رومیەگان 16 - کتاب مقدس به زبان کردی جنوبی - گویش کلهوری

سڵام و دورود

¹ مه خویشگمان فیبی که خزمەتکار کلیساێ شار کنخریەس وەپێدان ناسنم،

² تا وەناو خوداوەند، وه لەونی که شایسەێ ئیمانداریل وه مەسیحه، قەبوڵێ بکێن و له هەر چشتێگ که هەوەجی کەفێ پێدان مەیەتی بێین، چوینکه وه فره کەسیل، تەنانەت خود منیش مەیەت فرەێگ داس.

³ وه پریسکیلا و ئاکیلا، هاوکاریلم وەناو مەسیح عیسا، سڵام برەسنن.

⁴ ئەوانه ئەڕا گیان من مل خوێان نانه، نه تەنیا مه سپاسێان کەم، بەڵکەم گشت کلیسایل ناجویلەکەیلیش سپاسێان کەن.

⁵ هەر ئیجوره وه کلیساێگ که ها ناو ماڵەگەێان سڵام برەسنن. وه ئپینتوس عەزیزم سڵام برەسنن، که یەکمین کەسێگ بی که وه ناوچەێ ئاسیا وه مەسیح ئیمان هاورد.

⁶ وه مریەم که ئەڕادان زامەت فرەێگ کیشاس، سڵام برەسنن.

⁷ وه خزمیلم، ئاندرونیکوس و یونیاس که وەگەردما وەناو زندان بین سڵام برەسنن. ڕەسولەیل، ئەوانه فره خاس ناسن و ئەوانه وەرجه من مەسیحی بینه.

⁸ وه ئامپلیاتوس که وەناو خوداوەند عەزیزم، سڵام برەسنن.

⁹ وه ئوربانوس هاوکارمان وەناو مەسیح و ئستاخیس عەزیزم، سڵام برەسنن.

¹⁰ وه ئاپلیس که وەناو مەسیح قەبوڵ کریاس سڵام برەسنن. وه بنەماڵەگەێ ئاریستوپولوس سڵام برەسنن.

¹¹ وه خزمەگەم هیرودیون سڵام برەسنن. وه ئەوانەێ که له بنەماڵەێ نارکیسوسن و وه خوداوەند ئیمان دێرن سڵام برەسنن.

¹² وه تریفینا و تریفوسا، که وەناو خوداوەند زامەت کیشن سڵام برەسنن. وه پرسیس عەزیز که وەناو خوداوەند فره زامەت کیشاس، سڵام برەسنن.

¹³ وه روفوس که وەناو خوداوەند هەڵوژاریاس، هەر ئیجوره داڵگێ که ئەڕا منیش داڵگێ کردێه سڵام برەسنن.

¹⁴ وه ئاسینکریتوس، فلگون، هرماس، پاتروباس و هرمس و برایلێ که هانه گەردیانەو سڵام برەسنن.

¹⁵ وه فیلولوگوس، یولیا، نیریاس و خویشکەگەێ و ئولیمپاس و گشت ئیمانداریل وه مەسیح که هانه گەردێانەو سڵام برەسنن.

¹⁶ وه ماچێگ موقەدەس سڵامه یەکترەکی بکەن. گشت کلیسایل مەسیح سڵامدان رەسنن.

¹⁷ ئێ برایل، لاڵکمه پێدان تا هوشدانه ئەوانه بود که بایس جیاوازین و نوا ڕێەگەدان گرن و وه نوای تالیمی که ئیوه گردينه، وسن؛ له ئەوانه دویرەو بگرن،

¹⁸ ئەڕا ئیه که ئیجور کەسیلێگ وه خوداوەندمان مەسیح خزمەت نيەکەن، بەڵکەم وه زگێان خزمەت کەن و وەگەرد قسیەیلی ڕەنگین و زوانبازی فریو دڵ ئایەمیل ساده دەن.

¹⁹ چوینکه دەنگ گوش تەکانندان وەناو گشتیەکی پێچیاس؛ جوری که له باوەت ئیوه فره خوەشاڵم. وەلێ لەلێدان توام له باوەت هەر چشتێگ که خاسه زانیار و له باوەت هەر چشتێگ خراوه، ساده بوین.

²⁰ خوداێ ئاشتی و سڵامەتی وه ئی زوی شەیتان وه ژێر پایلدان تلنێد. فیز خوداوەندمان عیسا مەسیح وەگەرددانەو بود.

²¹ تیموتاوس هاوکارم سڵامدان رەسنێ. هەر ئیجوره خزمەگانم لوکیوس، یاسون و سوسیپاتروسیش سڵامدان رەسننن.

²² مه، ترتیوس، نویسەر ئی نامه، وەناو خوداوەند سڵامدان کەم.

²³ گایوس که مێواندار من و گشت کلیساس، سڵام رەسنێده پێدان.

²⁴ ئراستوس که خەزانەدار شاره و برامان کوارتوس سڵام رەسننه پێدان. [«فیز خوداوەندمان عیسا مەسیح وەگەرد گشتدان بود. ئامین».]

²⁵ ئێرنگه جەڵاڵ وه ئەیو که تویەنێ وه پێ ئینجیلێگ که من جار دەم و وه پێ تالیم عیسا مەسیح، وه قەوەتدان بکێ - یانێ وه پێ وەحی ئەو رازه که ئەڕا دەورانیل دریژێگ، شاریاویدەو،

²⁶ وەلێ ئێرنگه ئاشکراوه بیه و له ڕێ نویسرایەگان پەێخەمەریل، وه پێ حوکم خوداێ ئەبەدی، وه گشت ملەتیل ئاشکرا بیه تا ئەوانه ئیمان بارن و گوش بتەکنن.

²⁷ وه ئەیو که یەکی خوداێ زاناس تا ئەبەد و تا ئەبەد له ڕێ عیسا مەسیح جەڵاڵ بود! ئامین.