رومیەگان 11 - کتاب مقدس به زبان کردی جنوبی - گویش کلهوری

ئەو باقی مەردم ئێسرائیل

¹ جا پرسم: ئێ خودا قەومەگەێ خوەێ ڕەد کردێه؟ هەراێهەر؛ چوینکه من خوەم ئێسرائیلیم، له نەتەوەێ ئێبراهیم پەێخەمەر و له هوز بنیامین.

² خودا قەومەگەێ خوەێ که وەرجەوە ناسی، ڕەد نەکردیه. ئێ نيەزانين نویسریای موقەدەس له باوەت ئەلیاس پەێخەمەر چه ئویشێ؟ له باوەت ئیه که ئەوه چوی لەلاێ خوداوه له دەس قەوم ئێسرائیل گلەی کێ و ئویشێ:

³ «خوداوەندا، پەێخەمەریلد کوشتنه و قوروانگاێیلد خاپور کردنه. تەنیا من مەنمه و توان گیان منیش بسێنن.»

⁴ وەلێ جواو خودا وەپێ چەس؟ ئەیو فەرمایش کرد: «مه ئەڕا خوەم هەفت هەزار نەفەر نامەسه لا که لەنواێ بت بەعەل زرانی نیانه.»

⁵ هەر ویجوره، وه ئی زەمانیشه قێرێگ مەننه که له ڕێ فیز خودا هەڵوژاریانه.

⁶ وەلێ ئەگەر له ڕێ فیز بود، دی وه پێ کردەوه نیه؛ ئەگەرنه فیز دی فیز نیه. وەلێ ئەگەر له ڕێ کرده‎وه بود، دیتر وه ڕوی فیز نیه، ئەگەر نه کردەوه دیتر کردەوه نیه.

⁷ جا چه؟ ئیەک ئێسرائیل ئەو چشته که وەشونێ بی، وه دەس ناورد. هەڵوژاردەگان وه دەس هاوردن، وەلێ ئەو باقی تویش دڵڕەقی هاتن.

⁸ هەر ئەوجورە که وەناو نویسریایل موقەدەس نویسریاس: «تا وه ئی ئیمڕوه خودا روح وڕ گیجی دا پێان، چەویلی که نیوینن و گوشیلێ که نیەشنەفن.»

⁹ جا داود پادشا ئویشێ: «با سفرەگەێان بوده دام و تەڵه ئەڕاێان، بوده کوچگێگ وه نوای پاێان که بایس کەفتنه و بوده سزاێگ ئەڕاێان.

¹⁰ با تەم بان چەویلیان بگرێ تا نەتویەنن بوینن و ئەڕا هەمویشه پشتێان بچەمێدەو.»

¹¹ جا پرسم: ئێ ئەوانه پاێان هەڵکەفت تا بێەنه زەویا؟ هەراێهەر! وه جێ ئەوه له ڕێ خەتای ئەوانه، نجات ئەڕا ناجویلەکەیل هاتیەسه دی، تا قەوم ئێسرائیل بارێده سەر غیرەت.

¹² ئیسه ئەگەر خەتای ئەوانه بوده بایس دەوڵەمەنی جهان و ئەگەر شکەسیان بوده بایس دەوڵەمەنی ناجویلەکەیل، جا وەختێ که ژمارەێ جویلەکەیلی که نجات پەێا کەن، کامڵەو بود، چەنێ فرەتر بوده بایس دەوڵەمەنی؟

¹³ ئێرنگه ڕوی دەمم ها گەرد ئیوه ناجویلەکەیل. له ئەوره که من ڕەسول ناجویلەکەیلم، وه خزمەتەگەی خوەم فره شانازی کەم،

¹⁴ تا یە جورێگ هاونژادیل جویلەکەم بارمه سەر غیرەت و ویجوره بڕێگیان نجات بێەم.

¹⁵ چوینکه ئەگەر ڕەد بوین ئەوانه وه ماناێ ئاشتی جهان وەگەرد خوداس، قەبوڵ بوینیان چ ماناێگ دێرێ، بێجگه زنیەو بوین له مردگیل؟

¹⁶ ئەگەر یە مشت له خەویرەگه که جور نەوبەرێگ پیشکەش بود، موقەدەس بود، ئەوسا، گشت خەویرەگه موقەدەسه و ئەگەر ریشەێ دارەگه موقەدەس بود، پەلەگانیشێ موقەدەسن.

¹⁷ وەلێ ئەگەر بڕێگ له پەلەگان بڕیان و تو، هەر چەن که پەلێگ له دار زیتون کویەیله بید، وەناو پەلیل تر دریایده قێ دار زیتونەگه و ئێرنگه له شیرەێ وه قەوەت ریشەێ دار زیتون هاوبەشی،

¹⁸ شانازی وه سەر ئەو پەلیله مەکه. ئەگەر ئیجوره کەی، وه هویرد بود تو نید که ریشەگه پارێزنێد، بەڵکەم ریشەگەس که پارێزنێدەد.

¹⁹ ئەو وەخته تو ئویشێد: «پەلەگان بڕیانه تا من بێریەمەقێەو.»

²⁰ ڕاس ئویشێ. ئەوانه وه بونەێ بی ئیمانیێان بڕیانه، وەلێ توی له ڕێ ئیمان بەردەوامی. جا لویتبەرز نەو بەڵکەم ڕخد بچود.

²¹ چوینکه ئەگەر خودا بەزەیی ناته پەله ئەسلیەگان، وه تنیش بەزەیی نیەتێ.

²² جا مێرەبانی و سەختگیری خودا له وەر چەودەو بود؛ سەختگیری وه کەسیلێ که کەفتنەسه خوار، وەلێ مێرەبانی خودا وه توێ، هەڵبەت وه ئی مەرجه که وەناو مێرەبانیەگەێ بەردەوام بمینێ؛ ئەگەرنه تنیش بڕێید.

²³ تەنانەت ئەگەر ئەوانیش وەناو بی ئیمانیێان نەمینن، وەدواره دریەنه قێ دارگەوه، چوینکه خودا تویەناس یەێ جارتر ئەوانه بیده قێ دارگەوه.

²⁴ چوینکه ئەگەر تو له دار زیتون کویەیله بڕیاید و وه چەواشەێ سریشت خوەد دریایەسه قێ دار زیتون ماڵی، جا چەنێ فرەتر پەله ئەسلیەگان تویەنن بێریەنه قێ ئەو دار زیتونێ که لەلێ بڕیانه.

نجات ئێسرائیل

²⁵ ئێ برایل، نیەتوام له ئی رازه بی خەوەر بوین - نەخواێ خوەدان وه زانا بزانین - دڵڕەقی وه بەشێگ له ئێسرائیل حوکم فەرما بیه، تا وەختێ که ژمارەێ ناجویلەکەیلێگ که وه مەسیح ئیمان تیەرن، کامڵەو بود.

²⁶ جا ئیجوره گشت ئێسرائیل نجات پەێا کێ. جوری که وەناو نویسریایل موقەدەس نویسریاس: « ڕزگارکەر له کویەێ سەهیون تێد و خودانەناسی له نەتەوەێ یاقوب هەڵگرێد.

²⁷ ئیه پەێمان من وەگەرد ئەوانەسه وەختێ که گونایلێان لا بوەم.»

²⁸ له باوەت ئینجیل، جویلەکەیل وەبونەێ ئیوه، دشمەنن؛ وەلێ له باوەت دەسنیشان خودایی، ئەوانه وەبونەێ باپیریلێان، عەزیز خودان.

²⁹ چوینکه خودا خەڵاتییل و داوەتەگەێ خوەێ نیە‎سێنێدەو.

³⁰ چوینکه هەر ئەوجورە که ئیوه دەورانێگ له خودا ملچەفتەو کردیاین، وەلێ ئێرنگه وەبونەێ ملچەفتەو کردن جویلەکەیل، بەزەیی هاتیەسه پێدان،

³¹ هەر ئەوجورە ئەوانیش ئێرنگه ملچەفتەو کردنه تا وەبونەێ بەزەیی خودا وه ئیوه، ئێرنگەیش بەزەیی باێده ئەوانه.

³² چوینکه خودا گشتیەکی داسه دەس ملچەفتەو کردن، تا بەزەیی باێده گشتیەکی.

بیت ستایش

³³ ئای چەنێ قویله دەوڵەمەنی و زانیاری و ماریفەت خودا؛ نیود له ‎داوەریەگانێ سەر دەر باری و نیود ڕێەگانێ بفامێ.

³⁴ «چوینکه کیه که فکر خوداوەند زانستوی یا کیه که مەشویرەت داویده پێ؟»

³⁵ «یا کیه که خەڵاتێگ بەخشاویه خودا تا وه جێ ئەوه بێرێیدەوه پێ؟»

³⁶ چوینکه گشت چشتێگ له ئەیو و له ڕێ ئەیو و ئەڕا ئەیوه. تا ئەبەد جەڵاڵ ئەڕا ئەیو بود. ئامین.