رومیەگان 1 - کتاب مقدس به زبان کردی جنوبی - گویش کلهوری

¹ له پولوس، خوڵام مەسیح عیسا، که دەنگ کریاس تا بوده یەێ ڕەسول، جیاوه بیه تا مزگانی ئینجیل خودا جار بیێ؛

² هەر ئەو ئینجیله که خودا وەرجەوە، له ڕێ پەێخەمەریل خوەێ، وەناو نویسریایل موقەدەس وادەێ داوید و

³ له باوەت کوڕ ئەیوه، که وه پێ جەسه له نەتەوەێ داود پادشا بی و

⁴ وەگەرد زنیەو بوینی له ناو مردگیل، وه پێ روح قودوسیەت، وەناو هێز، جار دریاد که کوڕ خوداس، یانێ خوداوەندمان عیسا مەسیح.

⁵ ئیمه له ڕێ ئەیو و وەبونەێ ناوێ فیز و خزمەت ڕەسول بێن دریاسه پێمان تا وەناو گشت ملەتیل، مەردم دەنگ بکێم ئەڕا گوش تەکانن له ئیمان.

⁶ ئیه ئیوەیش گرێده وەر که دەنگ کریاینه تا هن عیسا مەسیح بوین؛

⁷ وه گشت ئەوانه که وەناو شار روم، خودا دوسیان دێرێ و دەنگ کریانه تا له موقەدەسیل بون: فیز و ئاشتی و سڵامەتی لەلاێ خودا، باوگ ئیمه و خوداوەند عیسا مەسیح، وەگەرددانەو بود.

ئەزرەت دین روم

⁸ وەرجه هەر چشتێ، له ڕێ عیسا مەسیح، وەبونەێ گشتدان سپاس خوداێ خوەم کەم چوینکه ئیماندان وه گشت کورەێ دنیا دەنگ داسەو.

⁹ چوینکه خوداێگ که ئەیو وەگەرد روحم وەناو کار ئینجیل کوڕەگەێ خزمەتی کەم، شاێەتمه که چوی لەناو دوعایلم یەێسەر وه هەر وەختێگ تیەرمەدانه هویرم و

¹⁰ لاڵکیەمەو که ئەگەر خودا بتواێ، ئیسه دەس ئاخر یەێ جورێگ بتویەنم بام ئەڕا لادان.

¹¹ چوینکه ئەزرەت دێندان دێرم تا خەڵات روحانیگ برەسنمه پێدان که بوده بایس قەوەتدان؛

¹² یانێ تا له ئیمان یەکترەکی دڵگەرمەو بویمن، من له ئیمان ئیوه و ئیوه له ئیمان من.

¹³ ئێ برایل، نیەتوام بی خەوەر بوین که چەن جار تواسمه بامه ئەڕا لادان، وەلێ هەر جار ڕێه لێم بەسریا. توام که وەناو ئیوەیش خەلەێگ درەو بکەم، هەر ئەوجورە که وەناو ئەو باقی ناجویلەکەیل ئی کاره کردمه.

¹⁴ مه خوەم هەم وه یونانیەگان و هەم وه بەربەریل، هەم ئایەمیل زانا و هەم ئایەمیل نەزان قەرددار زانم.

¹⁵ جا ئەزرەت فرەێگ دێرم که وه ئیوەیش که هاینه روم ئینجیل جار بێەم.

¹⁶ چوینکه مه له ئینجیل شەرمزار نیم، ئەڕا ئیەکه هێز خوداس ئەڕا نجات هەر کەسێگ که ئیمان بارێ، یەکم جار جویلەکە و لەشونی یونانی.

¹⁷ چوینکه وەناو ئینجیل، ئەو سالح بوینه که له خوداس ئاشکراوه بود، که له سەرەتا تا وه ئاخر ها مل ئیمان. هەر ئەوجورە که وەناو کتاو حەبەقوق پەێخەمەر نویسریاس: «سالحان وه ئیمان زنەیی کەی.»

خەزەو خودا وه سەر نادرسێ بەشەر

¹⁸ چوینکه خەزەو خودا له ئاسمان ئاشکرا بود وه سەر هەر لەون خودانەناسی و نادرسێ ئایەمیلێگ که وەگەرد نادرسێ خوێان، نوای ڕاسی گرن.

¹⁹ چوینکه ئەو چشته که لەباوەت خودا بود بناسی ئەڕاێان ئاشکراس، ئەڕا ئیه که خودا ئەوه نیشانیان داس.

²⁰ چوینکه هەر له ئەو وەخته که جهان وه دی هات، سفەتیل نادیاری خودا، یانێ هێز ئەبەدی و خودابوینێ، وەناو چشتیلی که درس کردێه، خاس بو بوینیدێ. جا هویچ دەسپێچکێگ ئەڕا ئەوانه نیه.

²¹ ئەڕا ئیه که هەر چەن ئەوانه خودا ناسین، وەلێ جور خودا حرمەت ئەیو نەگردن و سپاسێ نەکردن، بەڵکەم وەناو فکرێان تویش چشتیل پویچ هاتن و دڵ بێ فامێان تیەریکەو بی.

²² ئەوانه خوێان وه زانا زانستیان، وەلێ گیلگەوج بین و

²³ جەڵاڵ خوداێ نەمر وەگەرد پێکەریلی که جور ئنسانێگ که مرێ و باڵەندەیل و گیانەوەریل و خزنەیلن، گوڕانن.

²⁴ جا خودایش ئیانه وەناو شاوەتیل دڵیان وه ناپاکی هیشت، تا وەناو خوێان جەسەیلیان بی حرمەتەو بکەن.

²⁵ چوینکه ئەوانه ئەو ڕاسیه که لەباوەت خوداس وەگەرد درو گوڕانن و درسکریاێ وه جێ درسکەر پەرەسش و خزمەت کردن، درسکەرێ که تا ئەبەد پڕ بمارکه. ئامین.

²⁶ وەئی بونه خودایش ئیانه وەناو هەواوهەوەسیل شەرمزارانه هیشتیانه خوێانا. تەنانەت ژنیلیان، جفتبوین سریشتیێان وەگەرد ئەو چشته که ناسریشتیه، گوڕانن.

²⁷ هەر ویجوره، پیاێلیش له جفتبوین سریشتی وەگەرد ژنيلیان واز هاوردن و ناو ئاگر هەواوهەوەس ئەڕا یەکترەکی، سزیان. پیاێل وەگەرد پیاێل کاریل شەرمزارانه کردن و سزاێ خەتایلیان وەناو خوێان گردن.

²⁸ وەبونەێ ئیه که ئەڕا ئەوانه ناسین خودا نیەتیەرزیاد، خودایش ئەوانه هیشته ناو فکریل ناشیرێن تا کارێگ بکەن که نەبایه بکرێید.

²⁹ ئیانه نیقەڵتوز بین له هەر لەون نادرسێ، شەڕئاشویی، تەما و دڵپێسی. ئەوانه پڕن له حەسویی، خوین کردن، مرافه، فریو و دڵپێسی. قسیه تیەرن و بەن،

³⁰ بختکەرن، کەسیلێگن که قینێان له خودا تێ، بێ شەرم، لویتبەرز و خودپەرەسن. ئەڕا وه جێ هاوردن کاریل شەڕئاشویی، ڕێیل تازه درس کەن. ملچەفتەوکەر وه داڵگ و باوگ،

³¹ گیلگەوج، بێ وەفا، بێ ئافتوهەست و بێ بەزەیین.

³² هەر چەن له حوکم دادپەروەرانەێ خودا ئاگادارن که ئەوانەێ که ئیجور کاریلێ کەن، سزاێان مەرگه، نه تەنیا خوێان ئەو کاریله کەن، بەڵکەم کەسیلێگیش که ئەو کاریله کەن، مور کەن.