تیتوس 2 - کتاب مقدس به زبان کردی جنوبی - گویش کلهوری

تالیم درس

¹ وەلێ تو ئەو چشته که وه ڕوی تالیم درسه، یاێ بیه.

² پیاێل سن و ساڵ دار باێه هوشیار و سەنگین ڕەنگین بون و وەسەرخوێان زاڵ بون و وه ناو ئیمان و مابەت و بەردەوامی وه شایسەێ بیەنەسەر.

³ هەر ئیجوره، ژنيل سن و ساڵ دار باێه ڕێ رەوشتیان وه حرمەتەو بود. نەباێه بختکەر بون یا گیرودەێ شراو بون، بەڵکەم باێه ئەو چشتێ که خاسه تالیم بێەن،

⁴ تا وه ژنيل جوان یاێ بێەن که شوی دوس و مناڵ دوس بون و

⁵ وەسەرخوێان زاڵ بون و داوان‎پاک و ماڵداریکەر و مێرەبان بون و له شویەگەێان گوش بتەکنن تا کەسێگ نەتویەنێ له کەڵام خودا خراو بویشی.

⁶ هەر ئیجوره پیاێل جوانیش ئاموژیاری بکه تا وەسەر خوێان زاڵ بون.

⁷ خوەد له گشت چشتێگ نمونەێ کاریل خاس بو. وەناو تالیم خوەد ڕاس درس و سەنگین ڕەنگین به و

⁸ قسیەیلد ئەوقره درس بود که کەسێگ نەتویەنێ ماکومێ بکێد، تا دشمەن دەرفەت خراو وەتن له باوەت ئیمه پەێا نەکێ و ئیجوره شەرمزار بود.

⁹ خوڵامیل باێه وه هەر چشتێگ گوش له ئەرواوەگانێان بتەکنن و ئەڕا خوەشنودی ئەوانه تەقالا بکەن؛ قسیه و باس نەکەن و

¹⁰ له ئەوانه دزی نەکەن، بەڵکەم باێه ئیمان خاس وه تەمامی نیشان بێەن تا ئیجوره وه گشت چشتێگ ڕەنگینی تالیمێگ که له باوەت نجات دەر ئیمه خوداس، وه خاسێ نیشان بێەن.

¹¹ چوینکه فیز خودا ئاشکرا بیه، فیزێگ که ئەڕا گشت مەردم نجات تیەرێ و

¹² وه ئیمه یاێ دەێ که خودانەناسی و هەواوهەوەسیل دنیایی بنیمنه لا، وەگەرد زاڵ بوین وەسەرخوەمان و درسی و خوداترسی له ئی دەوره زنەیی بکێم و

¹³ چەوەڕێ ئەو ئمید بمارکمانه بویمن یانێ ئاشکرا بوین جەڵاڵ خوداێ گەورامان و نجات دەر ئیمه عیسا مەسیح.

¹⁴ هەر ئەو عیسا مەسیحه که گیان خوەێ ئەڕا ئیمه دا تا له هەر خراوێگ ڕزگارمان بکێد و قەومێگ ئەڕا خوەێ پاکەو بکێد که هن خوەێ بون و ئەڕا کاریل خاس غیرەت بیاشتون.

¹⁵ ئی چشتیله جار بیه؛ وه تەمام دەسڵات هان بیه و بگره گازتاوه. مەیل کەسێگ وه سوک بگرێدەد.