وەحی وه یوحەنا 3 - کتاب مقدس به زبان کردی جنوبی - گویش کلهوری

پێخام مەسیح وه کلیساێ ساردس

¹ «وه فریشتەێ کلیساێ شار ساردس بنویس: «ئەوه که هەفت روح خودا و هەفت هەساره دێرێد، ئیجوره ئویشێد: له کاریلد ئاگادارم. دەنگ و ناو زنی بیند بەرزە، وەلێ مردیده.

² له خەو هەڵسەپا و ئەو چشته که مەنیه و نزیکه بمرێ، وه قەوەتێەو بکه! ئەڕا ئیه که کاریل تو له چەو خوداێ خوەم کامڵەو نێیمه.

³ جا ئەو چشته که گردیده و شنەفتیدە، باره هویرد؛ ئەوه بپارێزن و توبه بکه. ئەگەر له خەو هەڵنەڵسێد، جور دزێگ تیەم و نیەزانێد چ ساتێگ تیەمه ئەڕاد.

⁴ «هەر چەن هێمراێ چەن نەفەر له ساردس ديری که داوانێان چەپەڵ نەکردنه. ئیانه دڵنگ چەرمگ له وەر، وەگەردمەو ڕێ کەن، چوینکه شایسەن.

⁵ هەر کەسێگ که بوێدەو، ئیجوره وه دڵنگێگ چەرمێگ ڕەژێیدەو جا ناوێ هەراێهەر له دەفتەر زنەیی پاکەو نیەکەم، بەڵکەم ناوێ وه لاێ باوگم و فریشتەیلێ وه زوان تیەرم.

⁶ ئەوه که گوش دێرێد بشنەفێد که روح خودا وه کلیسایل چه ئویشێد.

پێخام مەسیح وه کلیساێ فیلادلفیه

⁷ «وه فریشتەێ کلیساێ شار فیلادلفیه بنویس: «ئەیو که قودوسه، ئەیو که حەقه، ئەیو که کلیل داود پادشا دێرێد، ئەیو که واز کەێد و کەس نیەوەسێد و ئەیو که بەسێد و کەس واز نیەکێد، ئیجوره ئویشێد:

⁸ کردەوەد زانم. بنوڕ، دەر واز کریاێگ له وەر دەم تو نامه که هویچکەسێگ نیەتویەنێ بوەسیدێ. زانم که هێز کەمێگ دێرێ، وەلێ کەڵام مه پارێزانیده و ناو مه حاشا نەکردیده.

⁹ بنوڕ، ئەوانه که له کەنیسەی شەیتانن و خوێان وه جویلەکە زانن وەلێ نیەن، بەڵکەم درو دەن، بنوڕ، وادارێان کەم تا بان و بکەفنه بان پاد و بفامن که مه دوسد داشتمه.

¹⁰ وه بونەێ ئیه که قسیه مه له باوەت سەور و بەردەوام بین پارێزانیده، منیش توی له سات ئەزمونێگ که وه سەر تەمام جهان تێد تا نیشتەجێیل زەوی ئەزمون بکێد، پارێزنم.

¹¹ «و ئی زویه تیەم. ئەو چشته که ديری، قورس بگرێ تا کەسێگ تاجەگەد له لێد نەسنێ.

¹² هەر کەسێگ بوێدەو، ئەوه کەمه کوڵەکەیگ له ناو مابەد خوداێ خوەم. ئەوه هەراێهەر ئەوره نێلیده جێ. وه ملێەو ناو خوداێ خوەم و ناو شار خوداێ خوەم، یانێ ئورشەلیم تازه که له لاێ خودا خوەم له ئاسمان تێدە خوار، نویسم و ناو تازه خوەم نویسم.

¹³ ئەوه که گوش دێرێد بشنەفێد که روح خودا وه کلیسایل چه ئویشێد.

پێخام وه کلیساێ لائودیکیه

¹⁴ «وه فریشتەێ کلیساێ شار لائودیکیه بنویس: «ئەیو که ئامینه، ئەیو که شاێەت ئەمین و حەقه، ئەیو که سەرکیەنی درسکریایل خوداس، ئیجوره ئویشێد:

¹⁵ له کردەوەد خەوەر دێرم؛ توی نه سەردی و نه گەرم. خوەزگه یا سەرد بیاتیای یا گەرم.

¹⁶ جا ئەڕا ئیه که تین گەرمی، نه گەرم و نه سەرد، له دەمم تفد کەمه دەیشت.

¹⁷ چوینکه ئویشێد: ”دەوڵەمەنم؛ ماڵ گردەو کردمه و هەوەجیم وه چشتێگ نیه.“ جا خەوەر نێری که چارەسیه و بێبەخت و گێا و کور و ڕویتی.

¹⁸ ئاموژیارید کەم که تەڵای ناب له ئاگر گوزەریاێ له مه بسێنێ تا دەوڵەمەنەو بید و دڵنگیل چەرمگ له مه بسێنێ تا بکێده وەرێد و شەرمزاری ڕویتیەگەد دیار نود؛ مەلهەمێگ له مه بسێنێ، تا بماڵیده بان چەویل خوەد و بیناوه بید.

¹⁹ «مه کەسیلێگ گرمه گازتاوه و ئەدەو کەم که دوسیان دێرم. جا غیرەت بیاشتوید و توبه بکه.

²⁰ بنوڕ، له دەم دەرەگه وسامه و دەر کوتم. کەسێگ ئەگەر دەنگ مه بشنەفێد و دەرەگه واز بکێد، تیەمه ناو ئەڕا لاێ و وەگەردیەو هاوسفره بوم و ئەویش وەگەرد منەو.

²¹ «هەر کەسێگ بوێدەو، وەپێ ئجازەێ دانيشتن وەگەردمەو وه مل تەختەگەێ خوەم بەخشم، هەر ئەوجورە که مه بردمەو وەگەرد باوگم وه مل تەختەگەێ دانیشتم.

²² ئەوه که گوش دێرێد بشنەفێد که روح خودا وه کلیسایل چه ئویشێد.»