تیتوس 3 - کتاب مقدس به زبان کردی جنوبی - گویش کلهوری

ڕێ رەوشت خاس

¹ باره هویرێان که له حاکمیل و دەسڵاتداریل گوش بتەکنن و مل بوەنه ژێر فەرمانێان و ئەڕا هەر کار خاسێگ گورجەو بون؛

² له باوەت کەسێگ خراو نویشن و له دەمقاڵ دویرەو بگرن و دڵنەرم بون و رێ رەوشتێان وەگەرد گشت مەردم وه حرمەتەو بود.

³ چوینکه ئیمەیش خوەمان زەمانێگ نەزان و ملچەفتەوکەر و گومڕا و گیرودەێ گشت جور هەواوهەوەس و کەیف و خوەشێگ بیمن؛ وەناو دڵپێسی و حەسویی ڕوژگار دایمنه سەر. مەردم له ئیمه قینێان هاتیاد و ئیمەیش له یەکترەکی قینمان هاتیاد.

⁴ وەلێ وەختێ مێرەبانی و ئنساندوسی نجات دەر ئیمه، خودا ئاشکرا بی،

⁵ ئەیو نجاتمان دا. وەلێ ئی نجاته وه سەوەو کاریل سالحانێگ که ئیمه وەجێ هاوردویمن، نوی بەڵکەم له ڕوی بەزەیی ئەیو و شوردن دڵ ئیمه بی که له ڕێ ئەوه، روح‌القودوس وه دنیا هاتن تازه و زنەیی تازه بەخشیه پێمان.

⁶ هەر ئەو روح‌القودوسه که خودا ئەیو له ڕێ نجات دەرمان عیسا مەسیح فره فره وه ملمانا ڕشان،

⁷ تا وه فیز ئەیو سالحان وەحساو بایم، وه ڕوی ئمید زنەیی ئەبەدی، بیمنه میراتی خوەریل.

⁸ ئی قسیه شایسەێ دڵنیاییه. له لێد توام که ئەڕا ئی کاریله پا بیێدەگەز، تا ئەوانه که وه خودا ئیمان هاوردنه، له هویرێان نەچود که خوێان خەریک وه جێ هاوردن کاریل خاس بکەن، ئی چشتیله ئەڕا مەردم فره خاسه و باێەخ دێرێ.

⁹ وەلێ له قسیه و باسیل گیلگەوجانه، له بنەچەکیل، له جیایی خستن و له مرافەیلێگ که له باوەت شەریعەته دویرەو بگر، چوینکه ئی چشتیله پویچه و هویچ نیەتیەرزێد.

¹⁰ وه ئەو کەسه که بوده بایس جیایی یەێ جار و ئمجا له شونێ ئەڕا دویم جار هەڕەشه بکه، وەشونێ وەگەردیەو بێند بشێون.

¹¹ ئەڕا ئیه که زانید ئیجور کەسێگ گەنیاێ و گوناکاره و خوەێ بایس ماکومیەت خوێه.

ئاموژیاریێل ئاخر

¹² وەختێ ئارتماس یا تیخیکوس کل بکەم ئەڕا لاد، تەقالا بکه تا هەر چی زویتر باێده ئەڕا لاێ مه له شار نیکوپولیس، چوینکه توام زمسان له ئەوره بیەمێ سەر.

¹³ تا ئەوره که تویەنێد وه زیناس وەکیل و ئاپولوس ئەڕا گەردیانەگەێان مەیەتیان بیه، هوشد بو تا کەم کەسریێگ نیاشتوین.

¹⁴ بیل مەردمەگەمان یاێ بگرن که خوێان خەریک وەجێ هاوردن کاریل خاس بکەن تا ئەڕا پەرچەو کردن هەوەجییل واجو مەیەتیگ بێەن و زنەیی بی بەرێگ نیاشتوین.

¹⁵ ئەوانه که هانەگەرد منەو، گشتێان سڵامد رەسنن. وه ئەوانه که ئیمەیش وه ناو ئیمان دوس دێرن، سڵام برەسن. فیز خودا وەگەرد گشتدانەو بود.