وەحی وه یوحەنا 5 - کتاب مقدس به زبان کردی جنوبی - گویش کلهوری

تومار و وەرک

¹ ئەو وەخته له دەس ڕاس تەختنشینەگه تومارێگ دیم که نویسریایلی وه پشت و نوایەو بی و وەگەرد هەفت گله مور، تومارەگه مور کریاوی.

² جا فریشتەێ هێزدارێگ دیم که وه دەنگ بەرز جار دیاد: «کیه که شایسەێ واز کردن تومار و شکانن موریلێ بود؟»

³ جا هویچکەسێگ، نه وەناو ئاسمان، نه له بان زەوی و نه له ژێر زەوی، تویەناێ ئەوه نیاشت که تومارەگه واز بکێد یا بنوڕیده ناوێەو.

⁴ مه وه دەنگ بەرز دەس نامه گیره چوینکه هویچکەسێگ پەێا نوی که شایسەێ واز کردن تومارەگه یا نوڕین وەناوێەو بود.

⁵ ئەو وەخته یەکیگ له پیریل وه مه وەت: «دی گیره مەکه. بنوڕ، ئەو شیر هوز یەهودا، ئەو بنچینەێ داود پادشا، بردیەسەو، تا بتویەنێ تومارەگه و هەفت گله مورەگەێ واز بکێد.»

⁶ له ناوڕاس تەختەگه و ئەو چوار گیانەوەر زنی و له ناوڕاس پیریل، وەرکێگ دیم وساوی، چمانێگ سەری بڕیاوید، هەفت گله شاخ داشت و هەفت گله چەو که هەفت روح خوەدان که کل کریاسه بان گشت زەوی.

⁷ ئەیو وه‎ڕکه چی و تومارەگه له دەس ڕاس تەختنشینەگه گرد.

⁸ جا وەشون ئەوه که تومارەگه گرد، ئەو چوار گیانەوەر زنی و ئەو بیس و چوار پیره له نوای وەرکەگه کەفتنه بان خاک. ئەوانه هەر کامێان چەنگێگ له دەسێانەو بی و پیاڵەێگ تەڵایی نیقەڵتوز له بوخورێگ که هەر ئەو دوعایل ئیمانداریل مەسیحەسه.

⁹ جا ئیجور بەیت تازەێگ خوەنن که وەتیاد: «توی شایسەێ گردن تومارید و شایسەێ واز کردن موریلێ، ئەڕا ئیه که سەر بڕیاێد و وەگەرد خوین خوەد ڕزگاری مەردم له هەر هوز و زوان و قەوم و ملەتێگ، ئەڕا خودا سەندی؛

¹⁰ جا ئەوانه کردیدەسه حوکومەتێگ و کاهنیلێگ ئەڕا خوداێ ئیمه و ئیانه وه مل زەوی سەڵتەنەت کەن.»

¹¹ ئمجا نوڕستم و دەنگ فریشتەیل فرەێگ شنەفتم که له دەورادەور ئەو تەخته و ئەو گیانەوەریل زنی و ئەو پیریله، گردەو بوین. ژمارەێ ئەوانه هەزاریل هەزار و کوروریل کرور بی.

¹² وه دەنگ بەرزەو ئیجوره وەتیان: «ئەیو وەرک سەر بڕیاێه شایسەێ ئیەسه که هێز و دەوڵەمەنی و زانیاری و تویەنایی و حرمەت و جەڵاڵ و ستایش پێشکەشێ بود.»

¹³ ئمجا شنەفتم هەر درسکریاێگ که ها ناو ئاسمان و ها له بان زەوی و ها له ژێر زەوی و ها له ناو دەریا، وەگەرد هەر چی که ها ناوێانەو، ئیجوره وەتیان: «ستایش و حرمەت و جەڵاڵ و هێز، تا ئەبەد و تا ئەبەد هن تەختنشینەگه و وەرکەگه بود.»

¹⁴ جا ئەو چوار گیانەوەر زنیه وەتن: «ئامین»، و ئەو پیریله کەفتنه مل زەوی و پەرەسش کردن.