رومیەگان 4 - کتاب مقدس به زبان کردی جنوبی - گویش کلهوری

ئێبراهیم وه ئیمان سالحان وه حساو هات

¹ جا له باوەت ئەو چشته که گیر ئێبراهیم پەێخەمەر هات، چه بود بویشی، ئەوه که له ڕوی جەسەوه، باپیرمانه؟

² چوینکه ئەگەر ئێبراهیم وه پێ کردەوه سالحان وه حساو هاتوی، چشتێ ئەڕا شانازی کردن داشت؛ وەلێ لەلاێ خوداوه ئیجوره نیه.

³ چوینکه کتاو تەورات چه ئویشێ؟ «ئێبراهیم وه خودا ئیمان هاورد و ئیه ئەڕاێ سالح بوین وه حساو هات.»

⁴ ئێرنگه کەسێگ که کار کەێ، حەقدەسەگەێ خەڵاتی وه حساو نیەتێ، بەڵکەم حەقیه.

⁵ کەسێگ که کار نیەکێ، بەڵکەم پشت داسه خوداێگ که خودانەناسیل سالحان حساو کەێ، ئیمانێ ئەڕاێ سالح بوین وه حساو تێی.

⁶ هەر ئەوجورە که داود پادشایش کەسێگ که خودا ئەوه جیا له کردەوه، سالحان حساو کەێ، بەختەوەر خوەنێ و ئویشێ:

⁷ «خوەش وه حاڵ ئەوانه که کاریل گەنێان بەخشریا و گونایلێان داپوشریا.

⁸ خوەش وه حاڵ ئەوه که خوداوەند گوناێ نیەخیدەێ حساوی.»

⁹ ئێ ئی خوەش وه حاڵه، تەنیا ئەڕا خەتەنه کریایەگان یانێ جویلەکەیله یا ئەڕا خەتەنه نەکریایەگان یانێ ناجویلەکەیلیش هەس؟ چوینکه ئویشیم که ئیمان، ئەڕا ئێبراهیم سالح بوین وه حساو هات.

¹⁰ جا ئیه وەناو چ وەزیگەو ئەڕاێ وه حساو هات؟ ئێ وەرجه خەتەنه کردنێ بی یا وەشون ئەوه؟ هەڵبەت وەرجه خەتەنه کردنێ بی، نه وەشون ئەوه.

¹¹ ئێبراهیم نیشانەێ خەتەنه گردەوەر تا مورێگ بود وه ئەو سالح بوینه که وەرجه خەتەنه کردن له ڕێ ئیمان داشت. ئامانج ئیه بی تا خودا ئەوه بکێده باوگ گشت کەسیلێ که جیا له خەتەنه ئیمان تیەرن که ئیجوره ئەوانیش سالحان وه حساو بان و

¹² تا ئێبراهیم بکێده باوگ خەتەنه کریایەگان، یانێ باوگ ئەوانەێ که نه تەنیا خەتەنه بینه، بەڵکەم وەناو ڕێ ئیمانیش گام هەڵگرن، هەر ئەو ڕێه که ئێبراهیم باوگمان وەرجه ئەوه که خەتەنه بود، وەناو ئەو ڕێه گام هەڵگردیاد.

¹³ چوینکه ئەو واده که وه ئێبراهیم و نەتەوەێ دریاوی که بونه میراتیخوەر جهان، له ڕێ شەریعەت نوی، بەڵکەم له ڕێ ئەو سالح بوینه بوی که وه مل ئیمان بنیاد نریاس.

¹⁴ چوینکه ئەگەر ئەوانه که کەفتوینه شون شەریعەت بونه میراتیخوەر، ئیمان دی هویچ نیەتیەرزێد و واده پویچەو بود.

¹⁵ چوینکه شەریعەت خەزەو خودا تیەرێ؛ وەلێ شونێ که شەریعەت نیه، دەس دریژی له شەریعەتیش نیه.

¹⁶ وه ئی بونەسه که واده پاڵەو داسه ئیمان تا وه پێ فیز بود و زمانەتێگ بود ئەڕا گشت نەتەوەێ ئێبراهیم، یانێ نه تەنیا ئەڕا ئەوانه که کەفتنەسه شون شەریعەت، بەڵکەم هەر ئیجوریشه ئەڕا کەسیلێ که وەناو ئیمان ئێبراهیمیش که باوگ گشتمانه، بەشدارن.

¹⁷ ئەوجورە که وەناو تەورات نویسریاس: «مه تو کردمەسه باوگ ملەتیل فرەێگ.» له وەر چەو خودایش ئیجورەسه، خوداێ که ئێبراهیم وەپێ ئیمان هاورد، خوداێ که مردگیل زنیەو کەێ و چشتیلی که نیەن، تیەرێده دی.

¹⁸ وەشونێگ که ئمید نوی، ئێبراهیم وه ڕوی ئمیدەو باوەڕ کرد که باێه بوده باوگ ملەتیل فرەێگ، ئەوجورە که وەتریاویه پێ که «نەتەوەێ تو ئیجوره بود.»

¹⁹ ئێبراهیم ئەو وەخته که نوڕسیاده جەسەێ خوەێ که جور جەسەێ مردگ بی، هڵاێه نزیک سەد ساڵ داشت یا ئەو وەخته که نوڕسیاده مناڵدان مردگ سارا، وەناو ئیمان بی هاز نوی.

²⁰ ئێبراهیم وه بی ئیمانیەو وه وادەێ خودا شک نەکرد، بەڵکەم وەناو ئیمانێ وه قەوەتەو بی و خودا جەڵاڵ دا.

²¹ ئەوه وه تەمامی دڵنیا بی که خودا تویەناس وادەێ خوەێ بویده سەر.

²² هەر وه ئی بونه ئیمانێ «ئەڕاێ سالح بوین وه حساو هات.»

²³ وەلێ ئی قسیەێ «ئەڕاێ وه حساو هات»، تەنیا وه خاتر ئەوه نەنویسریا،

²⁴ بەڵکەم ئەڕا ئیمەیش نویسریا. ئەڕا ئیمەیش وه حساو تێد، ئیمەیلێگ که ئیمان دێریم وه ئەیو که خوداوەندمان عیسا له مردگیل زنیەو کرد.

²⁵ هەر ئەو عیسا که وەبونەێ خەتایل ئیمه دریاده دەس مەرگ و ئەڕا سالحان وه حساو هاتنمان زنیەو بی.