رومیەگان 14 - کتاب مقدس به زبان کردی جنوبی - گویش کلهوری

ئیمانداریل بی هاز و وه قەوەت

¹ کەسێگ که ئیمانێ بی هازه، ڕێی بێەنه ناو خودان، بی ئەوه که وه سەر باوەڕیل مرافه بکێن.

² یەکیگ باوەڕ دێرێ که هەر چشتێگ تویەنێ بخوێ، وەلێ یەکیگتر که ئیمانێ بی هازه، تەنیا سەوزی خوەێ.

³ ئەوه که گشت چشتێگ خوەێ، نەبایه وه ئەوه که نیەخوەێ وه چەو سوک بنوڕیده پێەو؛ ئەوه که گشت چشتێگ نیەخوەێ، نەبایه ئەو کەسه که هەر خواردەمەنێگ خوەێ، ماکوم بکێ. چوینکه خودا ئەو کەسه قەبوڵ کردێه.

⁴ تو کیێد که وه خزمەتکار کەسێگ تر حوکم کەی؟ سەرپا بوین یا کەفتنێ ها دەس گەورەگەێ. ئەوه بەردەوام مینێ چوینکه خوداوەند تویەناس ئەوه سەرپا بکێ.

⁵ کەسێگ یە ڕوژ خاستر له ڕوژیلتر زانی؛ وه حاڵێگەو که یەکیگتر، گشت ڕوژیل یەێ جور زانی. هەر کەس باێه وەناو فکر خوەێ دڵنیا بود.

⁶ ئەوه که ڕوژیگ وه تایبەتی گرنگ زانی، وه حرمەت خوداوەند گرنگ وه حساو تیەرێ. ئەوه که خوێد، وه حرمەت خوداوەند خوێد، چوینکه سپاس خودا کێ و ئەوه که له خواردن پارێز کێ، ئەوه وه حرمەت خوداوەند پارێز کێ و سپاس خودا کێ.

⁷ چوینکه هویچکام له ئیمه ئەڕا خوەمان زنەیی نیەکیمن و هویچکام له ئیمه ئەڕا خوەمان نیەمریمن.

⁸ ئەگەر زنەیی کیم، ئەڕا خوداوەند زنەیی کیم و ئەگەر مریەم، ئەڕا خوداوەند مریمن. جا چ زنەیی بکێم، چ بمریم، هن خوداوەندیمن.

⁹ چوینکه وه ئی بونه مەسیح مرد و وەدواره زنیەو بی تا هەم بوده خوداوەند مردگیل و هەم خوداوەند زنیێل.

¹⁰ تو ئەڕا براگەێ خوەد ماکوم کەی؟ یا ئەڕا وه براگەێ خوەد وه چەو سوک نوڕێید؟ چوینکه گشتمان لەنواێ تەخت داوەری خودا وسیمن.

¹¹ ئەڕا ئیەک وەناو کتاو ئەشعەیاێ پەێخەمەر نویسریاس: «خوداوەند فەرمایش کێ: وه ژیان خوەم قەسەم که هەر زرانێگ لەنواێ مه چەمێدەو و هەر زوانێگ وه خودا ئێقرار کێ.»

¹² جا هەر کام له ئیمه حساو خوەێ وه خودا دەێدەو.

¹³ وه ئی بونه، له ئیەودویا باین یەکترەکی ماکوم نەکێم. بەڵکەم وه جێ ئەوه، بتوان هویچ وەخت له سەر ڕێ براێگ کوچگیگ نەخین که بوده بایس کەفتنێ، یا چشتێ مەنەنه نوای ڕێەگەێ.

¹⁴ من وەناو خوداوەند عیسا زانم و قانێ بیمه که هویچ چشتێگ وه خوێەو ناپاک نیه. وەلێ ئەگەر کەسێگ فکر کەێد که ئەوه ناپاکه، ئەڕاێ ناپاکەو بود.

¹⁵ چوینکه ئەگەر وەگەرد ئەو چشته که خوەید، براگەد دەردەدارەو کەی، دیتر ڕێ رەوشتد وەناو مابەت نيه. وەگەرد ئەو چشته که خوەید، ئەو کەسه که مەسیح وەبونەێەو مرد، نابود مەکه.

¹⁶ جا نێلین وه خراوی باس ئەو چشته بکەن که ئیوه وه خاس زانینەێ.

¹⁷ چوینکه پادشایی خودا خواردن و نوشاین نیه، بەڵکەم سالح بوین و ئاشتی و سڵامەتی و خوەشی وەناو روح‌القودوسه.

¹⁸ هەر کەس ویجوره خزمەت مەسیح بکێ، خودا قەبوڵێ کێ و مەردمیش مورێ کەن.

¹⁹ جا بان وەشون ئەو چشته بویمن که بایس ئاشتی و سڵامەتی و وەسەرپاناین یەکترەکیمانه.

²⁰ وەبونەێ خواردەمەنی کار خودا خراو مەکه! وه ڕاسی گشت خواردەمەنیەگان پاکن، وەلێ خواردن هەر خواردەمەنێگ که بوده بایس کەفتن یەکیگتر، کار نادرسێگه.

²¹ خاسه که گوشت یا شراو نەخوەێ یا کارێگ نەکێ که بوده بایس کەفتن براگەد.

²² باوەڕێ که له باوەت ئی چشتیله دێرێ، با لەلاێ خوەد و خودا بمینێ. خوەش وه حاڵ کەسێگ که له باوەت ئەو چشته که خوەێ پەسەنی کەێد، داوەری خوەێ نیەکێ.

²³ وەلێ هەر کەس که شک بیاشتود ئەگەر بخوێ، تاوانباره، چوینکه له ڕوی ئیمان نەخواردیەسێ، ئەڕا ئیه که ئەو چشته که له ڕوی ئیمان نود، گوناس.