وەحی وه یوحەنا 4 - کتاب مقدس به زبان کردی جنوبی - گویش کلهوری

تەخت له ئاسمان

¹ جا وەشون ئیه نوڕستم و ئێرنگه وه نوای چەوم دەر واز کریاێگ وەناو ئاسمان بی و هەر ئەو دەنگ یەکم جاره که جور دەنگ شەیپورێگ بی و شنەفتویم وەگەردمەو قسیه کردوی، وەت: «بەوه بان ئەڕا ئێرا و مه ئەو چشته که له شون ئیه باێه هەڵبکەفێ، نیشاند دەم.»

² زویزی روح خودا گردمه وەر و تەختێگ وه نوای چەوم وەناو ئاسمان بی، له بان تەختەگه کەسێگ دانيشتوی.

³ تەختنشینەگه، شێوەێ هەر جور کوچگ یەشم و عەقیق بی و دەور تا دەور تەختەگه سیمینەوزەرینەێگ که شێوەێ هەر جور زومڕود بی، داێگردوی.

⁴ دەورادەور تەختەگه، بیس و چوار تەخت تریش بی که له بان ئەوانه بیس و چوار پیر دانیشتوین. ئەوانه دڵنگ چەرمگ له وەرێان و تاج تەڵا له بان سەریان بی.

⁵ جا له تەختەگه، بڵاچه، گرمەگرم و هەورەتریقه هەڵسیاد. له نوای تەختەگه، هەفت گله مەشخەل گڕەکەر بی. ئیانه هەفت روح خوەدان.

⁶ جا له نوای تەختەگه، چشتێگ بی که مینستیاده دەریاێگ له شیشه ، جور بلور. دەور تا دەور تەختەگه، وه هەر لاێ تەختەگه، چوار گیانەوەر زنی بی که له نوا و له دویاوه پڕ له چەو بی.

⁷ گیانەوەر زنی یەکمین، هەر مینستیاده شیر و گیانەوەر زنی دویمیش مینستیاده پارێنەێگ. گیانەوەر زنی سێێەمی، دەمچەو ئایەم داشت و گیانەوەر زنی چوارمی، هەر جور هەڵوێگ بی که باڵەو گردوی.

⁸ ئەو چوار گیانەوەر زنیه، هەر کامێان شەش باڵ دێرن و دەور تا دەور و تەنانەت له ژێر باڵەگانێانیش، پڕ له چەوه و شەو و ڕوژ نیه‎وسن و ئویشن: «قودوس، قودوس، قودوسه خوداوەند خوداێ هەر وه تویەنا، ئەیو که بیه و هەس و تێد.»

⁹ هەر جار که ئەو گیانەوەریل زنیه، جەڵاڵ و عزەت و سپاس هەناردیان ئەڕا تەختنشین که له ئەبەد تا ئەبەد زنیه،

¹⁰ ئەو بیس و چوار پیره، له وەر دەم تەخت نشینەگه کەفنه مل خاک و پەرەسش ئەیو کەن که له ئەبەد تا ئەبەد زنیه، ئەوانه تاجیل خوێان خەنه نوای تەختەگه و ئویشن:

¹¹ «ئێ خوداوەند و خوداێ ئیمه، تو شایسەێ که جەڵاڵ و عزەت و هێز، پێشکەش بوده پێد، چوینکه تو گشت چشتێگ وه دی هاوردی و گشت چشتێگ وه خاست توی درسکریا و وه دی هات.»