رومیەگان 12 - کتاب مقدس به زبان کردی جنوبی - گویش کلهوری

قوروانی زنی

¹ جا ئێ برایل، له وەر پرشەێ بەزەیێل خودا، لاڵکمه پێدان که جەسەیلدان جور قوروانیێگ زنی و موقەدەس و دڵخواز خودا پیشکەش بکەن، که پەرەسش روحانی ئیوه هەر ئیەسه.

² شێوەێ ئی جهانه نەگرنه خوەدان، بەڵکەم وه نو کردن زەین خوەدان، ئاڵشت بون. ئەوسا تویەنین بزانین که خاست خودا چەس؛ خاست خاس و پەسەن کریا و کامڵێ.

³ چوینکه له ڕێ فیزێگ که دریاسه مه، وه هەر کامدان ئویشم که خوەدان فرەتر له ئەو چشته که باێه، نەزانین، بەڵکەم هەرکەس چەنه ئیمانێگ که خودا ئەڕاێ دیاری کردێه، هوشیارانه خوەێ داوەری بکێ.

⁴ چوینکه هەر ئەوجورە که وەناو یە جەسه ئەنامیل فرەێگ دێریم و گشت ئی ئەنامیلە کارێان جور یەک نیه،

⁵ ئیمەیش هەرچەن فرەیمن، وەناو مەسیح یە جەسەیمن و هەر کام، گله وه گله ئەنامیل یەکترەکێم.

⁶ وه پێ فیزێگ که لەلاێ خودا دریاسه پێمان، ئیمه خەڵاتیلێگ دێریم که جور یەک نین، جا باین تا خەڵاتیەگانمان وه کار بویم. ئەگەر خەڵاتیمان نەبوەته، ئەوه وه پێ ئیمانمان وه کار بگریم.

⁷ ئەگەر خزمەت کردنه، وەناو خزمەت کردنمان. کەسێگ که تالیم دەێ، وەناو تالیمەگەێ.

⁸ کەسێگ که هان دەێ، وەناو هان داینەگەێ. کەسێگ که مەیەت دەستەنگیل دەێ، ئی کاره وه دەسدڵوازیەو بکێ. کەسێگ که ڕابەری کێ، ئی کاره وه غیرەتەو بکێ. کەسێگ که بەزەیی کێ، ئی کاره وه خوەشیەو بکێ.

نیشانەیل مەسیحی ڕاسەکانی

⁹ مابەت باێه دویر له دوڕویی بود. له شەڕئاشویی قیندان باێ و قورس بلچکێینه ئەو چشته که خاسه.

¹⁰ وەگەرد مابەت براێانه، یەکترەکی دوس بیاشتوین. وەناو حرمەت ناین وه یەکترەکی، بێەنه نوای یەکانەو.

¹¹ غیرەتدان کەمەو نود؛ وەناو روح گڕەدان باێ و خزمەت خوداوەند بکەن.

¹² وەناو ئمید دڵشاد بون، وەناو بەرد سەور بیاشتون و وەناو دوعا بەردەوام بون.

¹³ وەناو پەرچەو کردن هەوەجییل ئیمانداریل وه مەسیح بەشدار بون و مێواندار بون.

¹⁴ ئەڕا کەسیلێ که عەزاودان دەن، داواێ بەەرکەت بکەن؛ داواێ بەەرکەت بکەن و نوڕیان مەکەن!

¹⁵ وەگەرد خوەشاڵێل، خوەشی بکەن و وەگەرد ئەوانه که گیره کەن، گیره بکێن.

¹⁶ وەگەرد یەکترەکی بسازن! لویتبەرز نەون، بەڵکەم وەگەرد ئایەمیل پایەنزم، هات بچو بکەن. هویچ وەخت خوەدان وه زانا میەنه قەڵەم.

¹⁷ وه هویچکەس وه جیاێ خراوی، خراوی مەکەن. بەڵکەم هوشدان بود که ئەو چشته که له وەر چەو گشتیەکی حرمەت دێرێ، وه جێ بارین.

¹⁸ ئەگەر بود، تا ئەوره که له دەسدان تێد وەگەرد گشتیەکی وه ئاشتی و سڵامەتی زنەیی بکەن.

¹⁹ ئێ عەزیزەیل، هویچوەخت خوەدان ئنتقام مەسینن، بەڵکەم ئەوه بێەنه دەس خەزەو خودا. چوینکه وەناو کتاو تەورات نویسریاس که «خوداوەند فەرمایش کێ: ”ئنتقام هن منه؛ منم که سزا دەم.“»

²⁰ وه چەواشەوه، «ئەگەر دشمەند ورسێه، تێرێ بکه! ئەگەر تیەنیه، چشتێ بیه پێ تا بنوشێ! ئەڕا ئیه که وەگەرد ئی کاره جورێگ شەرمزارێ کێ که چماێ سکڵیل گڕان خیده مل سەریەو.»

²¹ خراوی وه سەرد زاڵ نود، بەڵکەم وەگەرد خاسێ وه سەر خراوی زاڵەو بو.