رومیەگان 5 - کتاب مقدس به زبان کردی جنوبی - گویش کلهوری

ئاشتی وەگەرد خودا له ڕێ ئیمان

¹ جا وەخاتر ئیه که له ڕێ ئیمان سالحان وه حساو هاتیمنه، له ڕێ خوداوەندمان عیسا مەسیح وەگەرد خودا ئاشتی و سڵامەتی دێریم.

² ئیمه له ڕێ ئەیو، وه وەسلەێ ئیمان، ئی فیزیشه که وەناوێ بەردەوامیم، وه دەس هاوردیمنه و وەناو ئمید جەڵاڵ خودا شادی کيمن.

³ نه تەنیا ئیه، بەڵکەم وەناو عەزاویلمانیش شادی کيمن، چوینکه زانیمن که عەزاو بەردەوامی وه بار تیەرێ و

⁴ بەردەوامی، شەخسیەت وه بار تیەرێ و شەخسیەت بوده بایس ئمید و

⁵ ئمید نیوده بایس شەرمزاریمان، چوینکه مابەت خودا وه وەسلەێ روح‌القودوس که بەخشریاسە ئیمه، ڕشیاسه ناو دڵمان.

⁶ ئەڕا ئیه که وەختێ هێمراێ ئیمه بێ هاز بیمن، مەسیح له وەخت مناسوێگ ئەڕا خودانەناسیل گیان خوەێ دا.

⁷ چوینکه کەمتر پێش تێی کەسێگ وەبونەێ ئنسانێگ سالحان له گیان خوەێ دەس بشورێد، هەر چەن هاتێ کەسێگ ئی ئازایه بیاشتود که تەنانەت گیان خوەێ ئەڕا ئنسان خاسێگ بێی.

⁸ وەلێ خودا مابەت خوەێ وه ئیمه ئیجوره نیشان دەێ که هناێ ئیمه هێمراێ گوناکار بیمن، مەسیح ئەڕامان مرد.

⁹ جا ئێرنگه که وەگەرد خوین ئەیو سالحان وه حساو هاتیمنه، چەنێ فرەتر له ڕێ ئەیو له خەزەو خودا نجات پەێا کەیمن.

¹⁰ چوینکه ئەگەر وەختێ که ئیمه دشمەن بویمن، وه وەسلەێ مەرگ کوڕەگەێ وەگەرد خوداوه ئاشتی دریایمن، چەنێ فرەتر ئێرنگه که وەگەرد خوداوه ئاشتی دریایمنه، وەگەرد زنەیی کوڕەگەێ نجات پەێا کیم.

¹¹ نه تەنیا ئیه، بەڵکەم ئیمەیش له ڕێ خوداوەندمان عیسا مەسیح که ئێرنگه له ڕێ ئەیو وەگەرد خوداوه ئاشتی دریایمن، وەناو خودا شادی کیمن.

مەرگ له ڕێ ئایەم، زنەیی له ڕێ مەسیح

¹² جا، هەر ئەوجورە که گونا له ڕێ یەێ ئنسان هاته ناو جهان و له ڕێ گونایش مەرگ هات، جا ویجوره مەرگ ریش گشت ئایەمیل گرد، چوینکه گشتیەکی گونا کردن

¹³ ئەڕا ئیه که وه ڕاسی وەرجەوە که شەریعەت بیرێی، گونا وەناو جهان بی، وەلێ شونێگ که شەریعەتێگ نود، گونا وه حساو نیەتێ.

¹⁴ وەئی حاڵەو، له ئایەم تا موسای پەێخەمەر، مەرگ وه سەر گشتیەکی حوکمرانی کرد، تەنانەت وه سەر کەسیلێگ که گوناگەێان جور خەتای ئایەم نوی. ئایەم، نمونەێ کەسێگ بی که باێه باتیاد.

¹⁵ وەلێ خەڵاتی خودا جور ئەو خەتا نیه. چوینکه ئەگەر قێر فرەێگ له ڕێ خەتای یەێ ئنسان مردن، چەنێ فرەتر فیز خودا و ئەو خەڵاتیه که له ڕێ فیز یەێ ئنسان، یانێ عیسا مەسیح هاته دی، وه فراوانی دریاسه قێر فرەێگ.

¹⁶ ئی خەڵاتیه جور دەرئەنجام گوناێ ئەو یەێ نەفەره، یانێ ئایەم نیه. چوینکه داوەریێگ که وەشون یەێ خەتا هات، بیه بایس ماکومیەت؛ وەلێ خەڵاتێگ که وەشون خەتایل فرەێگ هات، بیه بایس سالح وه حساو هاتن.

¹⁷ چوینکه ئەگەر وەبونەێ خەتای یەێ ئنسان، مەرگ له ڕێ ئەو ئنسانه حوکمرانی کرد، چەنێ فرەتر ئەوانه که فیز بێ حساو خودا و خەڵاتی سالح بوین گردنەسه وەر، له ڕێ ئەو ئنسانێگ تر، یانێ عیسا مەسیح، وەناو زنەیی حوکمرانی کەن.

¹⁸ جا هەر ئەوجورە که یەێ خەتا بیه بایس ماکومیەت گشت ئنسانیل، یەێ کردەوەێ سالحانەیش، بوده بایس سالح وه حساو هاتن و ژیان گشت ئنسانیل.

¹⁹ چوینکه هەر ئەوجورە که له ڕێ ملچەفتەو کردن یەێ ئنسان، قێر فرەێگ گوناکار بین، له ڕێ گوش تەکانن یەێ ئنسانیش قێر فرەێگ سالحانەو بون.

²⁰ ئێرنگه، شەریعەت هات تا خەتا فرەوه بود؛ وەلێ شونێ که گونا فرەوه بی، فیز فره فرەترەو بی.

²¹ تا هەر ئەوجورە که گونا وەناو مەرگ حوکمرانی کرد، فیزیش له ڕێ سالح بوین حوکمرانی بکێد و له ڕێ خوداوەندمان عیسا مەسیح، وەرەو ژیان ئەبەدی بوێد.