رومیەگان 13 - کتاب مقدس به زبان کردی جنوبی - گویش کلهوری

له دەسڵاتداریل گوش بتەکنن

¹ با هەر کەسێگ خوەێ بیده دەس دەسڵاتداریل حاکم، چوینکه هویچ دەسڵاتێگ بێجگه لەلاێ خوداوه نیه و ئەوانەێ که هەن، لەلاێ خوداوه دیاری کریانه.

² جا ئەوه که لەنواێ دەسڵاتداریل وسێد، وه نوای ئەو چشته که خودا دیاری کردێه، وساس و ئەوانه که ئیجوره کەن، داوەری بون.

³ چوینکه کەسیلێ که کردەوەێان خاسه له حاکمیل زاورێان نیەچود، وەلێ کەسیلێ که کردەوەێان خراوه زاورێانه لێان چود. ئێ تواێ له ساێو دەسڵات زاورد نەچود؟ جا ئەو چشته که درسه، وه جێ بار که تاریفه لێد کێ.

⁴ چوینکه ئەوه خزمەتکار خوداس ئەڕا خێریەت توی. وەلێ ئەگەر کار خراوێگ بکێ، زاورد بچود، وەبونەێ ئیه که بیخودی شمشێر هەڵنیەگرێ. چوینکه ئەوه خزمەتکار خوداس، کەسێگه که ئنتقام گری و خەزەو خودا تیەرێده سەر ئایەمێگ که خراوکاره.

⁵ جا ئایەم نه تەنیا ئەڕا پارێز له خەزەو خودا، بەڵکەم وەبونەێ وژدان خویشێ باێه له دەسڵاتداریل گوش بتەکنێ.

⁶ وه ئی بونەێشه باج دین، چوینکه دەسڵاتداریل، خزمەتکاریل خودان و خوێان نانەسه ئەڕا هەر ئی کاره.

⁷ قەرد خوەدان وه گشتیەکی بێەن: وه ئەوه که قەرد باج داین دێرین، باج بێەن؛ وه ئەوه که قەرد سەرانه داین دێرین، سەرانه بێەن؛ وه ئەوه که قەرد گەورایی وه جێ هاوردن دێرین، گەورایی وه جێ بارن؛ وه ئەوه که قەرد حرمەت گردن دێرین، حرمەت بگرن.

وه دی هاتن شەریعەت له ڕێ مابەت

⁸ هویچ چشتێگ وه کەسێ قەرددار نەون، بێجگه ئیەک یەکترەکی مابەت بکێن. چوینکه کەسێگ که وه یەکیگ تر مابەت بکێ، شەریعەت وه جێ هاوردێه.

⁹ چوینکه حوکمیل ’داوانپێسی مەکه‘، ’خوین مەکه‘، ’دزی مەکه‘، ’تەما مەکه‘، و هەر حوکمێگ تر، گشتێ وەناو ئی کەڵامه کوڵ و کوڵبڕ بود که «هاوساگەد هەر جور خوەد دوس بیاشتو.»

¹⁰ مابەت، وه هاوساگەێ خوەێ خراوی نیەکێ؛ جا مابەت وه دی هاتن شەریعەته.

¹¹ بێجگه ئیه ئیوه زانین هاینه ناو چ زەمانێگ. چوینکه ساتێ ڕەسیه که له خەو هەڵسێن، ئەڕا ئیەک ئێرنگه وه بەراورد وەگەرد ئەو وەخته که تازه ئیمان هاوردیم، نجات وه ئیمه نزیکتره.

¹² شەو تەمامە و ڕوژ نزیکه. جا بان کردەوەێ تیەریکی فڕەی بیمن و زرەی نویر بکێمنه وەر.

¹³ بان ڕێ رەوشتمان ئەوجورە درس بود که شایسەێ کەسیلێگه که هانه ناو ڕوشنایی ڕوژ. جا وەختمان وەناو عەێاشی و سەرخوەشی و خیزی و هەرزەیی و مرافه و حەسویی، وه سەر نەوەێم،

¹⁴ بەڵکەم خوداوەند عیسا مەسیح هەر جور دڵنگێگ بکێنه وەر. ئەڕا جەسه تەداروک نوینن که هەواوهەوەسیلێ وه جێ بارین.