رومیەگان 9 - کتاب مقدس به زبان کردی جنوبی - گویش کلهوری

قەوم هەڵوژاریای خودا

¹ وەناو مەسیح ڕاس ئویشم، درو نیویشم، وژدانمیش وەناو روح‌القودوس شاێەتی ئەڕام دەێ که

² وەناو دڵ خوەم خەم فرەێگ و خوسەێ هەمویشەیی دێرم.

³ چوینکه ئاوەختیم ئیه بی که خوەم له ڕێ برایلم، یانێ ئەوانه که لەباوەت جەسه خزم و کار منن، بچمه ژێر لانەت و له مەسیح بوڕیەم.

⁴ ئەوانه ئێسرائیلین و وه ڕوڵه قەبوڵ بین هن ئەوانەسه، جەڵاڵ و پەێمانیل هن ئەوانەسه، شەریعەت دریاسه ئەوانه، پەرەسش و وادەیل هن ئەوانەسه؛

⁵ باپیریل هن ئەوانن و مەسیح وه پێ جەسه له نەتەوەێ ئەوانەسه، هەر ئەو مەسیحه که خوداێ بان سەر گشتیەکیگه و تا ئەبەد پڕ بمارکه. ئامین.

⁶ وەلێ ئیجوره نیه که چماێ کەڵام خودا وه دی ناتیه، چوینکه گشت ئەوانه که له قەوم ئێسرائیلن، وه ڕاسی ئێسرائیلی نین و

⁷ گشت ئەوانه که له نەتەوەێ ئێبراهیمن، مناڵیل ئەوه نین. بەڵکەم وەناو کتاو تەورات نویسریاس: «نەتەوەێ تو ناو خوەێ له ئەسحاق گری.»

⁸ یانێ، مناڵیل جەسەێ، مناڵیل خودا نین، بەڵکەم مناڵیل واده، نەتەوەێ ئێبراهیم وه حساو تیەن.

⁹ چوینکه واده ئیه بی که «ساڵی تر هەر ئی وەختیله تیەمەو کوڕێگ کەفێده قاڵ سارا.»

¹⁰ نه تەنیا ئیه، بەڵکەم هەرئیجوره ڕبێکا له یە پیا، یانێ له باپیرمان ئەسحاق زگێ پڕ بوی.

¹¹ - ئەڕا ئیەک ئامانج خودا وەناو هەڵوژاردن بەردەوام بمینێ، نه وەبونەێ کردەوه، بەڵکەم وەبونەێ ئەیو که دەنگ کەێد - وەرجه ئەوه که مناڵیلێ بانه دنیا، یا کار خاس یا خراوێگ بکەن

¹² وه ڕبێکا وەتریا که: «گەورەگه وه بویچگەگه خزمەت کێ.»

¹³ هەر ئەوجورە که وەناو کتاو مەلاکی پەێخەمەر نویسریاس: «یاقوب دوس داشتم، وەلێ قینمه عیسو هاتیاد.»

¹⁴ جا چه بویشیم؟ ئێ خودا دادپەروەر نیه؟ هەڵبەت که ئیجوره نیه!

¹⁵ چوینکه وه موسای پەێخەمەر ئویشێ: «بەزەیێم تێدە هەر کەسێگ که بەزەیێمه پێ باێ و دڵسوزی کەمه هەرکەسێگ که دڵم ئەڕاێ بسزێ.»

¹⁶ جا وه خاست یا تەقالا کردن ئایەم نیه، بەڵکەم وه خوداێگه که بەزەیی کێ.

¹⁷ چوینکه وەناو تەورات، خودا وه فرعون ئویشێ: «هەر وه ئی ئامانجه تو هەڵوڕانم تا هێز خوەم وەناو توی نیشان بێەم و تا وەناو سەرئانسەر زەوی ناوم جار بێرێید.»

¹⁸ جا خودا وه هەر کەسێگ که بتواێ بەزەیی تێد و هەر کەسێگ که بتواێ دڵڕەقەو کێ.

¹⁹ ئەو وەخته ئویشیده پێم: «جا دی ئەڕا خودا سەرزەنشتمان کێ؟ چوینکه کیه که بتویەنێ لەنواێ خاست ئەیو بوسێ؟»

²⁰ وەلێ ئێ ئایەم، تو کیێد که وەگەرد خودا دەمقاڵ بکێ؟ «مەر درسکریا وه درسکەرگەێ خوەێ ئویشێ ئەڕا مه ئیجوره درس کردیده؟»

²¹ مەر کویزەدرسکەر حەق نێری که له یە پاخوا خەڕێ، دەفرێگ ئەڕا کاریل گرنگ و دەفرێگ تر ئەڕا کاریل مامولی درس بکێ؟

²² چه بود بویشی ئەگەر خودا هەرچەن تواێ خەزەو خوەێ نیشان بێێ و هێز خوەێ ئاشکرا بکێ، دەفریل خەزەو که ئەڕا له بین چین گورجەو بینه، وەگەرد سەور فرەێگ تاموڵ بکێ،

²³ تا دەوڵەمەنی جەڵاڵ خوەێ وه دەفریل بەزەیی ئاشکرا بکێ، دەفریلی که وەرجەوە ئەڕا جەڵاڵ گورجەو کردێه؟

²⁴ ئیمیش که ئەیو دەنگمان کردێه، له ئی دەفریل بەزەیێمنه، که نه تەنیا له جویلەکەیل، بەڵکەم له ناجویلەکەیلیش هەن.

²⁵ هەر ئەوجورە که وەناو کتاو هوشەع پەێخەمەر ئویشێ: «ئەوانه که قەوم مه نوین، ’قەوم خوەم‘ خوەنم و ئەوه که عەزیز نوی، وه ’عەزیز خوەنمەێ‘.»

²⁶ «درس هەر وه ئەو شونه که وەپێان وەتریا: ”ئیوه قەوم مه نین“، هەر وه ئەو شونه ’کوڕیل خوداێ زنی‘ خوەنریەن.»

²⁷ جا ئەشعەیاێ پەێخەمەر له باوەت قەوم ئێسرائیل هاوار کێ: «تەنانەت ئەگەر ژمارەێ کوڕیل ئێسرائیل جور شنیل دەریا بود، تەنیا قێر کەمێگ لەليان نجات پەێا کەن.

²⁸ چوینکه خوداوەند حوکم خوەێ وه تەمامی و بێ ماتەڵی وه مل زەوی وه جێ تیەرێ.»

²⁹ جا هەر ئەوجورە که ئەشعەیا پێشگویی کرد: «ئەگەر خوداوەند لەشکەریل، نەتەوەێگ ئەڕامان نەێشتیاده جێ، بویایمنه جور شار سودوم و بویایمنه جور شار عەموره.»

بی ئیمانی قەوم ئێسرائیل

³⁰ جا چه بویشیم؟ ناجویلەکەیلێگ که وەشون سالح بوین نوین، ئەوه وه دەس هاوردنه، یانێ ئەو سالح بوینه که له ڕێ ئیمان وه دەس تێی؛

³¹ وەلێ قەوم ئێسرائیل که کەفتوینه شون شەریعەتێگ که ئەوانه وەرەو سالح بوین بید، ئەو شەریعەته وه دەس ناوردن.

³² ئەڕا؟ چوینکه نه له ڕێ ئیمان، بەڵکەم له ڕێ کردەوه وەشونێەو بین. ئەوانه هەر له بان ئەو کوچگه کەفتنه خوار که بوده بایس کەفتنێان،

³³ ئەوجورە که وەناو کتاو ئەشعەیاێ پەێخەمەر نویسریاس: «بنوڕ، وەناو کویەێ سەهیون کوچگێگ نەم که بوده بایس کەفتن و تاش کەمەرێگ که بوده بایس وه خوار کەفتن؛ هەر کەس ئیمان بارێده پێ، شەرمزارەو نیود.»