رومیەگان 8 - کتاب مقدس به زبان کردی جنوبی - گویش کلهوری

زنەیی وەناو روح خودا

¹ جا ئێرنگه ئەڕا ئەوانه که هانه ناو مەسیح عیسا هویچ ماکومیەتێگ نیه،

² چوینکه وەناو مەسیح عیسا، شەریعەت روح زنەیی له یاساێ گونا و مەرگ ڕزگاردان کردێه؛

³ چوینکه خودا ئەو کاره وەجێ هاوردێه که شەریعەت وه بونەێ بی هازی جەسه نەتویەنست وه جێ بارێدەێ. خودا کوڕەگەێ خوەێ وه شێوەێ جەسەێ گوناکار و ئەڕا گونا کل کرد و وەناو جەسه، گونا ماکوم کرد،

⁴ تا ئەو چشتیل درسه که شەریعەت داواکاری کەێ، وەناومان باێده دی، وەناو ئیمه که نه وه پێ جەسه بەڵکەم وه پێ روح خودا ڕێ رەوشت کیم.

⁵ چوینکه ئەوانه که وه پێ جەسه زنەیی کەن، فکریلێان نەنه بان چشتیل جەسەێ، وەلێ ئەوانه که وه پێ روح خودا زنەیی کەن، فکریلێان نەنه بان چشتیلی که له روح خوداس.

⁶ دەرئەنجام دڵبەساین وه چشتیل جەسەێ، مەرگه، وەلێ دەرئەنجام وەشون کەفتن له چشتیل روحانی، ژیان و ئاشتی و سڵامەتیه.

⁷ چوینکه دڵبەساین وه چشتیل جەسەێ دشمەنی وەگەرد خوداس، ئەڕا ئیەکه نیەچوده ژێر حوکمرانی شەریعەت خودا، وه ڕاسیش که نیەتویەنێ.

⁸ کەسیلێ که هانه ژێر حوکمرانی جەسه، نیەتویەنن خودا خوەشنود بکەن.

⁹ هەر چەن که ئیوه وه ژێر حوکمرانی جەسه نین، بەڵکەم هاینه ژێر حوکمرانی روح خودا، هەڵبەت ئەگەر روح خودا وەناودان نیشتەجێ بود. هەر کەسێگ که روح مەسیح نياشتود، ئەوه هن مەسیح نیه.

¹⁰ وەلێ ئەگەر مەسیح ها ناودان، هەر چەن جەسەدان وه بونەێ گونا مردگه، وەلێ چوینکه سالحان وه حساو هاتینه، روح خودا ئەڕادان ژیانه.

¹¹ ئەگەر روح ئەیو که عیسا له مردگیل زنیەو کرد وەناودان نیشتەجێ بود، ئەیو که مەسیح عیسا له مردگیل زنیەو کرد، له ڕێ روح خوەێ که وەناودان نیشتەجێه وه جەسەیلدانیش که مرێ، زنەیی بەخشێد.

¹² جا ئێ برایل، ئیمه قەردداریم، وەلێ نه وه جەسه، تا وه پێ جەسه زنەیی بکێم.

¹³ چوینکه ئەگەر وه پێ جەسه زنەیی بکێن، مرین؛ وەلێ ئەگەر له ڕێ روح خودا، کردەوەێ جەسه بکوشین، زنەیی کین.

¹⁴ چوینکه گشت ئەوانه که له ڕێ روح خودا ڕێنمای بون، کوڕيل خودان.

¹⁵ ئەڕا ئیەکه ئیوه روح خوڵامی پەێا نەکردین تا وەدواره ڕخدان بچود، بەڵکەم روح زڕکوڕی دریاسه پێدان که وه وەسلەێ ئەوه هاوار کێمن: «ئەبا، باوگه.»

¹⁶ جا روح خودا خوەێ وەگەرد روح ئیمه شاێەتی دەێ که ئیمه ڕوڵەیل خودایم.

¹⁷ ئەگەر ڕوڵەیلیم، جا میراتی خوەریش هیمن، یانێ میراتی خوەریل خودا و هاومیراتی مەسیح. وه ئی مەرجه که ئیمه وەگەرد ئەیو عەزاو بکیشیم تا ئیمەیش وەگەردیەو جەڵاڵ پەێا بکێم.

جەڵاڵ وەرەڕوی

¹⁸ چوینکه من فکر کەم، رەنجیل هەر ئی زەمانه وەگەرد جەڵاڵی که تواێ ئەڕامان ئاشکراوه بود، نیود بەراوردێ کرد.

¹⁹ چوینکه گشت درسکریایل خودا وه تاسەێ تەمام چەوەڕێن تا کوڕیل خودا ئاشکراوه بون.

²⁰ چوینکه درسکریایل خودا دریاده دەس پویچێ، نه وه خاست خوەێ، بەڵکەم وه بونەێ ئەیو که دادەێ دەسەو، وه ئی ئمیده

²¹ که خود درسکریایل خودایش له خوڵامی گەنێان ڕزگار بون و وەناو ڕزگاری پڕ جەڵاڵ ڕوڵەیل خودا بەشدارەو بون.

²² ئەڕا ئیه که زانیمن که گشت درسکریایل خودا تا ئێرنگه وەگەرد یەکەو له ژانێگ جور ژان زاین ئاخ هەڵکیشن.

²³ جا نه تەنیا درسکریایل خودا، بەڵکەم خوەمانیش که نەوبەر روح خودا دێریم، له ناخمانەو ئاخ هەڵکیشیم، هەر ئەو جوره که وه تاسەوه چەوەڕێ زڕکوڕی، یانێ ڕزگاری جەسەیلمانیم.

²⁴ چوینکه وه ئی ئمیده نجات پەێا کردیم. ئێرنگه ئمیدی که بوینرێید، دی ئمید نیه. چوینکه کیه که وه ئەو چشته که دوینی ئمید بیاشتوی؟

²⁵ وەلێ ئەگەر وه ئەو چشته که نیوینیم ئمید دێریم، وه سەورەو چەوەڕێمن.

²⁶ هەر ویجوره روح خودا وەناو بی هازیمان، مەیەتمان دەێ، چوینکه نيەزانیم ئەڕا چ چشتێ باێه دوعا بکێم. وەلێ روح خودا خوەێ وەگەرد ئاخیلێگ که نیود وه کەلیمەیل بویشیدی، ئەڕامان ناوجێ کەێ.

²⁷ ئەوه که دڵیل وشکنێد، زانی فکر روح خودا چەس، چوینکه روح وه پێ خاست خودا، ئەڕا ئیمانداریل وه مەسیح ناوجێ کەێ.

²⁸ جا ئیمه زانیمن ئەڕا کەسیلێگ که خودا دوس دێرن و وه پێ ئامانج ئەیو دەنگ کریانه، گشت چشتێگ وه یەکەو ئەڕا خاسێ ئەوانه کار کەێ.

²⁹ چوینکه خودا ئەوانه که وەرجەوە ناسی، هەر ئیجوره ئەوانه وەرجەوە دیاری کرد تا وێنەێ کوڕەگەێ خوەێ دەر بان، تا کوڕەگەێ بوده یەکم زگ وەناو برایل فرەێگ.

³⁰ جا ئەوانه که وەرجەوە دیاری کرد، دەنگیانیش کرد و ئەوانه که دەنگیان کرد سالحانیش وەحساو هاورد؛ ئەوانه که سالحان وەحساو هاورد، جەڵاڵیش دا.

مابەت هەمویشەیی خودا

³¹ جا وه نوای ئی چشتیله چه تویەنیم بویشیم؟ ئەگەر خودا ها گەردمانا، کیه که بتویەنێ وەنوامان بوسد؟

³² ئێ خوداێگ که کوڕەگەێ خوەێ دریخ نەکرد، بەڵکەم ئەیو له ڕێ گشتمان داده دەسەو، ئێ وەگەردیشێەو گشت چشتێگ وه دەس دڵوازای نيەوەخشێده پێمان؟

³³ کیه که بخت بکێده هەڵوژاردەیل خودا؟ خوداس که ئەوانه سالحان وه حساو تیەرێ!

³⁴ جا کیه که بتویەنێ ماکومێان بکێ؟ مەسیح عیساس ئەو کەسه که مرد، تەنانەت نه تەنیا ئیه بەڵکەم زنیەو بی و ها دەس ڕاس خودا، ئەوەسه که وه ڕاسی ئەڕامان ناوجێ کەێ!

³⁵ کیه که ئیمه له مابەت مەسیح جیاوه کەێ؟ بەرد یا پەشێوی یا عەزاو یا قاتوقڕی یا ڕویتی یا خەتەر یا شمشێر؟

³⁶ هەر ئەوجورە که وەناو کتاو زەبور نویسریاس: «ئیمه وه دریژایی ڕوژ، وەبونەێ تو ڕوی وه ڕوی مەرگ بویمن و جورێگ نوڕنه پێمانەو که چماێ پەسیلێگیم که ڕز کریایمنه تا سەرمان بوڕن.»

³⁷ نه، ئیمه وەناو گشت ئی چشتیله له ڕێ ئەیو که مابەتمان کرد، له ئەوانه که سەرکەفتێن، سەرتریم.

³⁸ چوینکه دڵنیام نه مەرگ و نه زنەیی، نه فریشتەیل و نه سەروکیل، نه چشتیل ئێرنگه و نه چشتیل وەرەڕوی، نه هێزیل و

³⁹ نه بەرزای و نه قویلای و نه هویچ چشتێگتر وەناو گشت درسکریایل خودا، نیەتویەنی ئیمه له مابەت خودا که وەناو خوداوەندمان مەسیح عیساس، جیاوه بکێ.