تیتوس 1 - کتاب مقدس به زبان کردی جنوبی - گویش کلهوری

¹ له لاێ پولوس، خوڵام خودا و ڕەسول عیسا مەسیح. مه دیاری کریام که ئیمان هەڵوژاریەگان خودا وه قەوەتەو بکەم و ڕاسیێگ که ها مل دینداری، بویشم.

² ئی ڕاسیه وه پێ ئمید وه زنەیی ئەبەدیه که خوداێگ که هەراێهەر درو نیویشی، له ئەزەڵ وادەێ داسه پێمان و

³ له وەخت مناسو، ئەو واده ئاشکرا بی، وەناو پێخامێگ که جار داینێ وه دەستور نجات دەر ئیمه خودا، وه من سپاریاد؛

⁴ وه تیتوس، ڕوڵەێ ڕاسەکانیم وەناو ئیمانێگ که نسیو گشتمان بیه: له لاێ خوداێ باوگ و نجات دەر ئیمه مەسیح عیسا فیز و ئاشتی و سڵامەتی وه ملدەو بود.

کار تیتوس له کرت

⁵ وه ئەو بونه توی له جەزیرەی کرت هیشتمه جێ تا کاریل نا تەمامێگ که مەنوی، سەرسامان بێید و هەر ئەوجورە که ئەمر کردمه پێد، له ناو هەر شارێگ شێخیلێگ دیاری بکێ.

⁶ شێخ کلیسا نەبایه وەناو زنەیی چشتێگ بیاشتوی که بوده بایس سەرزەنشتێ، باێه شوی یەێ ژن بود، باێه مناڵیل با ئیمانێگ بیاشتوی که له هەر لەون بخت هەوسار بڕیا یا ملهوڕی دویر بون.

⁷ ئەڕا ئیه که هێوەتکەر کلیسا کاروەدەس خوداس، جا نەبایه وەناو زنەیی چشتێگ بیاشتوی که بوده بایس سەرزەنشتێ. ئەوه نەبایه لویتبەرز بود یا زوی کەفلەهەرز بود یا سەرخوەشکەر یا زورگو بود یا تەمای پویل بیاشتوی،

⁸ بەڵکەم باێه مێواندار و خێرخواز بود و وەسەرخوێا زاڵ بود و درسکار و موقەدەس و ڕێک‎وپێک؛

⁹ ئەوه باێه وه کەڵام دڵنیایگ که تالیم دریاس قورس بلچکێی تا بتویەنێ مەردم وه پێ تالیم درس ئاموژیاری بکێد و هەرئیجوره بخوڕێده مل کەسیلێ که له نوای وسن.

¹⁰ چوینکه ئایەمیل ملهوڕ، وڕاوەکەر و فێڵباز فرەن، وه تایبەتی له بین ئەوانه که وه خەتەنه کردن پاملن،

¹¹ ئەوانه باێه دەمکوت بکریەن، چوینکه ئەوانه وەخاتر تەمای سود کردن چشتیلی تالیم دەن که نەبایه تالیم بێەن و ویجوره وه تەمامی خاوخێزانیل فەنا کەن.

¹² یەکیگ له نەبوەتکەریل خود کرتییل وەتیه: «کرتییل هەمویشه دروزنن و گیانەوەریل دڕنەی شەڕئاشون و زگ پەرەسیل لەمتیگن.»

¹³ ئی شاێەتی ڕاسه. جا سەخت ئەوانه بگره گازتاوه تا وەناو ئیمان درس بون و

¹⁴ وه مەسلەتیل جویلەکە و حوکمیل مەردمی که له ڕاسی هەڵوگەردیانه، گوش نەتەکنن.

¹⁵ ئەڕا ئایەمیل پاک گشت چشتێگ پاکه، وەلێ ئەڕا ئەوانه که ناپاک و بی ئیمانن، هویچ چشتێگ پاک نیه، بەڵکەم هەم فکریلێان ناپاکه و هەم وژدانێان.

¹⁶ ئەوانه ئویشن خودا ناسیم، وەلێ وەگەرد کردەوەێانەو ئەیو حاشا کەن. ئەوانه قیزهاوەر و ملچەفتەوکەر و نامناسو ئەڕا هەر کار خاسێگن.