رومیەگان 15 - کتاب مقدس به زبان کردی جنوبی - گویش کلهوری

نمونەێ مەسیح

¹ ئیمه که وه هێزیم، ها ملمانا که بی هازییل ئایەمیل زەیف تاموڵ بکێم و وەشون خوەشنودی خوەمان نویمن.

² باین تا هەر کام له ئیمه وەناو ئەو چشت خاسه که وەناو هاوساگەێ خوەێ دوینی له ئەو باوەته ئەو ئایەمه خوەشنود بکێ تا بوده بایس سەر پا ناینی.

³ چوینکه مەسیح وەشون خوەشنودی خوەێ نوی، بەڵکەم هەر ئەوجورە که وەناو کتاو زەبور نویسریاس: «سەرزەنشتیل ئەوانه که سەرزەنشتد کردن ڕشیا ملما.»

⁴ چوینکه هەر چشتێ که وه ڕوژیل جارانەو نویسریاس، ئەڕا تالیم ئیمه نویسریاس تا له ڕێ بەردەوامی و له ڕێ دڵگەرمیێگ که نویسریایل موقەدەس بەخشێد، ئمید بیاشتویمن.

⁵ با خوداێگ که سەرچاوەی بەردەوامی و دڵگەرمیه، بوەخشێده پێدان تا ئەوجورە که وەگەرد خاست مەسیح عیسا جور دەرتێد، وەگەرد یەکترەکی هاوفکر بوین،

⁶ تا یەدڵ و یەزوان، خودا یانێ باوگ خوداوەندمان عیسا مەسیح ستایش بکێن.

⁷ جا هەر ئەوجورە که مەسیح قەبوڵدان کردێه، ئیوەیش یەکترەکی قەبوڵ بکێن تا خودا جەڵاڵ پەێا بکێ.

⁸ چوینکه وەپێدان ئویشم که مەسیح ئەڕا ئیه که ڕاسی خودا نیشان بێی، بیه خزمەتکار خەتەنه کریایل یانێ هەر ئەو جویلەکەیله تا وادەیلێ که وه باپیریلمان دریاوی، مور بکێ و

⁹ تا ناجویلەکەیل، خودا وەبونەێ بەزەیێەگەێ ستایش بکەن. هەر ئەوجورە که وەناو نویسریایل موقەدەس نویسریاس: «وه ئی بونه، وەناو ناجویلەکەیل ستایشد کەم و ئەڕا ناود بەیت خوەنم.»

¹⁰ وەدواره وەناو کتاو تەورات فەرمایش کێ: «ئێ ناجویلەکەیل وەگەرد قەومەگەێ ئەیو خوەشی بکەن!»

¹¹ وەدواره وەناو کتاو زەبور فەرمایش کێ: «ئیوه ئێ گشت ناجویلەکەیل، ستایش خوداوەند بکەن! با گشت مەردم، جەڵاڵی بێەن!»

¹² وەدواره ئەشعەیاێ پەێخەمەر ئویشێ: «ریشەێ یەسا تێد، هەر ئەوه که هەڵسێد تا وه سەر ناجویلەکەیل فەرمانرەوایی بکێ؛ ناجویلەکەیل وه ئەیو ئمید بەسن.»

¹³ با خوداێ ئمید، وه گشت خوەشی و ئاشتی و سڵامەتی وەناو ئیمان، پڕدان بکێ تا که وه هێز روح‌القودوس، نیقەڵتوز له ئمید بوین.

خزمەت پولوس وەناو ناجویلەکەیل

¹⁴ ئێ برایلم، مه خوەم له ئیوه دڵنیام که خودان له خاسی پڕین و له هەر چی ماریفەته پڕین و تویەنین یەکترەکی تالیم بێین.

¹⁵ وەلێ له باوەت چشتیلێگ، وه ئازای فرەێگەو ئەڕادان نویسامه، تا ئەوانه بخەمه هویردان، وه بونەێ ئەو فیزه که خودا بەخشا پێم

¹⁶ تا بومه خزمەتکار مەسیح عیسا ئەڕا ناجویلەکەیل و خزمەت کاهنی جارداین ئینجیل خودا وه جێ بارم، تا ناجویلەکەیل پیشکەشی قەبوڵ کریاێگ بون وه دەرگاێ خودا که له ڕێ روح‌القودوس تەقدیس بینه.

¹⁷ جا وەناو مەسیح عیسا مدوێگ دێرم که وه خزمەتەگەم وه خودا شانازی بکەم.

¹⁸ چوینکه جرئەت نیەکەم له باوەت چشتێگ قسیه بکەم بێجگه ئەو چشته که مەسیح له ڕێ منەو وه جێ هاوردێه تا ناجویلەکەیل ئەڕا گوش تەکانن له ئیمان بارم - وەگەرد قسیەیلم و وەگەرد کاریلم،

¹⁹ وەگەرد هێز نیشانەیل و موجزەیل، وەگەرد هێز روح خودا - ئەوجورە که له شار ئورشەلیم تا شار ئیلیریکوم دەور دامه و خزمەت ئینجیل مەسیح وه تەمامی، ئەنجام دامه.

²⁰ ئاوەختم هەمویشه ئیه بی که وەشونێگ ئینجیل بانگەوازی بکەم که ناو مەسیح تا ئەو وەخته نەشنەفتنه، تا نەخواێ که وه سەر بنەواێ یەکیگتر، بنیاد بنەم،

²¹ بەڵکەم هەر ئەوجورە که وەناو کتاو ئەشعەیاێ پەێخەمەر نویسریاس: «ئەوانه که هویچوەخت لەباوەت ئەیو وەپێان نەوەتریاوی، دوینن و ئەوانه که هویچوەخت نەشنەفتنه، فامن.»

²² هەر وه ئی بونه، چەن جار که تواسم بامه ئەڕا لادان نوام گریاس.

نەخشەێ پولوس ئەڕا سەرداین له روم

²³ وەلێ ئێرنگه که وه ئی مەنتەقەیله، دی شونێ ئەڕا کار من نەمنیه و له ئەوره که چەن ساڵه ئەزرەت هاتن ئەڕا لادان دێرم،

²⁴ ئمید دێرم له سەر ڕێم وەر‎و ئێسپانیا، بوینمەدان و وەشون ئەوه که قێرێ له بێن وەگەرددان حەز کردم، ئەڕا گەردینم وه ئەوره مەیەتم بێین.

²⁵ وەلێ ئێرنگه دێرم چمه ئەڕا ئورشەلیم تا ئەڕا ئیمانداریل وه مەسیح مەیەت بوەم،

²⁶ چوینکه کلیسایل مەنتەقەیل مەقدونیه و ئەخائیه خوەشنود بین له ئیه که مەیەت کل بکەنه ئەڕا دەستەنگیلێ که هانه ئورشەلیم که وه مەسیح ئیمان دێرن.

²⁷ چوینکه ئەوانه خوێان خوەشنود بین ئی کاره بکەن و وه ڕاسییش قەرددار جویلەکەیلن، چوینکه ئەگەر ناجویلەکەیل وەناو بەەرکەتیل روحانی جویلەکەیل بەشدارەو بوینه، ها ملێانەو که جویلەکەیل وەناو بەەرکەتیل پویلی خزمەت بکەن.

²⁸ جا وەختێ ئی کاره کردم و ئەو چشته که گردەو بیه دامەێ پێان، له ڕێ ئیوه چمه ئەڕا ئێسپانیا.

²⁹ زانم که وەختێ بامه ئەڕا لادان، وه پڕی بەەرکەت مەسیح تیەم.

³⁰ ئێ برایل، وەبونەێ خوداوەندمان عیسا مەسیح و مابەت روح خودا، داوا له لێدان کەم که ئەڕا من وه دەرگاێ خوداوه دوعا بکێن و وەگەرد ئی کاره وەگەردمەو تەقالا بکەن

³¹ تا له دەس بی ئیمانیل یەهودیه ڕزگار بوم و خزمەتەگەم وه ئورشەلیم لەلاێ ئیمانداریل وه مەسیح قەبوڵ بکرێی.

³² تا ویجوره وه خاست خودا وه خوەشی بامه ئەڕا لادان و له لادان گیان تازەێگ بگرم.

³³ خوداێ ئاشتی و سڵامەتی وەگەرد گشتدانەو بود. ئامین.