رومیەگان 7 - کتاب مقدس به زبان کردی جنوبی - گویش کلهوری

ڕزگار بوین له شەریعەت

¹ ئێ برایل، ئێ نیەزانین که شەریعەت تەنیا تا وەختێ که ئایەمێگ زنیه، وه ملێەو حوکمرانی کەێ؟ ئەڕا ئیه که وەگەرد کەسیلێ قسیه کەم که شەریعەت زانن،

² چوینکه وه پێ شەریعەت، ژن شویدار تا وەختێ شویەگەێ زنی بود، بەسریاسه ملێا، وەلێ ئەگەر شویەگەێ بمرێ، ئەوسا ژنەگه له ئەو شەریعەته که ئەوه وه مل شویەگەێ بەسریاوید، ڕزگارەو بود.

³ جا ئەگەر ژن، وەختێ که شویەگەێ زنیه، وەگەرد پیاێگ تر زنەیی بکێ، وه داوانپێس ناوێ بەن. وەلێ ئەگەر شویەگەێ بمرێ، له ئەو شەریعەته ڕزگاره و ئەگەر شوی بکەێه پیاێگ تر، داوانپێس نیه.

⁴ هەر ویجوره، ئێ برایلم، ئیوەیش له ڕێ جەسەێ مەسیح له باوەت شەریعەت مردینه تا هن کەسێگ تر بوین، یانێ بوینه هن ئەیو که له ناو مردگیل زنیەو بیه، تا ئەڕا خودا بەر باریم.

⁵ چوینکه وەختێ که وه ژێر حوکمرانی جەسه زنەیی کردیایم، هەواوهەوەسیل گونابارمان که شەریعەت هانێان دیاد، وەناو ئەنامیلمان کار کردیا تا ئەڕا مەرگ بەر باریم.

⁶ وەلێ ئێرنگه وەگەرد مردن لەباوەت ئەو چشته که ئیمه گیروده کردوی، له شەریعەت ڕزگار بویمنه تا وەناو ڕێ تازەێ روح خودا خزمەت بکێم، نه وەناو ڕێ کویەنەێ شەریعەت نویسریاێگ.

شەریعەت و گونا

⁷ جا چه بویشیم؟ ئێ شەریعەت گوناس؟ بێ گومان نەخیر! وی حاڵه ئەگەر شەریعەت نویاتیاد، گونا نیەناسیام. چوینکه ئەگەر شەریعەت نەوەتوی «تەما مەکه»، نیەزانستیام تەما کردن چەس.

⁸ وەلێ گونا له ڕێ ئی حوکم شەریعەته، دەرفەت پەێا کرد تا هەر جور تەماێگ له منا بارێده دی. چوینکه جیا له شەریعەت، گونا مردگه.

⁹ دەورانێ من جیا له شەریعەت زنی بیم؛ وەلێ وەختێ حوکم شەریعەت هات، گونا زنیەو بی و من مردم.

¹⁰ هەر ئەو حوکمه که وادەێ زنەیی دا، ئەڕا من مەرگ وه بار هاورد.

¹¹ چوینکه گونا له ڕێ حوکم شەریعەت دەرفەت پەێا کرد، فریوم دا و له ڕێ ئەوه مه دا وەر کوشت.

¹² جا شەریعەت موقەدەسه و حوکم شەریعەتیش موقەدەس و درس و خاسه.

¹³ جا ئێ ئەو چشته که خاسه ئەڕا من بیه بایس مەرگ؟ هەراێهەر! گونا بی که له ڕێ ئەو چشته که خاسه، مەرگ وەناو من هاورده دی تا ویجوره گونا، گونا بینی مالوم بود و له ڕێ حوکم شەریعەت خراوی گونا مالوم بود که چەنێ بی ئەنازەس.

¹⁴ چوینکه ئیمه زانیمن که شەریعەت روحانیه، وەلێ مه هامه ناو جەسه و جور خوڵامێگ فروشیامەسه گونا.

¹⁵ مه نيەزانم چه کەم، چوینکه نه ئەو کاره که توام، بەڵکەم هەر ئەو کاره که قینمه لێ تێی، وه جێ تیەرم.

¹⁶ ئێرنگه ئەگەر ئەو کاره وه جێ تیەرم که نیەتوامێ، جا قەبوڵ دێرم که شەریعەت خاسه.

¹⁷ جا ئێرنگه، دی من نیم که ئی کاره کەم، بەڵکەم گوناێگ که وەناوم نیشتەجێه ئی کاره کەێ.

¹⁸ چوینکه زانم که وەناو من، یانێ وەناو جەسەم، هویچ چشت خاسێگ نیشتەجێ نیه. چوینکه توام ئەو چشته که درسه وه جێ بارم، وەلێ نیەتویەنم وه جێ بارمەێ.

¹⁹ چوینکه ئەو کار خاسه که توام، وه جێ نیەتێەرم، بەڵکەم کار خراوێگ که نیەتوام، هەر وه جێ تیەرم.

²⁰ ئێرنگه ئەگەر ئەو کاره کەم که نیەتوامێ، ئیه دی من نیم که ئەو کاره کەێ، بەڵکەم گوناێگ که وەناوم نیشتەجێه ئەو کاره کەێ.

²¹ جا وه ئی یاسا پێ بەم که وەختێ توام کار درس وه جێ بارم، خراوی ها وەر دەسمەو.

²² چوینکه من وەناو ئایەم دەروینیم له شەریعەت خودا دڵشادم،

²³ وەلێ یاساێگتر وەناو ئەنامیل خوەم دوینم که وەگەرد شەریعەتێگ که زەین من قەبوڵێ کەێ، شەڕ کەێ و مه گیرودەێ یاساێ گونا کەێ که وەناو ئەنامیلم نیشتەجێه.

²⁴ ئاخ که چ ئایەم بێبەختێگم! کیه که له ئی جەسەێ مەرگه ڕزگارم بکێ؟

²⁵ سپاس ئەڕا خودا له ڕێ خوداوەندمان عیسا مەسیح! ئمجا من خوەم وەگەرد زەینم خوڵامی شەریعەت خودا کەم، وەلێ وەگەرد جەسەم خوڵامی یاساێ گونا کەم.