1 Korintu 16 - Núúboòd Gú'dúgke Puu Sambə́ Nwɔŋú bìá

Basaa wál bə̀ tə́ Vɛnɛ́b nɛ́b bəraa Urusalima bìlə́ rə aàn doó

¹ Ba' wálke Vɛnɛ́b nɛ́b gìdń bəd bə̀ gə́, aí kɔ̀ ìì bàg insánke aa mə́ piià nɛ́b bagké Eklisiya bə̀ bəraa Galatiya yɛ́b bəroó.

² Kozoli bə gə́, kóó nɛ́ɛ̀réè aí tə́ŋú, oò zíg ba' zɔ̀gɔ̀, kə̀ nɛɛ̀n aa mà' tù' bɔ̀b də kíin, bɔ̀b sɛŋ aa máà yaànà bərə, ìì wál ba' sɔ̀ŋ sí.

³ Màìgə́, yaà mə́ wə́ə́ì gə́, má nɛ́b aa sàà íí vúŋ də tumàá, bád má bə̀ núúboòd bəd piìn naú, bɔ̀b pà' boò àà basaa rə Urusalima bìlú.

⁴ Dáà dákíìn sɔɔnàá, máà dáá kɔ̀ gə́, bə̀ dá sɛ̀ɛ́n kpaŋ̀ wáàl kə̀ máá tá.

Pol sɛ̀ɛ́n kpaŋ̀ aa zíg númú roó

⁵ Máà yaànà aí kàrú gə́, má sína taàn Makedoniya yɛ́b ba (kàandə, taà má yɛ́b aarə kíìn daanàá).

⁶ Nə́ŋ̀ gə́, má kuùm aí kàrú wərə̀ sɛŋ zɔ̀gɔ̀. Kamgə́, kùm má nwùm sɛŋ tá'ǹ wərà. Kàanyée gə́, íí dá taà báàn máá bə̀ láŋ̀ bə, bɔbm̀ dáànmbə̀ zɔ̀ŋ aa mə́ í' bərə gə́ kóólé.

⁷ Bə́ŋyée, mə́ í' ii dáàn bé'ǹmbə̀, taànmbə̀ bəní sé. Mə́ í' kuùmbə̀ kə̀ aí tá, sɛŋ zɔ̀gɔ̀, dáà Báátììkpɛ̀ŋ pii mə́ kpaŋì gə́ roó.

⁸ Má kuùm zɔ̀ŋə Efesus bìlú, wálke Pentekosta bə̀ dá wə́ə̀n zé.

⁹ Kàandə, bə́ŋyée sɛŋ tə́ sɔ̀ɔ̀ní, máá bìá, bɔ̀b tù' gbà'á bə̀ ma'ǹ zɔ̀ŋə, kóó kə̀ ɔ̀dmáàn bəraa ká' yée tə́ kóólé.

¹⁰ Màìgə́, Timote yaà wə́ə́ì aí səǹ gə́, ìì kè'ù kíìn sɔ̀ɔ̀nkè, bɔ̀b oò kùm kə̀ də́dǹ aí tə́ŋə́ sí; kàandə, oò kɔ̀ tə́ Báátììkpɛ̀ŋ tù' ma'ǹ kə̀ máá kíin.

¹¹ Nɛ́ŋə̀ nə́ŋ̀má ɛ̀g oò gɔ̀nə̀ sí. Ìì láŋ̀ ba, bɔ̀b oò bɛ́' sɛ̀ɛ́n kpaŋ̀ oò kə̀ tɛbàá, kid oò bírà máá sunú. Kàandə, mə́ nwánə̀ tə́ kə̀ ɔ̀dkudvɛɛ̀l mə́ bəd tá.

¹² Nɛ́ɛ̀m ɔ̀dkudvɛɛ̀l bə́n Apolos gə́, pii mə́ sááù váàndoá; mə́ tə́ù kpɛŋsɛ́l piìn, bɔ̀b oò dáá aí sunú, kə̀ ɔ̀dkudvɛɛ̀l oò bəd tá. Zá í' dáànmbə̀ bə́ŋyée sé. Sɛŋ aa dá kpaŋ̀ bɔbm̀ bərə, dá taà dáánàá.

Nwɔŋ baàn daànmbə̀ bəraa dùg kə̀ bòd doó, kə̀ dɔ̀msɛ̀l bərá

¹³ Ìì ləə ləəm sí, ìì kùm kə̀ kpɛŋsɛ́lá, tɛ́mbagké rú. Ìì kùm kə̀ váàndoá, tɛ́mbagké rú, bít ìì kùm kə̀ nɛ́b vɔ̀ɔ̀m kíin.

¹⁴ Tùsaa íí tə́ ma'ǹ də gə́ kóólé, ìì mà' kə̀ í'sɛ̀lá.

¹⁵ Bít mə́ tə́ ii nwɔŋ aa yée tuùm piìn sɔ̀ŋ. Íí gàb Estefanas yàá, kə̀ ligə̀ oò tá. Íí gàb yàá, Akaya yɛ́b bə gə́, boò ra bə̀ kùmsə̀n nɛ́b éèn də̀gə̀ də̀gə̀ bə̀ bəraa bə̀ sɔ̀g doó. Bít bə̀ pii yíl boò, bɔ̀b Vɛnɛ́b nɛ́b gìdń bəd kpɛŋsɛ́l piìnmbə̀ Vɛnɛ́b tùsú. Mə́ tə́ ii kíìn nyɛmàá, ɔ̀dkudvɛɛ̀l bərá,

¹⁶ ogə́, ìì ləə nɛ́b luùm bəraa rə kúnú, kə̀ nɛ́b aa bə̀ tə́ tù' ma'ǹ sɔ̀ɔ̀nkè kə̀ boò tə́ rə tá.

¹⁷ Mə́ tə́ kə̀ tɛ́m làmkèá, kə̀ yaaké Estefanas bìá, Fortunatus bìá, bít kə̀ Akisda bìá. Mə́ bé' bə̀ yérə, mà' kìínmbə̀ mə́ dáá tə́ sə̀n wərə̀ kíin.

¹⁸ Kàandə, yaà bə̀ tɛ́' mə́ tɛ́m yàá, kìínmbə̀ nɛɛ̀n aa bə̀ tɛ́' ii tɛ́m də kíni. Ìì gàb nɛ́b luùm bəraa rə kíìn mɔ̀'ǹmbə̀ kə̀ in aa bə̀ mà' roó.

¹⁹ Eklisiya bəraa Aziya yɛ́b bərə kóólé, bə̀ dɔ̀m ii yàá, kə̀ tɛ́mlàmkèá. Akilas da, Priskila ra, kə̀ Eklisiya bəraa bə̀ wál oò yiìl wərə̀ rə tə́ kóólé, bə̀ dɔ̀mi yàá, Báátììkpɛ̀ŋ nə́gə́lú.

²⁰ Ɔ̀dkudvɛɛ̀l mə́ í'sɛ̀lbə̀ bəd kóólé, bə̀ dɔ̀m ii yàá. Dɔ̀m ìì pà' ɔ̀dnə́ŋ̀ naú, íí bòdba.

²¹ Mə́ tə́ sə̀n dɔ̀msɛ̀l aa yée bádǹ kə̀ nɛɛ̀n máá bìá; máára mə́ Pol la.

²² Dáà nɛ́ŋə̀ nə́ŋ̀ í' Báátììkpɛ̀ŋ síngə́, nwɔŋyɛɛ̀l oò kùm oò yílú! Ǹ yaà kúnú, Báátììkpɛ̀ŋ bə́ ra!

²³ Pə̀dkè Báátììkpɛ̀ŋ Yéésù bə̀ oò kùm kə̀ aí tá.

²⁴ Mə́ í' ii yàá, íí kóólé, kə̀ wálke kə̀ Yéésù Krístù ra.