdkè boò gá. Vɛnɛ́b zíg ii insɔ̀ɔ̀nkè bəraa rə tə́ lɛgə́ poú.

⁵ Tɛ́mbagké íí bòórú, Vɛnɛ́b kpɛŋsɛ́l tə́ ii taà nwánàá. Vɛnɛ́b dá ii diìn nwáànmbìá, yaà dá wə́ə̀n sɛŋ aa súúke íí dáà yaànà bərə zé. Súúke íí rə, dáà yaànà sɛŋ aa yɛ́b dá dugǹ bəroó.

⁶ Kóó bə́ŋyée íí dá gbò'kè kiìn tə́ sɛŋ zɔ̀gɔ̀ní bə̀ máá, sɛŋ aarə bə gə́, íí dá tɛ́m làmkè kiinàá.

⁷ Tɛ́mbagké íí dá kuùm kìínmbə̀ bəŋzɔ' aa də́' bə̀ ɛ̀g kə̀ laa rə kíin. Bít gbò'kè bəraa íí dá bɔbm̀ də, dá i'ǹ gə́, tɛ́mbagké aí bə̀ kànsə̀n bəŋzɔ' aa dákíìn báàn yɛɛ̀lǹmbə̀ rə kə̀ pɛ̀sá. Bə̀ dá i'ǹ gə́, íí dá kaŋsɛ́l bɔbàá, kə̀ ləəkèá, bít kə̀ mɔ̀'keá, sɛŋ aa Yéésù dáà bídǹnà bəroó.

⁸ Íí bé' Yéésù sín máá, íí í'ù yàá, bít íí bé'ù bə́ŋyée sín máá, íí bàgə̀ yàá. Kə̀ taàbìá, íí kìì taà tɛ́m làmkè gbà'á aa kàn nɛɛ̀n, nɛ́ŋə̀ bán gáàmbə̀ kə̀ gú' gá roó.

⁹ Kàandə, íí tə́ tɛ́mbagké dùm íí kíìn bɔbàá' taà kùmsə̀n baànmbə̀ súúke gɔ̀ŋsə́ íí bìá.

¹⁰ Súúke aarə yílú, Vɛnɛ́b gbantumsə̀ kambəd bə̀ gám nwɔŋ, nɛɛ̀n aa Vɛnɛ́b dá ii pə̀dkè ma'ǹ dú roó. Bə̀ sàà kə̀ gbò'kèá, bɔbm̀ gabm̀bə̀ nɛɛ̀n aa íí dá súúke bɔbm̀ dú roó.

¹¹ Vɛnɛ́b gbantumsə̀ bəd bə̀ kə̀ Krístù Nwul naú, bít bə̀ gám nwɔŋ búúd bəraa Krístù dá bé'ǹ, bít kə̀ kaŋsɛ́l aa Krístù dá bɔbm̀, búúd bəraa taàì gə́ rə yílú. Vɛnɛ́b gbantumsə̀ bəd nɔ̀ŋ bə̀ sàà sɛŋ aa in bəraa dá wə́ə̀n dú, bít nɛɛ̀n aa dá taamíìn dú rə gabm̀bìá.

¹² Vɛnɛ́b bàà nyɛ́' gbantumsə̀ oò bəd gə́, nwɔŋ aa bàà bəǹ pii bà yérə, boò bə̀ gá, zá aí bìá. Bə́ŋyée nɛ́b bəraa bə̀ tə́ Nwɔŋ Puu Sɔ̀ɔ̀nkè baàn də, bə̀ ùri sə̀n nwɔŋ bəraa roó, kə̀ Nwul Gìdń kpɛŋsɛ́l aa tùm piià lɛgə́ paà roó. Malaika bəd kə̀ yíl boò máá, bə̀ í' nwɔŋ aarəì gabm̀bìá.

Báan kuùm Gìdńná

¹³ Kàanyée gə́, inselké aí bə̀ oò kùm və̀'kè tù' bə̀ ma'ǹná! Ìì gú' yíl íí kə̀ nɛɛ̀n aa íí kùm dú roó, bít ìì zíg tɛ́m íí kóólé, pə̀dkè aa Vɛnɛ́b dá iiyà ma'ǹnà rə ba, sɛŋ aa Yéésù Krístù dáà bídǹnà bəroó.

¹⁴ Ìì ləə Vɛnɛ́bá. Ìì dàà inlɛ'kè vaksə́ bəraa sɛŋ aa bə́ŋ̀ íí gàb Vɛnɛ́b nwɔŋ síndə, oò ləə gààd aí tɛ́mú sí.

¹⁵ Zá Vɛnɛ́b aa dɛ̀riyà rə, tə́ Gìdńná, bít aí kɔ̀ ìì kùm gìdńná, in aa íí tə́ ma'ǹ də rú kóólé.

¹⁶ Kə̀ aakíin də, Núúboòd Gìdńnú rə, Vɛnɛ́b bàà: «Ìì kùm gìdńná, kàandə, máá kɔ̀ mə́ tə́ Gìdńná.»

¹⁷ Íí tə́ Vɛnɛ́b nyɛɛ̀m gə́, íí dɛ̀rə̀ Báá. Zá Vɛnɛ́b gə́, sèè nɛ́ŋə̀ bə sé. Fág nɛ́ɛ̀réè gə́ kóólé, in aa mà' rə bòórú. Kə̀ taàbìá, ìì káŋ Vɛnɛ́bá, sɛŋ aa bə́ŋ̀ íí tə́ kuùm zɔ̀ŋə yɛ́b bə kə̀ sɛ̀ɛ́n kíin doó.

¹⁸ Kə̀ aakíin də, íí gàb dùm aa káá bə̀ kè' iiyà kə̀ kùrú, kumsɛ́l sɔ̀ɔ̀nsín aa íí bɔ̀bà doo íí bəd naà rə yàá. Káá bə̀ kè' iiyà kə̀ in bəraa dákíìn báàn yɛɛ̀lǹmbə̀ kìínmbə̀ ba' kíin, sínkɔ̀ bəŋzɔ' kíin də gá.

¹⁹ Zá káá bə̀ kè' iiyà kə̀ insɔ̀ɔ̀n nə́ŋ̀á. Insɔ̀ɔ̀n də, Krístù nyɛ̀lə́má. Krístù kùm kìínmbə̀ Bɛ̀rə̀wà aa kə̀ invaksə́ nə́ŋ̀má naà sə́n də kíin.

²⁰ Vɛnɛ́b sààvúŋ Krístù, bɔ̀b bə́ŋ̀ yɛ́b séémíìn sé. Vɛnɛ́b yaà ì' Krístù sɛŋ bəraa dùg kə̀ bòd doó, aí bòórú.

²¹ Bítsɔ̀ŋ, Yéésù Krístù bòórú, íí bàg taà Vɛnɛ́b aa díímə̀wà valú, bít piiù kaŋsɛ́l laa nyɛdkè roó. Bítsɔ̀ŋ, tɛ́mbagké aí bə̀ kə̀ tɛ́mzígke aí bə̀ tá, ləə tə́ Vɛnɛ́b ba.

²² Íí bí' yíl íí bərì gìdńná, kə̀ vɛ́nà aa íí ləə roó. Kə̀ taàbìá, íí tə́ taà ɔ̀dkudvɛɛ̀l bəd í'ǹ kə̀ tɛ́m nə́ŋ̀ní. Ìì dìì ɔ̀dnə́ŋ̀ bəd í'ǹmbə̀ kə̀ kpɛŋsɛ́lá, kə̀ tɛ́m íí tə́ kóólé.

²³ Ìì mà' kàani. Kàandə, bə̀ lɛ̀b iiyì puuá. Báá zɔ̀ŋə yɛ́b bə bə̀ lɛ̀b ii sə̀n gá. Zá Vɛnɛ́b nwɔŋ galə̀ aa dá ləə̀n zèd kə̀ zèd də, lɛ̀b ii sùnú.

²⁴ Kìínmbə̀ nɛɛ̀n aa Núúboòd Gìdń bàà rə kíin: «Nɛ́b bəd kóólé, bə̀ tə́ kìínmbə̀ fɔ̀g kíin, bít kaŋsɛ́l boò kɔ̀, tə́ kìínmbə̀ téélaan kíin. Fɔ̀g wàd kúnú, téélaan kɔ̀ kpɛ' pí' kúnú.

²⁵ Zá Báátììkpɛ̀ŋ nwɔŋ gə́, dá kuùm zèd kə̀ zèrá.» Nwɔŋ aarə, kùmsə̀n Nwɔŋ Puu Sɔ̀ɔ̀nkè aa Yéésù gbantumsə̀ bəd bə̀ ùri roó.