وەحی وه یوحەنا 7 - کتاب مقدس به زبان کردی جنوبی - گویش کلهوری

ژمارەێ مور کریایل

¹ وەشون ئیه، دیم چوار فریشته له چوارپەل زەوی وسانه و نوای چوار وای زەوی گردنه تا هویچ واێگ وه مل زەوی یا دەریا یا هویچ دارێگ هەڵ نەکێ.

² ئەو وەخته فریشتەێگتر دیم که له ڕوژهەڵاتەو وەرەو ئاسمان بەرزەو بویاد و مور خوداێ زنی وەگەردیەو بی. ئەو وه دەنگ بەرزێگ ئەو چوار فریشته که هێز دریاویده پێان تا وه زەوی و دەریا زەرەر برەسنن، چڕێ و

³ وەته پێان: «وەرجه ئەوه که تەخت تێوڵ خزمەتکاریل خودامان مور بکێم، وه زەوی یا دەریا یا داریل زەرەر نەرەسنین.»

⁴ ئمجا شنەفتم که ژمارەێ مورکریاییل سەد و چل و چوار هەزار نەفەر له گشت هوزیل بەنیئسرائیل بی.

⁵ له هوز یەهودا دوانزه هەزار نەفەر مور کریان، له هوز ڕئوبین، دوانزه هەزار نەفەر، له هوز جاد، دوانزه هەزار نەفەر،

⁶ له هوز ئەشیر، دوانزه هەزار نەفەر، له هوز نەفتالی، دوانزه هەزار نەفەر، له هوز مەنەسی، دوانزه هەزار نەفەر،

⁷ له هوز شەمعون، دوانزه هەزار نەفەر، له هوز لاوی، دوانزه هەزار نەفەر، له هوز یەساکار، دوانزه هەزار نەفەر،

⁸ له هوز زبولون، دوانزه هەزار نەفەر، له هوز یوسف، دوانزه هەزار نەفەر و له هوز بنیامین دوانزه هەزار نەفەر مور کریان.

جەماێەت فرەێ نجات پەێا کریایل

⁹ له شون ئەوه نوڕستم و ئێرنگه، جەماێەت فره گەوراێگ له هەر ملەتێگ، له گشت هوزیل و قەومیل و زوانیل دیم که هویچکەسێگ نیەتویەنستیاد بژمارێدیان و ئەوانه وه نوای تەختەگه و له نوای وەرکەگه وساوین. گشتێان بەتیەێ چەرمگ له وەرێان بی و پەلیل دار خورما وه دەسێانەو.

¹⁰ ئەوانه وه دەنگ بەرزیگەو خوەنیان که: «نجات هن خوداێ ئیمەس، که له بان تەخت دانيشتێه و هن وەرکه.»

¹¹ جا گشت فریشتەیل، دەورادەور تەختەگه و دەورادەور پیریل و چوار گیانەوەر زنی وساوین؛ جا گشتێان له نوای تەختەگه وه دەمەو کەفتنه مل زەویا و خودا پەرەسیان،

¹² وەتن: «ئامین! ستایش و جەڵاڵ و زانیاری و سپاس و حرمەت و هێز و تویەنایی ئەڕا خوداێ ئیمه بود، تا ئەبەد و تا ئەبەد. ئامین!»

¹³ ئەو وەخته یەکیگ له ئەو پیریله له لێم پرسی: «ئیانه که بەتیەێ چەرمگ ها وەرێان کین و له کوره هاتنه؟»

¹⁴ جواو دام: «ئیه تو زانیدن، گەورەم.» جا ئەو وەته پێم: «ئیانه کەسیلێگن که له ئەو بەرد فره گەورا ڕەد بینه و بەتیەگانێان وەناو خوین وەرکەگه شوردنه و چەرمگەو کردنه.

¹⁵ هەر له ئی باوەتەسه که: «ئیانه هانه نوای تەخت خودا شەو و ڕوژ ئەیو له ناو مابەدەگەێ خزمەت کەن؛ ئەیو که دانیشێده بان تەختەگه، وەگەرد بین خوەێ سەرپەنا دەێده پێان.

¹⁶ جا ئەوانه دیتر ورسی نیەون و دیتر تیەنی نیەون، نه خوەر دەێەلێان و نه هویچ گەرماێترێگ که سزنێد.

¹⁷ چوینکه وەرکەگه له ناوڕاس تەختەگه بوده شوان ئەوانه و ئەوانه وەرەو کیەنییل ئاو زنەیی دەر ڕێنماییان کەێد. و خودا هەر ئەسرێگ له چەویان پاکەو کەێد.»